ന്യൂഡൽഹി: മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ രാജിവെക്കണമെന്ന ആവശ്യമുയർത്തി പ്രക്ഷോഭം ശക്തമാക്കാൻ ഡി.വൈ.എഫ്.ഐയും എസ്.എഫ്.ഐയും. ഇതിന്റെ ഭാഗമായി ഒക്ടോബർ 9-ന് രാജ്യത്തെ പ്രധാന നഗരങ്ങളിൽ ഇരു സംഘടനകളും പ്രതിഷേധം സംഘടിപ്പിക്കും. വരും ദിവസങ്ങളിൽ ഇത് രാജ്യവ്യാപക പ്രക്ഷോഭമായി മാറ്റാനാണ് തീരുമാനം. ജനാധിപത്യം സംരക്ഷിക്കാൻ ഏതറ്റം വരെയും പോകുമെന്ന് വ്യക്തമാക്കിയ സംഘടനകൾ, സി.ജെ.പി (CJP) സമരത്തിനും ഒക്ടോബർ 10-ന് ജന്തർ മന്തറിലേക്ക് നടത്തുന്ന മാർച്ചിനും പൂർണ്ണ പിന്തുണ പ്രഖ്യാപിച്ചു. പോലീസ് തങ്ങളെ എവിടെ തടയുന്നുവോ അവിടം ജന്തർ മന്തറാക്കി മാറ്റുമെന്ന് നേതാവ് അഭിജിത്ത് ദീപ്കെ മുന്നറിയിപ്പ് നൽകി.
അതിനിടെ, പ്രതിഷേധക്കാർക്ക് നേരെ ഡൽഹി പോലീസ് ക്രൂരമായ മർദ്ദനമാണ് അഴിച്ചുവിടുന്നതെന്ന് ആം ആദ്മി പാർട്ടിയും (AAP) ഐസയും (AISA) ആരോപിച്ചു. കഴിഞ്ഞ ദിവസം മാത്രം 1,100 പേരെയാണ് പോലീസ് കസ്റ്റഡിയിലെടുത്തത്. അറസ്റ്റ് ചെയ്ത് വാഹനത്തിൽ കയറ്റുന്നതിനിടെ ഒരു യുവാവിന്റെ മുഖത്ത് പോലീസ് ഉദ്യോഗസ്ഥൻ മർദ്ദിക്കുന്ന ദൃശ്യങ്ങൾ എ.എ.പി പുറത്തുവിട്ടിട്ടുണ്ട്.
ഇതിനിടെ ചൊവ്വാഴ്ച തിരഞ്ഞെടുപ്പ് കമ്മീഷൻ ആസ്ഥാനത്തേക്ക് പ്രതിപക്ഷ സഖ്യം മാർച്ച് പ്രഖ്യാപിച്ചിട്ടുണ്ട്. രാജ്യവ്യാപകമായി നടക്കുന്ന ഇത്തരം പ്രതിഷേധങ്ങളെ ഏകോപിപ്പിക്കുന്നതിനായി ‘സത്യാഗ്രഹ’ എന്ന പേരിൽ കോൺഗ്രസ് പുതിയൊരു വെബ് പോർട്ടലിന് തുടക്കം കുറിച്ചു. രാജ്യത്ത് നടക്കുന്ന ചെറുതും വലുതുമായ എല്ലാ ജനാധിപത്യ പ്രതിഷേധ പരിപാടികളും ഈ പോർട്ടൽ വഴി രജിസ്റ്റർ ചെയ്യാമെന്ന് കോൺഗ്രസ് നേതാവ് രാഹുൽ ഗാന്ധി അറിയിച്ചു.
+ There are no comments
Add yours