തിരുവനന്തപുരം: ജഡ്ജിയുടെ മകനായാലും നിയമം എല്ലാവർക്കും ഒന്നുതന്നെയാണെന്നും, ചേരാനല്ലൂർ വാഹനാപകട കേസിൽ വീഴ്ച വരുത്തിയ പൊലീസുകാർക്കെതിരെ ഇന്ന് തന്നെ കർശന നടപടിയുണ്ടാകുമെന്നും ആഭ്യന്തരമന്ത്രി രമേശ് ചെന്നിത്തല. നിയമസഭയിൽ വിഷയം ഉന്നയിച്ച് സംസാരിക്കുകയായിരുന്നു അദ്ദേഹം. സംഭവത്തിൽ സർക്കാരിന് ഒന്നും ഒളിക്കാനില്ലെന്നും, പണക്കാരോ സ്വാധീനമുള്ളവരോ കേസിൽ ഇടപെടാൻ സർക്കാർ അനുവദിക്കില്ലെന്നും അദ്ദേഹം വ്യക്തമാക്കി.
അപകടം നടന്നയുടൻ സ്ഥലം എം.എൽ.എ വിളിച്ച് വിവരം അറിയിച്ചിരുന്നു. അപ്പോൾ തന്നെ പൊലീസിന്റെ ഭാഗത്ത് വീഴ്ചയുണ്ടായെന്ന് ബോധ്യമായി. ദുർബല വകുപ്പുകൾ ചുമത്തി പ്രതിക്ക് ജാമ്യം നൽകിയതെന്തുകൊണ്ടാണെന്ന് ഡി.ജി.പിയോട് ചോദിച്ചിട്ടുണ്ട്. പൊലീസ് തെറ്റ് ചെയ്താൽ അതിനെ കണ്ണടച്ച് ന്യായീകരിക്കാൻ സർക്കാരിന് യാതൊരു ബാധ്യതയുമില്ല. അന്നന്നത്തെ ആഹാരത്തിന് വേണ്ടി കഷ്ടപ്പെടുന്ന ഒരു പാവപ്പെട്ട മനുഷ്യനാണ് അപകടത്തിൽ മരിച്ചത്. ആ കുടുംബത്തിന്റെ ആവശ്യങ്ങൾ പൂർണ്ണമായും അംഗീകരിച്ചതിനാലാണ് അവർ സമരം അവസാനിപ്പിച്ചത്.
വാഹനം ഓടിച്ച 17-കാരന് ജുവനൈൽ മജിസ്‌ട്രേറ്റ് ഒരു കാരണവശാലും ജാമ്യം അനുവദിക്കരുത്. ജഡ്ജിയുടെ പേരിൽ നടപടിയെടുക്കാൻ സർക്കാരിന് പരിമിതികളുണ്ട്, എന്നാൽ വാഹന ഉടമയ്ക്കെതിരെ കേസെടുത്തിട്ടുണ്ട്. ഇക്കാര്യം ഹൈക്കോടതി രജിസ്ട്രാറെ രേഖാമൂലം അറിയിച്ചിട്ടുമുണ്ട്. ജഡ്ജിയാണെങ്കിലും ഔദ്യോഗിക കാര്യങ്ങൾക്കല്ലാതെ പൊലീസ് സ്റ്റേഷനിൽ പോകാൻ പാടില്ല. സ്റ്റേഷനിലെത്തിയ ജഡ്ജിയുടെ പെരുമാറ്റം വളരെ മോശമായിരുന്നുവെന്നും മന്ത്രി സഭയിൽ ചൂണ്ടിക്കാട്ടി.
അതേസമയം, നെടുമ്പാശേരി വാഹനാപകടത്തിൽ പൊലീസ് വളരെ വേഗത്തിൽ ഇടപെട്ട് കർശന നടപടികളാണ് സ്വീകരിച്ചതെന്ന് മന്ത്രി ഓർമ്മിപ്പിച്ചു. നാല് ബാറുകളിൽ നിന്ന് മദ്യപിച്ച പ്രതിയുടെ അമിതവേഗതയിലുള്ള ദൃശ്യങ്ങൾ ഉൾപ്പെടെ പൊലീസ് ശേഖരിച്ചു. നിശാന്തിനി ഐ.പി.എസിനാണ് ഇതിന്റെ അന്വേഷണച്ചുമതല. കേസിൽ പ്രതിക്കിതുവരെ ജാമ്യം ലഭിച്ചിട്ടില്ല. ഈ കേസിൽ ഒരു എം.എൽ.എയും ഇടപെട്ടിട്ടുമില്ല. സർക്കാരിന് അധികാരമേറ്റ് വെറും അഞ്ച് മാസം കൊണ്ട് കേരള പൊലീസിനെ കുഴപ്പക്കാരുടെ സേനയാക്കി മാറ്റാൻ താൻ നേതൃത്വം നൽകിയെന്ന എ.സി. മൊയ്തീന്റെ വിമർശനം ഏറെ വേദനിപ്പിച്ചുവെന്നും, അദ്ദേഹം അങ്ങനെ പറയാൻ പാടില്ലായിരുന്നുവെന്നും രമേശ് ചെന്നിത്തല സഭയിൽ കൂട്ടിച്ചേർത്തു. തെറ്റ് ചെയ്യുന്നവരെ സംരക്ഷിക്കുന്ന നിലപാട് ഈ സർക്കാരിനില്ലെന്നും അദ്ദേഹം വ്യക്തമാക്കി.
+ There are no comments
Add yours