തിരുവനന്തപുരം: യു.ഡി.എഫ് സർക്കാരിന്റെ സുപ്രധാന തിരഞ്ഞെടുപ്പ് വാഗ്ദാനമായിരുന്ന ‘പ്രിയദർശിനി’ സ്ത്രീ സൗജന്യ യാത്രാ പദ്ധതി നൂറു ദിനങ്ങൾ പൂർത്തിയാക്കുമ്പോൾ വൻ വിജയത്തിലേക്ക്. പദ്ധതി ആരംഭിച്ച് ഇത്രയും നാളുകൾക്കുള്ളിൽ 12 കോടിയിലധികം (12.54 കോടി) സൗജന്യ യാത്രകളാണ് കെ.എസ്.ആർ.ടി.സി ഓർഡിനറി ബസുകളിലൂടെ സ്ത്രീകൾ നടത്തിയത്. സമൂഹത്തിന്റെ നാനാതുറകളിലുള്ള സ്ത്രീകൾക്ക് വലിയൊരാശ്വാസമായി മാറിയ ഈ പദ്ധതി, മികച്ചൊരു സ്ത്രീശാക്തീകരണ മാതൃകയായാണ് വിലയിരുത്തപ്പെടുന്നത്.
തിരഞ്ഞെടുപ്പ് കാലത്തെ ‘ഇന്ദിര ഗ്യാരണ്ടി’യുടെ ഭാഗമായി ജൂൺ 15-നാണ് ഓർഡിനറി ബസുകളിൽ പ്രിയദർശിനി പദ്ധതിക്ക് തുടക്കമായത്. ഗതാഗത വകുപ്പിന്റെ കണക്കുകൾ പ്രകാരം സെപ്റ്റംബർ 19 വരെ 266.53 കോടി രൂപയുടെ യാത്രാ ആനുകൂല്യമാണ് സ്ത്രീകൾക്ക് ലഭിച്ചത്. സ്വന്തം വാഹനങ്ങളും മറ്റ് യാത്രാമാർഗ്ഗങ്ങളും ഒഴിവാക്കി സ്ത്രീകൾ കൂടുതലായി കെ.എസ്.ആർ.ടി.സിയെ ആശ്രയിക്കാൻ തുടങ്ങിയതോടെ ഓർഡിനറി സർവീസുകളുടെ സുവർണ്ണകാലം കൂടിയാണിത്. പദ്ധതി വന്നതോടെ പുരുഷ യാത്രക്കാർ കുറഞ്ഞിട്ടുമില്ല; നിലവിൽ 6.19 ലക്ഷം പുരുഷന്മാരും ഈ ബസുകളെ ആശ്രയിക്കുന്നുണ്ട്.
സൗജന്യ യാത്രയ്ക്ക് പുറമെ ഗതാഗത മേഖലയിൽ മറ്റ് പല ശ്രദ്ധേയമായ മാറ്റങ്ങൾക്കും ഈ കാലയളവ് സാക്ഷ്യം വഹിച്ചു. എ.ഐ സാങ്കേതികവിദ്യയുടെ സഹായത്തോടെയുള്ള ടിക്കറ്റ് ബുക്കിംഗ്, ഊബറുമായുള്ള പുതിയ സഹകരണം, കൂടുതൽ അന്തർ സംസ്ഥാന സർവീസുകൾ തുടങ്ങിയവയും കെ.എസ്.ആർ.ടി.സി ഇതിനോടകം നടപ്പിലാക്കിയിട്ടുണ്ട്.
വെല്ലുവിളികളും രണ്ടാം ഘട്ടവും:
പദ്ധതി കെ.എസ്.ആർ.ടി.സിക്ക് വലിയ ഊർജ്ജമായെങ്കിലും, ഇതുമൂലം പ്രതിസന്ധിയിലായ സ്വകാര്യ ബസ് മേഖലയെ സംരക്ഷിക്കുക എന്നതാണ് സർക്കാരിന് മുന്നിലുള്ള പ്രധാന വെല്ലുവിളി. ഈ പ്രശ്നങ്ങൾക്ക് പരിഹാരം കാണാനുള്ള ശ്രമത്തിലാണ് സർക്കാർ. കൂടാതെ, പദ്ധതിയുടെ നൂറു ദിവസത്തെ പ്രവർത്തന റിപ്പോർട്ട് വിലയിരുത്തിയ ശേഷം രണ്ടാം ഘട്ടം നടപ്പിലാക്കാനും സർക്കാർ ലക്ഷ്യമിടുന്നുണ്ട്. അടുത്ത ഘട്ടത്തിൽ സിറ്റി ഫാസ്റ്റ്, സൂപ്പർ ഫാസ്റ്റ് ബസുകളിലേക്ക് കൂടി സൗജന്യ യാത്രാ പദ്ധതി വ്യാപിപ്പിച്ചാൽ കൂടുതൽ പേർക്ക് ഇതിന്റെ പ്രയോജനം ലഭിക്കുമെന്നാണ് വിലയിരുത്തൽ. ഈ ആവശ്യവും ശക്തമായി ഉയരുന്നുണ്ട്.
+ There are no comments
Add yours