തിരുവനന്തപുരം: മാസപ്പടി കേസിൽ എൻഫോഴ്സ്മെന്റ് ഡയറക്ടറേറ്റ് (ഇ.ഡി) നൽകിയ കത്തിൻമേലുള്ള തുടർനടപടികൾ വേഗത്തിലാക്കി സർക്കാർ. പ്രതിപക്ഷ നേതാവ് പിണറായി വിജയൻ, മകൾ വീണ ടി., മുൻമന്ത്രി പി.എ. മുഹമ്മദ് റിയാസ് എന്നിവർക്കെതിരായ അന്വേഷണത്തിന്റെ ഫയൽ ആഭ്യന്തര വകുപ്പ് സെക്രട്ടറി സംസ്ഥാന പോലീസ് മേധാവിക്ക് (ഡി.ജി.പി) കൈമാറി. കേസ് അന്വേഷിക്കുന്നതിനായുള്ള പ്രത്യേക അന്വേഷണ സംഘത്തെ (എസ്.ഐ.ടി) നിയോഗിച്ച് ഡി.ജി.പി ഉടൻ ഉത്തരവിറക്കും.
അന്വേഷണ വഴി:
സർക്കാരിന്റെ തീരുമാനം ഔദ്യോഗിക കത്തായി ഇന്ന് തന്നെ ഡി.ജി.പിക്ക് കൈമാറുമെന്നാണ് വിവരം. ഇതിന് പിന്നാലെ എസ്.ഐ.ടി രൂപീകരിച്ചുകൊണ്ടുള്ള ഉത്തരവ് പുറത്തിറങ്ങും. ചുമതലയേൽക്കുന്ന അന്വേഷണ സംഘം ആദ്യഘട്ടത്തിൽ ഇ.ഡി ഉദ്യോഗസ്ഥരുമായി കൂടിക്കാഴ്ച നടത്തും. ഇ.ഡിയുടെ കണ്ടെത്തലുകളുടെ അടിസ്ഥാനത്തിലാകും അന്വേഷണം ആരംഭിക്കുക. കേസിൽ ആരോപിക്കപ്പെടുന്ന ഹവാല ഇടപാടുകൾ കേന്ദ്രീകരിച്ചാകും പ്രധാന അന്വേഷണം നടക്കുക. 30 ദിവസത്തിനകം പ്രാഥമിക അന്വേഷണം പൂർത്തിയാക്കാനാണ് സർക്കാരിന്റെ കർശന നിർദ്ദേശം.
പ്രാഥമിക അന്വേഷണത്തിന് ശേഷം കേസ്:
ഇ.ഡി കത്ത് നൽകി 15 ദിവസങ്ങൾക്ക് ശേഷമാണ് ഈ നിർണ്ണായക നടപടിയിലേക്ക് സർക്കാർ കടന്നത്. പിണറായി വിജയനെതിരെ അഴിമതി നിരോധന നിയമപ്രകാരം നേരിട്ട് കേസെടുക്കാമെന്നായിരുന്നു സർക്കാരിന് ലഭിച്ച നിയമോപദേശം. എന്നാൽ, പ്രാഥമിക അന്വേഷണം നടത്തിയ ശേഷം മാത്രം കേസ് രജിസ്റ്റർ ചെയ്താൽ മതിയെന്നാണ് സർക്കാർ തീരുമാനിച്ചിരിക്കുന്നത്. മുഖ്യമന്ത്രിയും ആഭ്യന്തരമന്ത്രിയും നടത്തിയ പ്രത്യേക കൂടിക്കാഴ്ചയിലാണ് ഈ നയപരമായ തീരുമാനമെടുത്തത്. ഇതിന്റെ ഭാഗമായി ഡി.ജി.പി ഉൾപ്പെടെയുള്ള ഉന്നത പോലീസ് ഉദ്യോഗസ്ഥരെ ആഭ്യന്തരമന്ത്രി രമേശ് ചെന്നിത്തല കഴിഞ്ഞ ദിവസം നേരിട്ട് വിളിച്ചുവരുത്തി ചർച്ച നടത്തിയിരുന്നു.
+ There are no comments
Add yours