കൊച്ചി: അനധികൃതമായി അളവിൽ കൂടുതൽ മദ്യം സൂക്ഷിച്ചെന്ന അബ്കാരി കേസിൽ റിമാൻഡിലായിരുന്ന ആന്റോ അഗസ്റ്റിന് ഹൈക്കോടതി കർശന ഉപാധികളോടെ ജാമ്യം അനുവദിച്ചു. മാനന്തവാടി ജില്ലാ ജയിലിൽ കഴിഞ്ഞിരുന്ന ആന്റോ സമർപ്പിച്ച ഇടക്കാല ജാമ്യാപേക്ഷ ജസ്റ്റിസ് കൗസർ എടപ്പഗത്തിന്റെ നേതൃത്വത്തിലുള്ള ബെഞ്ചാണ് അംഗീകരിച്ചത്. നേരത്തെ സുൽത്താൻ ബത്തേരി ജുഡീഷ്യൽ ഫസ്റ്റ്ക്ലാസ് മജിസ്ട്രേറ്റ് കോടതി ഇയാളുടെ ജാമ്യാപേക്ഷ തള്ളിയിരുന്നു.
വയനാട് വാഴവറ്റയിലുള്ള വീട്ടിൽ എക്സൈസ് നടത്തിയ റെയ്ഡിൽ 138 കുപ്പികളിലായി അനധികൃതമായി സൂക്ഷിച്ച 67 ലിറ്റർ മദ്യമാണ് പിടിച്ചെടുത്തത്. ഇതിൽ 12.75 ലിറ്റർ വ്യാജമദ്യമാണെന്നും പരിശോധനയിൽ വ്യക്തമായിരുന്നു.
പ്രതിഭാഗത്തിന്റെ വാദങ്ങളും എക്സൈസിന്റെ മറുപടിയും:
മദ്യം പിടിച്ചെടുത്ത വീട് തന്റെ പേരിലല്ലെന്നും കേസിൽ കുടുക്കാൻ ഗൂഢാലോചന നടന്നുവെന്നുമാണ് ആന്റോ കോടതിയിൽ വാദിച്ചത്. വീടിന്റെ ഉടമസ്ഥാവകാശത്തെച്ചൊല്ലി തർക്കങ്ങളുണ്ടെന്നും, കോടതിയുടെ അറ്റാച്ച്മെന്റ് പരിഗണനയിലുള്ള കെട്ടിടമായതിനാൽ തനിക്കെതിരെ കേസെടുക്കാനാകില്ലെന്നും പ്രതിഭാഗം ചൂണ്ടിക്കാട്ടി.
എന്നാൽ ഈ വാദങ്ങൾ പൊളിക്കുന്ന തെളിവുകൾ എക്സൈസ് കോടതിയിൽ ഹാജരാക്കി:
- മുട്ടിൽ പഞ്ചായത്തിൽ നിന്നുള്ള രേഖകൾ പ്രകാരം, ഈ കെട്ടിടത്തിന്റെ 2025 വർഷത്തെ നികുതി 2026 മാർച്ചിൽ അടച്ചിട്ടുണ്ട്.
- വീട് നിർമ്മിച്ച് പത്തുവർഷത്തിനുശേഷം 2022-ൽ ഹോംസ്റ്റേ ഉൾപ്പെടെയുള്ള വാണിജ്യാവശ്യങ്ങൾക്കായി ഉപയോഗിക്കാൻ അപേക്ഷ നൽകിയെങ്കിലും പഞ്ചായത്ത് അനുമതി നിഷേധിച്ചിരുന്നു.
- വീട്ടിൽ സ്ഥാപിച്ചിരുന്ന 22 സി.സി.ടി.വി ക്യാമറകളുടെ ദൃശ്യങ്ങളടങ്ങിയ ഡി.വി.ആർ (DVR) എടുത്തുമാറ്റിയ നിലയിലാണെന്ന് എക്സൈസ് കണ്ടെത്തിയിട്ടുണ്ട്.
- ദുരന്തനിവാരണ അതോറിറ്റിയുടെ മാനദണ്ഡങ്ങൾ പൂർണ്ണമായും ലംഘിച്ചാണ് വാഴവറ്റയിലെ ഈ വീട് നിർമ്മിച്ചിരിക്കുന്നതെന്നും എക്സൈസ് കോടതിയെ അറിയിച്ചു.
+ There are no comments
Add yours