മലപ്പുറം ജില്ലയെക്കുറിച്ച് വിവാദ പരാമർശവുമായി പൊന്നാനി മുൻ എം.എൽ.എയും സി.പി.എം നേതാവുമായ പി. നന്ദകുമാർ. സി.പി.എം വിപുലീകൃത ജില്ലാ കമ്മിറ്റി യോഗത്തിൽ സ്വാഗതം ആശംസിച്ചു സംസാരിക്കവേ, മലപ്പുറം ജില്ല ‘മതമൗലിക വർഗീയവാദികളുടെ കൂടാണ്’ എന്ന് അദ്ദേഹം വിശേഷിപ്പിച്ചു. മുഖ്യമന്ത്രി പിണറായി വിജയൻ, കെ.കെ. ശൈലജ എന്നിവർ ഉൾപ്പെടെയുള്ള മുതിർന്ന നേതാക്കളുടെ സാന്നിധ്യത്തിലായിരുന്നു നന്ദകുമാറിന്റെ ഈ പ്രസ്താവന.
പാർട്ടിയുടെ ജില്ലാതല സംഘടനാ പ്രവർത്തനങ്ങളും ഭാവി നിലപാടുകളും ചർച്ച ചെയ്യാനായി വിളിച്ചുകൂട്ടിയ യോഗത്തിലായിരുന്നു വിവാദ പരാമർശം. മലപ്പുറത്തെ സവിശേഷ സാഹചര്യങ്ങളെക്കുറിച്ചും ഇത്തരം ശക്തികളെ പ്രതിരോധിച്ച് മതനിരപേക്ഷ പ്രസ്ഥാനങ്ങളെ ഏകോപിപ്പിച്ചു മുന്നോട്ടു പോകേണ്ടതിനെക്കുറിച്ചും സംസാരിക്കുന്നതിനിടയിലാണ് അദ്ദേഹം ഈ വാക്ക് ഉപയോഗിച്ചത്.
വർഗീയ നിലപാടുകളെ ചെറുത്ത് മുന്നേറാൻ കമ്മ്യൂണിസ്റ്റ് പാർട്ടി പുതിയ കാലത്ത് രാഷ്ട്രീയ കടമകൾ എങ്ങനെ നിർവ്വഹിക്കണമെന്ന് പരിശോധിക്കാനാണ് വിപുലീകൃത യോഗം ചേരുന്നതെന്നും അദ്ദേഹം കൂട്ടിച്ചേർത്തു. അതേസമയം, മുതിർന്ന നേതാക്കൾ പങ്കെടുക്കുന്ന പൊതുവേദിയിൽ ജില്ലയെ മുഴുവനായി അധിക്ഷേപിക്കുന്ന തരത്തിൽ സംസാരിച്ചത് വരും ദിവസങ്ങളിൽ വലിയ രാഷ്ട്രീയ ചർച്ചകൾക്ക് വഴിതുറന്നേക്കും.
+ There are no comments
Add yours