‘ഒന്നും ഭയപ്പെടാനില്ല, ഒരു തെറ്റും ചെയ്തിട്ടില്ല’; ഇ.ഡി റിപ്പോർട്ടിലെ അന്വേഷണ നീക്കത്തിൽ പ്രതികരിച്ച് പി.എ. മുഹമ്മദ് റിയാസ്

തിരുവനന്തപുരം: മാസപ്പടി കേസിൽ എൻഫോഴ്‌സ്‌മെന്റ് ഡയറക്ടറേറ്റിന്റെ (ഇ.ഡി) റിപ്പോർട്ടിന്റെ അടിസ്ഥാനത്തിൽ അന്വേഷണം നടത്താനുള്ള സർക്കാർ തീരുമാനത്തിൽ പ്രതികരണവുമായി പി.എ. മുഹമ്മദ് റിയാസ് എം.എൽ.എ. താൻ ഒരു തെറ്റും ചെയ്തിട്ടില്ലെന്നും തികഞ്ഞ ആത്മവിശ്വാസത്തോടെ മുന്നോട്ട് പോകുമെന്നും അദ്ദേഹം വ്യക്തമാക്കി. വാർത്തകളിലൂടെ മാത്രമാണ് അന്വേഷണ വിവരങ്ങൾ അറിഞ്ഞതെന്നും അദ്ദേഹം മാധ്യമങ്ങളോട് പറഞ്ഞു.

ഇ.ഡിയുടെ അന്വേഷണ രീതികളെയും നടപടികളെയും ദേശീയ തലത്തിൽ അതിശക്തമായി എതിർക്കുന്ന കോൺഗ്രസ്, കേരളത്തിൽ അതേ ഇ.ഡി റിപ്പോർട്ട് വിശ്വാസത്തിലെടുത്ത് അന്വേഷണത്തിന് തയ്യാറായത് സമൂഹം ചർച്ച ചെയ്യുമെന്ന് അദ്ദേഹം ചൂണ്ടിക്കാട്ടി. കർണാടകയിൽ മന്ത്രിയുടെ വസതിയിൽ നടന്ന റെയ്ഡിനെപ്പോലും എതിർത്തവരാണ് കോൺഗ്രസുകാർ. കേസിന്റെ രാഷ്ട്രീയ വശങ്ങൾ പാർട്ടി സെക്രട്ടറി പ്രതികരിക്കുമെന്നും അദ്ദേഹം പറഞ്ഞു.

ഭീഷണിപ്പെടുത്തിയാണ് ഇ.ഡി പലരിൽ നിന്നും മൊഴിയെടുത്തിട്ടുള്ളത്. ജീവിതത്തിൽ ഒരിക്കൽപ്പോലും കണ്ടിട്ടില്ലാത്ത ആളുകളെ വെച്ച് വരെ തനിക്കെതിരെ കഥകൾ മെനഞ്ഞു. ഇതുമായി ബന്ധപ്പെട്ട് നിരവധി വ്യാജവാർത്തകളും പുറത്തുവന്നിട്ടുണ്ട്. ഏത് അന്വേഷണം വന്നാലും ഭയമില്ലെന്നും, നിയമവിദഗ്ധരുമായി കൂടിയാലോചിച്ച് ഇതിനെയെല്ലാം നിയമപരമായി തന്നെ നേരിടുമെന്നും മുഹമ്മദ് റിയാസ് കൂട്ടിച്ചേർത്തു.