കൊച്ചി: കേരളത്തെ ഒന്നാകെ നടുക്കിയ നെടുമ്പാശ്ശേരി മിനികൂപ്പർ വാഹനാപകടക്കേസിൽ മുഖ്യപ്രതി സുഹൈൽ സജീവ് ഉൾപ്പെടെ നാല് പ്രതികൾക്കും കോടതി ജാമ്യം നിഷേധിച്ചു. നാലുപേരുടെയും ജാമ്യാപേക്ഷ എറണാകുളം അഡീഷണൽ സെഷൻസ് കോടതിയാണ് തള്ളിയത്.
പ്രതികളുടെ കസ്റ്റഡി കാലാവധി പൂർത്തിയായെന്നും, ഇനിയും ഇവരെ കസ്റ്റഡിയിൽ തുടരാൻ അനുവദിക്കുന്നത് തെറ്റായ സന്ദേശം നൽകുമെന്നുമായിരുന്നു പ്രതിഭാഗത്തിന്റെ പ്രധാന വാദം. എന്നാൽ അപകടസമയത്ത് സുഹൈൽ അമിതമായി മദ്യപിച്ചിരുന്നതായും വളരെ അമിതവേഗതയിലാണ് വാഹനം ഓടിച്ചതെന്നും ചൂണ്ടിക്കാട്ടിയ പ്രോസിക്യൂഷൻ ജാമ്യാപേക്ഷയെ ശക്തമായി എതിർത്തു.
മൂന്ന് യുവാക്കളുടെ ജീവൻ അപഹരിച്ച ഈ ദാരുണമായ അപകടത്തിന് കാരണക്കാരൻ സുഹൈലാണെന്ന് വ്യക്തമാക്കുന്ന സുഹൃത്തിന്റെ ശബ്ദസന്ദേശം ഉൾപ്പെടെയുള്ള നിർണ്ണായക തെളിവുകൾ പ്രോസിക്യൂഷൻ കോടതിക്ക് മുൻപാകെ ഹാജരാക്കിയിരുന്നു. ഇരുഭാഗത്തെയും വാദമുഖങ്ങളും തെളിവുകളും വിശദമായി പരിശോധിച്ച ശേഷമാണ് കോടതി പ്രതികൾക്ക് ജാമ്യം നിഷേധിച്ചത്.
+ There are no comments
Add yours