നെടുമ്പാശ്ശേരി വാഹനാപകടം: പ്രതികൾക്ക് ജാമ്യം, ഒന്നാം പ്രതി സുഹൈൽ 10 ദിവസത്തിന് ശേഷം പുറത്തിറങ്ങും; അപകടസമയത്ത് കാറിന്റെ വേഗത 144 കി.മീ

കൊച്ചി: മൂന്ന് വിദ്യാർത്ഥികളുടെ ദാരുണാന്ത്യത്തിനിടയാക്കിയ നെടുമ്പാശ്ശേരി വാഹനാപകടക്കേസിൽ പ്രതികൾക്കെല്ലാം കോടതി ജാമ്യം അനുവദിച്ചു. ശക്തമായ വാദപ്രതിവാദങ്ങൾക്കൊടുവിലാണ് ജാമ്യം അനുവദിച്ചത്. ഒന്നാം പ്രതി സുഹൈൽ സജീവ് ഒഴികെയുള്ള മറ്റ് മൂന്ന് പ്രതികളും ഇന്ന് പുറത്തിറങ്ങും. സുഹൈലിന് പത്ത് ദിവസത്തിന് ശേഷം നവംബർ 16-ന് പുറത്തിറങ്ങാമെന്നും, ഇതിനുള്ളിൽ അന്വേഷണം പൂർത്തിയാക്കണമെന്നും കോടതി പ്രോസിക്യൂഷന് കർശന നിർദ്ദേശം നൽകിയിട്ടുണ്ട്.

അതിനിടെ, അപകടമുണ്ടാക്കിയ കാറിന്റെ അമിതവേഗത സ്ഥിരീകരിക്കുന്ന ബി.എം.ഡബ്ല്യു (BMW) കമ്പനിയുടെ സാങ്കേതിക പരിശോധനാ റിപ്പോർട്ട് അന്വേഷണ സംഘത്തിന് ലഭിച്ചു. കാറിലെ അഡ്വാൻസ്ഡ് ക്രാഷ് സേഫ്റ്റി മൊഡ്യൂളിൽ (ACSM) നിന്നുള്ള വിവരങ്ങൾ പ്രകാരം അപകടത്തിന് അഞ്ച് സെക്കൻഡ് മുൻപ് മണിക്കൂറിൽ 162 കിലോമീറ്ററായിരുന്നു വാഹനത്തിന്റെ വേഗത. കൂട്ടിയിടിക്കുന്ന സമയത്ത് ഇത് 144 കിലോമീറ്ററായിരുന്നു. അപകടത്തിന് ഒരു സെക്കൻഡ് മുൻപ് മാത്രമാണ് പ്രതി ബ്രേക്ക് ഉപയോഗിച്ചതെന്നും റിപ്പോർട്ടിൽ വ്യക്തമാക്കുന്നു.

കഴിഞ്ഞ ഒക്ടോബർ 10-ന് പുലർച്ചെ പന്ത്രണ്ടരയോടെയായിരുന്നു നാടിനെ നടുക്കിയ അപകടം. മദ്യലഹരിയിൽ സുഹൈൽ സജീവ് ഓടിച്ച മിനി കൂപ്പർ കാർ മൂന്നുപേർ സഞ്ചരിച്ചിരുന്ന സ്കൂട്ടറിലേക്ക് ഇടിച്ച് കയറുകയായിരുന്നു. സ്കൂട്ടർ യാത്രക്കാരായ വയനാട് സ്വദേശി ദേവിക, പാലക്കാട് സ്വദേശി ഗോപിക, കർണാടക സുള്ള്യ സ്വദേശി ഇയാസ് എന്നിവർ തൽക്ഷണം മരിച്ചു. തൃക്കാക്കരയിലെ ഒരു കരകൗശല വിൽപ്പനശാലയിൽ പാർട്ട് ടൈം ജീവനക്കാരായിരുന്ന ഇവർ, രാത്രിയിൽ സഹപ്രവർത്തകർക്കൊപ്പം ചായ കുടിച്ച് മടങ്ങവെയായിരുന്നു അപകടത്തിൽപ്പെട്ടത്.