‘സ്വകാര്യ പരാതിയിലെ കേസ് നിലനിൽക്കില്ല, ഇ.ഡിയുടേത് അധികാര ദുർവിനിയോഗം’; നാഷണൽ ഹെറാൾഡ് കേസിൽ സോണിയയും രാഹുലും ഹൈക്കോടതിയിൽ

ന്യൂഡൽഹി: നാഷണൽ ഹെറാൾഡ് കേസിൽ എൻഫോഴ്‌സ്‌മെന്റ് ഡയറക്ടറേറ്റിനെതിരെ (ഇ.ഡി) രൂക്ഷവിമർശനവുമായി കോൺഗ്രസ് നേതാക്കളായ സോണിയാ ഗാന്ധിയും രാഹുൽ ഗാന്ധിയും. ഒരു സ്വകാര്യ വ്യക്തിയുടെ പരാതിയുടെ അടിസ്ഥാനത്തിൽ രജിസ്റ്റർ ചെയ്ത കേസ് നിയമപരമായി നിലനിൽക്കില്ലെന്നും, ഇ.ഡി തങ്ങളുടെ അധികാരവും നിയമനടപടികളും ദുരുപയോഗം ചെയ്യുകയാണെന്നും ചൂണ്ടിക്കാട്ടി ഇരുവരും ഡൽഹി ഹൈക്കോടതിയിൽ സത്യവാങ്മൂലം സമർപ്പിച്ചു.

സ്വകാര്യ പരാതിയിലെ അന്വേഷണം:

രാജ്യത്തിന്റെ ചരിത്രത്തിൽ ആദ്യമായാണ് ഒരു സ്വകാര്യ പരാതിയുടെ അടിസ്ഥാനത്തിൽ ഇ.ഡി കള്ളപ്പണം വെളുപ്പിക്കൽ നിരോധന നിയമപ്രകാരം അന്വേഷണവുമായി മുന്നോട്ടുപോകുന്നതെന്ന് സോണിയാ ഗാന്ധിയും രാഹുൽ ഗാന്ധിയും സത്യവാങ്മൂലത്തിൽ വ്യക്തമാക്കി. മുൻ കേന്ദ്രമന്ത്രി സുബ്രഹ്മണ്യൻ സ്വാമി നൽകിയ പരാതിയുടെ അടിസ്ഥാനത്തിലാണ് തങ്ങൾക്കെതിരെ ഇ.ഡി എൻഫോഴ്‌സ്‌മെൻ്റ് കേസ് ഇൻഫർമേഷൻ റിപ്പോർട്ട് (ECIR) രജിസ്റ്റർ ചെയ്തത്. നിയമപ്രകാരം ഈ നടപടി ഒട്ടും അനുവദനീയമല്ലെന്നാണ് നേതാക്കളുടെ വാദം.

നടപടി ഏഴ് വർഷത്തിന് ശേഷം:

2014-ലാണ് സുബ്രഹ്മണ്യൻ സ്വാമി ഈ വിഷയത്തിൽ സ്വകാര്യ പരാതി നൽകിയത്. എന്നാൽ അന്ന് ഇ.ഡി കേസ് (ECIR) രജിസ്റ്റർ ചെയ്തിരുന്നില്ല. പരാതി ലഭിച്ച് ഏകദേശം ഏഴ് വർഷങ്ങൾക്ക് ശേഷം, 2021 ജൂൺ 30-നാണ് തങ്ങൾക്കെതിരെ ഇ.സി.ഐ.ആർ രജിസ്റ്റർ ചെയ്തതെന്നും ഇരുവരും ചൂണ്ടിക്കാട്ടുന്നു. അടിസ്ഥാനരഹിതമായ ആരോപണങ്ങളിൽ കേന്ദ്ര ഏജൻസി സ്വീകരിക്കുന്ന ഇത്തരം നടപടികൾ നിയമവിരുദ്ധമാണെന്നാണ് ഡൽഹി ഹൈക്കോടതിയിൽ നൽകിയ മറുപടിയിൽ ഗാന്ധി കുടുംബം വ്യക്തമാക്കുന്നത്.