‘വിമാനം ഏർപ്പാടാക്കിയത് മലയാളിയായ പരിചയക്കാരൻ, പേര് വലിച്ചിഴയ്ക്കില്ല; ഇനിയും യാത്ര ചെയ്യും’: വിവാദങ്ങൾക്ക് മറുപടിയുമായി മുഖ്യമന്ത്രി വി.ഡി. സതീശൻ

തിരുവനന്തപുരം: തന്റെ വിവാദ വിമാന-ഹെലികോപ്റ്റർ യാത്രകൾക്ക് സർക്കാർ ഖജനാവിൽ നിന്ന് ഒരു രൂപ പോലും ചെലവായിട്ടില്ലെന്ന് മുഖ്യമന്ത്രി വി.ഡി. സതീശൻ. മലപ്പുറത്തേക്കുള്ള യാത്രയ്ക്ക് വിമാനം ഏർപ്പാടാക്കി നൽകിയത് മലയാളിയായ ഒരു പരിചയക്കാരനാണ്. അദ്ദേഹത്തിന്റെ പേര് അനാവശ്യമായി വിവാദങ്ങളിലേക്ക് വലിച്ചിഴക്കാൻ ഉദ്ദേശിക്കുന്നില്ലെന്നും, ആവശ്യമെങ്കിൽ ഇനിയും ഇത്തരത്തിൽ യാത്ര ചെയ്യുമെന്നും മുഖ്യമന്ത്രി വ്യക്തമാക്കി.

‘മുൻ മുഖ്യമന്ത്രിമാരും ഇത്തരത്തിൽ സഞ്ചരിച്ചിട്ടുണ്ട്’: ഉമ്മൻചാണ്ടിയും പിണറായി വിജയനും മുഖ്യമന്ത്രിമാരായിരുന്ന കാലത്ത് സ്വകാര്യ വ്യക്തികൾ ഏർപ്പാടാക്കിയ വിമാനങ്ങളിൽ നിരവധി തവണ യാത്ര ചെയ്തിട്ടുണ്ട്. അന്നൊന്നും അവരുടെ പേരുകൾ വെളിപ്പെടുത്തിയിട്ടില്ല. അന്ന് പ്രതിപക്ഷ നേതാവായിരുന്ന താൻ മുഖ്യമന്ത്രി ആരുടെ വിമാനത്തിലാണ് യാത്ര ചെയ്തതെന്ന് ചോദിച്ചിട്ടുമില്ല. ഇന്ത്യയിലെ മുഴുവൻ മുഖ്യമന്ത്രിമാരും ഇത്തരത്തിൽ യാത്ര ചെയ്യുന്നവരാണ്. അതുകൊണ്ട് തന്നെ തന്റെ യാത്രയിലും യാതൊരു തെറ്റും കാണുന്നില്ലെന്നും വി.ഡി. സതീശൻ ന്യായീകരിച്ചു.

ദുരന്തസ്ഥലത്തേക്ക് പോകാൻ വേറെ വഴിയില്ലായിരുന്നു: സെപ്റ്റംബർ 21-ന് ശിവഗിരിയിൽ നിന്ന് മലപ്പുറത്ത് ആറ് പേർ മരിച്ച ദുരന്തസ്ഥലത്തേക്ക് അടിയന്തരമായി എത്തേണ്ടതുണ്ടായിരുന്നു. അവിടെ പോയില്ലായിരുന്നെങ്കിൽ മുഖ്യമന്ത്രി തിരിഞ്ഞുനോക്കിയില്ല എന്ന് വിമർശനം വരുമായിരുന്നു. പോകാൻ മറ്റ് മാർഗ്ഗങ്ങളില്ലാത്തതിനാലാണ് പരിചയക്കാരനായ ഒരാൾ സ്വകാര്യ വിമാനം സജ്ജമാക്കി തന്നത്.

കഴിഞ്ഞ സർക്കാർ 80 ലക്ഷം രൂപയ്ക്ക് ഉണ്ടാക്കിയ ഹെലികോപ്റ്റർ കരാർ സെപ്റ്റംബർ 19 വരെ നിലവിലുണ്ടായിരുന്നു. കരാർ പ്രകാരം 25 മണിക്കൂർ പറക്കാൻ അനുമതിയുള്ളതിൽ വെറും മൂന്നോ നാലോ മണിക്കൂർ മാത്രമാണ് ഈ സർക്കാർ ഉപയോഗിച്ചത്. സെപ്റ്റംബർ 19-ന് ആ കരാർ അവസാനിച്ചു. അതിന് ശേഷം സർക്കാരിന്റെ ഒരു രൂപ പോലും തന്റെ യാത്രകൾക്കായി ഉപയോഗിച്ചിട്ടില്ലെന്നും മുഖ്യമന്ത്രി വ്യക്തമാക്കി.

‘സഹായം ചെയ്തവർ ഔദാര്യം ചോദിച്ച് വരില്ല’: വിമാനം നൽകിയതിന്റെ പേരിൽ ഈ വ്യക്തികളാരും നാളെ സർക്കാരിനോട് ഔദാര്യം ചോദിച്ച് വരില്ല. കേരളത്തിൽ വിമാനമുള്ളവരൊക്കെ സമൂഹത്തിലെ പ്രധാനപ്പെട്ട വ്യക്തികളാണ്. ഒരു ദുരന്തമുഖത്തേക്ക് പോകാൻ മുഖ്യമന്ത്രിക്ക് വിമാനം നൽകിയതിന്റെ പേരിൽ അവർക്ക് എന്തെങ്കിലും വഴിവിട്ട സഹായം ചെയ്തുകൊടുക്കുന്ന സർക്കാരല്ല ഇതെന്നും അദ്ദേഹം പറഞ്ഞു. സംസ്ഥാനത്തിന്റെ സാമ്പത്തിക നില ഭദ്രമല്ലെന്ന് ധവളപത്രത്തിലൂടെ ജനങ്ങളെ അറിയിച്ചതാണ്. അതിനാലാണ് 2017-ൽ വാങ്ങിയ വാഹനങ്ങൾ തന്നെ ഇപ്പോഴും സംസ്ഥാനത്തെ മന്ത്രിമാർ ഉപയോഗിക്കുന്നതെന്നും വി.ഡി. സതീശൻ കൂട്ടിച്ചേർത്തു.