‘കേരളത്തിലെ വിജയം ജനവികാരം അനുകൂലമായതുകൊണ്ട്’; എസ്ഐആർ സ്വാധീനിച്ചെന്ന സിജെപി ആരോപണം തള്ളി സണ്ണി ജോസഫ്

തിരുവനന്തപുരം: ഡൽഹിയിൽ എസ്ഐആറിനെതിരെ (SIR) ഇന്ത്യാ സഖ്യത്തിന്റെ നേതൃത്വത്തിൽ സംയുക്ത പ്രതിഷേധം തുടരവെ, കേരളത്തിലെ യുഡിഎഫ് വിജയത്തെച്ചൊല്ലി രാഷ്ട്രീയ വിവാദം കനക്കുന്നു. എസ്ഐആർ സംവിധാനത്തിലൂടെയാണ് കേരളത്തിൽ എൽഡിഎഫ് ഭരണം അവസാനിച്ചതെന്ന സിജെപിയുടെ ആരോപണം കോൺഗ്രസ് പൂർണ്ണമായും തള്ളി. അതിശക്തമായ ജനവികാരം യുഡിഎഫിന് അനുകൂലമായി ആഞ്ഞുവീശിയതുകൊണ്ടാണ് കേരളത്തിൽ തങ്ങൾ വൻ ഭൂരിപക്ഷത്തിൽ വിജയിച്ചതെന്ന് കോൺഗ്രസ് നേതാവ് സണ്ണി ജോസഫ് വ്യക്തമാക്കി.

എസ്ഐആറിൽ ക്രമക്കേടുണ്ടെന്ന് കോൺഗ്രസ് വിശ്വസിക്കുന്നുണ്ടെങ്കിൽ മുഖ്യമന്ത്രി വി.ഡി. സതീശൻ രാജിവയ്ക്കണമെന്ന ബിജെപിയുടെ ആവശ്യത്തെ സണ്ണി ജോസഫ് പരിഹസിച്ചു. ബിജെപിയുടേത് മുടന്തൻ ന്യായമാണെന്നും, വോട്ടർ പട്ടികയിൽ ക്രമക്കേടുണ്ടെന്ന് അവർ തന്നെ ഇതിലൂടെ സമ്മതിക്കുകയാണെന്നും അദ്ദേഹം പറഞ്ഞു. “കേന്ദ്രത്തിലും കേരളത്തിലും പ്രതിപക്ഷത്തായിരുന്ന ഞങ്ങൾക്ക് എങ്ങനെയാണ് വോട്ടർപട്ടികയിൽ ക്രമക്കേട് നടത്താൻ സാധിക്കുക? ഭരണത്തിൽ ഞങ്ങൾക്ക് യാതൊരു സ്വാധീനവുമില്ലായിരുന്നു. തദ്ദേശ തിരഞ്ഞെടുപ്പിലെ ഞങ്ങളുടെ വിജയം എസ്ഐആറിന്റെ ബലത്തിലായിരുന്നോ? എസ്ഐആറിൽ കൃത്രിമം കാണിക്കാൻ കഴിയുമെന്ന് ബിജെപി തന്നെ സമ്മതിച്ചത് നന്നായി,” സണ്ണി ജോസഫ് തിരിച്ചടിച്ചു. മറ്റു സംസ്ഥാനങ്ങളിൽ വൻ സമരങ്ങളും നിയമപോരാട്ടങ്ങളുമാണ് നടക്കുന്നത്. എന്നാൽ കേരളത്തിൽ ബിജെപിക്കോ സിപിഐഎമ്മിനോ എസ്ഐആറുമായി ബന്ധപ്പെട്ട് യാതൊരു പരാതിയും ഉണ്ടായിരുന്നില്ലെന്നും അദ്ദേഹം ചൂണ്ടിക്കാട്ടി.

അതേസമയം, സിജെപിയുടെ പരാമർശത്തിൽ സിപിഐഎം നേതാക്കൾക്കിടയിൽ ഭിന്നാഭിപ്രായമുണ്ട്. എസ്ഐആർ അല്ല കേരളത്തിലെ പരാജയത്തിന് കാരണമെന്ന് കേന്ദ്ര കമ്മിറ്റി അംഗം കെ.കെ. ശൈലജ പ്രതികരിച്ചപ്പോൾ, തിരഞ്ഞെടുപ്പ് ഫലത്തെ എസ്ഐആർ സ്വാധീനിച്ചെന്ന നിലപാടിലാണ് മുൻ മന്ത്രി കെ.എൻ. ബാലഗോപാൽ. കഴിഞ്ഞ ദിവസം ബെംഗളൂരുവിൽ നടന്ന പ്രതിഷേധ പരിപാടിക്കിടെ അഭിജീത് ദീപ്‌കെയാണ് കേരളത്തിലെ നിയമസഭാ തിരഞ്ഞെടുപ്പ് പരാജയത്തിന് കാരണം എസ്ഐആർ ആണെന്ന് ആരോപിച്ചത്.