ഒരു ഗൾഫ് രാജ്യത്തെ കുറ്റകൃത്യം മറ്റൊരിടത്തും വിനയാകും; ജിസിസി രാജ്യങ്ങൾക്കിടയിലെ ക്രിമിനൽ റെക്കോർഡ് കൈമാറ്റം കൂടുതൽ കർശനമാക്കി

ദുബായ്: ഗൾഫ് രാജ്യങ്ങൾക്കിടയിൽ കുറ്റവാളികളുടെ വിവരങ്ങൾ പരസ്പരം കൈമാറുന്ന ഏകീകൃത സുരക്ഷാ ശൃംഖല കൂടുതൽ കർശനമാകുന്നു. ഏതെങ്കിലുമൊരു ജിസിസി രാജ്യത്ത് കുറ്റകൃത്യങ്ങളിൽ ഏർപ്പെടുകയോ നാടുകടത്തപ്പെടുകയോ ചെയ്തവർക്ക് മറ്റ് ഗൾഫ് രാജ്യങ്ങളിൽ ജോലിയോ പുതിയ ബിസിനസ്സോ ആരംഭിക്കുന്നതിന് വിലക്കുണ്ടാകും. പുതിയ സംരംഭങ്ങൾ തുടങ്ങാൻ എത്തുന്ന നിക്ഷേപകരുടെ മുൻകാല ക്രിമിനൽ പശ്ചാത്തലം കൂടി കൃത്യമായി പരിശോധിക്കാവുന്ന രീതിയിലാണ് ഈ പുതിയ സംവിധാനം ഒരുക്കിയിരിക്കുന്നത്.

യുഎഇ, ഖത്തർ, കുവൈത്ത്, ബഹ്റൈൻ, ഒമാൻ തുടങ്ങിയ ജിസിസി രാജ്യങ്ങളിൽ സാമ്പത്തിക തട്ടിപ്പുകളിലോ മറ്റ് കേസുകളിലോ ഉൾപ്പെട്ടവർക്ക് സൗദി അറേബ്യയിൽ ജോലി ചെയ്യുന്നതിനും ബിസിനസ് നടത്തുന്നതിനും നിലവിൽ കടുത്ത നിയന്ത്രണങ്ങളുണ്ട്. ജിസിസി രാജ്യങ്ങളിലെ ആഭ്യന്തര മന്ത്രാലയങ്ങൾ തമ്മിൽ കുറ്റവാളികളുടെ വിവരങ്ങൾ പങ്കുവെക്കുന്ന നടപടികൾ ഇപ്പോൾ കൂടുതൽ സജീവമാണ്. വിസ അനുവദിക്കുന്ന സമയത്തും ബിസിനസ് ലൈസൻസ് എടുക്കുന്ന ഘട്ടത്തിലും മറ്റ് ജിസിസി രാജ്യങ്ങളിലെ റെക്കോർഡുകൾ കൂടി പരിശോധിക്കുന്നതിനാൽ നിയമലംഘകർ എളുപ്പത്തിൽ പിടിക്കപ്പെടും. പഴയ കേസുകൾ പൂർണ്ണമായി തീർപ്പാക്കാതെ സ്വന്തം പേരിൽ സൗദിയിൽ ബിസിനസ് തുടങ്ങാൻ പ്രയാസമാകുമെന്ന് സൗദി അറേബ്യയിലെ അറേബ്യൻ ഹൊറൈസൺ മാനേജ്‌മെന്റ് കൺസൾട്ടന്റ്‌സ് സിഇഒ ഷാകിർ ഹുസൈൻ വ്യക്തമാക്കി.

ഒരു രാജ്യത്ത് നിയമലംഘനം നടത്തി മറ്റൊരു ഗൾഫ് രാജ്യത്തേക്ക് കടന്നുകളയുന്ന പ്രവണത തടയുക എന്നതാണ് ഈ നീക്കത്തിലൂടെ ജിസിസി ഭരണകൂടങ്ങൾ പ്രധാനമായും ലക്ഷ്യമിടുന്നത്. ബിസിനസ് മേഖലയ്ക്ക് ഇത് കൂടുതൽ സുതാര്യതയും സുരക്ഷിതത്വവും നൽകുമെന്നാണ് വിലയിരുത്തപ്പെടുന്നത്. ചുരുക്കത്തിൽ, ഏതെങ്കിലുമൊരു ഗൾഫ് രാജ്യത്ത് ജോലി ചെയ്യുകയോ ബിസിനസ്സ് നടത്തുകയോ ചെയ്യുന്ന പ്രവാസികൾ അവിടുത്തെ സാമ്പത്തിക ബാധ്യതകളും നിയമപ്രശ്നങ്ങളും കൃത്യമായി തീർപ്പാക്കാതെ മടങ്ങിയാൽ, ഗൾഫിൽ ഒന്നാകെ അവർക്ക് വിലക്ക് നേരിടേണ്ടി വരുമെന്ന ശക്തമായ മുന്നറിയിപ്പാണ് ഈ പുതിയ നടപടി നൽകുന്നത്.