ഹിമാചൽ പ്രദേശ്: സമുദ്രനിരപ്പിൽ നിന്ന് ഏകദേശം 13,050 അടി ഉയരത്തിൽ സ്ഥിതിചെയ്യുന്ന ഹിമാചൽ പ്രദേശിലെ റോഹ്താങ് പാസിലുള്ള ഒരു ചെറിയ ചായക്കടയാണ് ഇപ്പോൾ സമൂഹമാധ്യമങ്ങളിലെ ചർച്ചാവിഷയം. വെറും ചായയും മാഗിയും വിറ്റ് പ്രതിദിനം 15,000 രൂപ വരെ വരുമാനം നേടുന്ന ഈ കടയുടെ വിശേഷങ്ങൾ അതിവേഗം വൈറലാകുകയാണ്.
കണ്ടന്റ് ക്രിയേറ്ററായ ഹർഷ് ചൗഹാൻ തന്റെ യാത്രയ്ക്കിടെ ഇൻസ്റ്റഗ്രാമിൽ പങ്കുവെച്ച വീഡിയോയിലൂടെയാണ് കടയിലെ വരുമാനക്കണക്കുകൾ പുറത്തുവന്നത്. ചായയും മാഗിയും കഴിക്കുന്നതിനിടെ കടയുടമയുമായി സംസാരിച്ചപ്പോഴാണ് ഞെട്ടിക്കുന്ന ഈ വിവരങ്ങൾ അദ്ദേഹം വെളിപ്പെടുത്തിയത്.
ഒരു പ്ലേറ്റ് മാഗിക്ക് 100 രൂപയാണ് ഇവിടെ ഈടാക്കുന്നത്. പ്രതിദിനം 60 മുതൽ 70 പ്ലേറ്റ് മാഗി വരെ വിറ്റുപോകുന്നുണ്ടെന്നും, ഇതിലൂടെ മാത്രം 6,000 മുതൽ 7,000 രൂപ വരെ ലഭിക്കാറുണ്ടെന്നും കടക്കാരൻ പറയുന്നു. ഒരു കപ്പ് ചായയുടെ വില 40 രൂപയാണ്. ദിവസം ശരാശരി 200 കപ്പ് ചായ വിൽക്കുന്നതിലൂടെ 8,000 രൂപ വേറെയും ലഭിക്കും. ഇതിനുപുറമെ പുഴുങ്ങിയ മുട്ട വിൽപനയിൽ നിന്നുള്ള വരുമാനവും കൂടിയാകുമ്പോൾ പ്രതിദിന കളക്ഷൻ 14,000 മുതൽ 15,000 രൂപ വരെയെത്തും.
വിനോദസഞ്ചാരികളുടെ തിരക്ക് കുറഞ്ഞ സമയത്തെ (ഓഫ് സീസൺ) കണക്കുകളാണിത് എന്നതാണ് ഏറ്റവും ശ്രദ്ധേയം. സീസൺ ആരംഭിക്കുകയും സഞ്ചാരികളുടെ എണ്ണം വർധിക്കുകയും ചെയ്യുന്നതോടെ വരുമാനം ഇതിന്റെ പലമടങ്ങാകുമെന്നാണ് വ്യക്തമാകുന്നത്.
+ There are no comments
Add yours