യൂറോപ്യൻ പാർലമെന്റിന് മുന്നിൽ ട്രംപിന്റെ നഗ്ന ശിൽപം; 23 കാരറ്റ് സ്വർണത്തിൽ പൊതിഞ്ഞ ‘ദി ഓറഞ്ച് പ്ലേഗ്’ ശ്രദ്ധേയമാകുന്നു

യൂറോപ്യൻ പാർലമെന്റ് മന്ദിരത്തിന് മുന്നിൽ അമേരിക്കൻ പ്രസിഡന്റ് ഡൊണാൾഡ് ട്രംപിന്റെ നഗ്ന പ്രതിമ പ്രദർശിപ്പിച്ചു. ഡാനിഷ് കലാകാരനായ ജെൻസ് ഗാൽഷിയോട്ട് നിർമിച്ച ‘ദി ഓറഞ്ച് പ്ലേഗ്’ എന്ന് പേരിട്ടിരിക്കുന്ന എട്ടടി ഉയരമുള്ള ശിൽപമാണ് പാർലമെന്റിന് മുന്നിൽ സ്ഥാപിച്ചിരിക്കുന്നത്. 23 കാരറ്റ് സ്വർണ്ണം പൂശിയ നിലയിലാണ് ഈ പ്രതിമ ഒരുക്കിയിരിക്കുന്നത്.

മറ്റൊരാളുടെ തോളിൽ നഗ്നനായി ഇരിക്കുന്ന രീതിയിലാണ് ട്രംപിനെ ശിൽപത്തിൽ ചിത്രീകരിച്ചിരിക്കുന്നത്. ട്രംപിന്റെ ഒരു കയ്യിൽ ഗോൾഫ് ക്ലബ്ബും മറുകയ്യിൽ നീതിയുടെ തുലാസും കാണാം. ശിൽപത്തിന്റെ താഴെയായി ഭൂമിയുടെ മാതൃകയിലുള്ള ഒരു പന്തും ഉൾപ്പെടുത്തിയിട്ടുണ്ട്. പ്രതിമയുടെ പീഠത്തിൽ ‘നീതികേടിന്റെ രാജാവ്’ (The King of Injustice) എന്ന് രേഖപ്പെടുത്തിയിരിക്കുന്നു. കൂടാതെ, “ഞാൻ ഒരാളുടെ മുതുകിലാണ് ഇരിക്കുന്നത്. എന്റെ ഭാരം കാരണം അയാൾ തളർന്നുപോകുന്നു. അയാളെ സഹായിക്കാൻ ഞാൻ എന്തും ചെയ്യും. പക്ഷേ, അദ്ദേഹത്തിന്റെ മുതുകിൽ നിന്ന് എനിക്ക് ഇറങ്ങാനാവില്ല” എന്ന പരിഹാസരൂപത്തിലുള്ള സന്ദേശവും ഇതിനടിയിൽ എഴുതിയിട്ടുണ്ട്.

ഹാൻസ് ക്രിസ്റ്റ്യൻ ആൻഡേഴ്സന്റെ പ്രശസ്തമായ ‘ദി എംപറേഴ്സ് ന്യൂ ക്ലോത്ത്സ്’ എന്ന കഥയിൽ നിന്ന് പ്രചോദനം ഉൾക്കൊണ്ടാണ് താൻ ഈ ശിൽപം നിർമ്മിച്ചതെന്ന് ജെൻസ് ഗാൽഷിയോട്ട് വ്യക്തമാക്കി. ട്രംപിന്റെ നയങ്ങളെയും രാഷ്ട്രീയ അധികാരത്തിന്റെ പ്രത്യാഘാതങ്ങളെയും വിമർശിക്കുന്ന ഒരു ആക്ഷേപഹാസ്യ പ്രതിഷേധമാണിതെന്നും ഏകാധിപതികൾക്ക് തങ്ങളെ പരിഹസിക്കുന്നത് ഇഷ്ടമല്ലെന്നും അദ്ദേഹം കൂട്ടിച്ചേർത്തു. ട്രംപിന്റെ ആഗോള സ്വാധീനത്തെക്കുറിച്ച് യൂറോപ്പിൽ ചർച്ചകൾ സജീവമാക്കുക എന്ന ലക്ഷ്യത്തോടെ ഡാനിഷ് എംഇപി പെർ ക്ലോസന്റെ പിന്തുണയോടെയാണ് പ്രദർശനം സംഘടിപ്പിച്ചിരിക്കുന്നത്. പാർലമെന്റ് അധികൃതരുടെ ഔദ്യോഗിക അനുമതിയും ഇതിനുണ്ട്.

യൂറോപ്യൻ പാർലമെന്റിലെ പ്രദർശനത്തിന് ശേഷം, വരാനിരിക്കുന്ന യുഎൻ കാലാവസ്ഥാ സമ്മേളനത്തിലും ഈ ശിൽപം പ്രദർശിപ്പിക്കും. നവംബറിൽ തുർക്കിയിലെ അന്റാല്യയിലാണ് സമ്മേളനം നടക്കുന്നത്. ഇതിന് പുറമെ, സന്ദർശകർക്കും പ്രതിനിധികൾക്കുമായി പ്രതിമയുടെ ത്രിഡി പ്രിന്റഡ് ചെറുപതിപ്പുകളും വിതരണം ചെയ്യുന്നുണ്ട്.