ന്യൂഡൽഹി: ശബരിമല മണ്ഡലകാല ഒരുക്കങ്ങളിൽ അലംഭാവമുണ്ടെന്ന ദേവസ്വം മന്ത്രി കെ. മുരളീധരന്റെ ആരോപണങ്ങൾക്ക് മറുപടിയുമായി തിരുവിതാംകൂർ ദേവസ്വം ബോർഡ് പ്രസിഡന്റ് കെ. ജയകുമാർ രംഗത്ത്. ഒരുക്കങ്ങളിൽ യാതൊരുവിധ വൈകലോ വീഴ്ചയോ ഉണ്ടായിട്ടില്ലെന്നും, കൃത്യമായ പദ്ധതിയുടെ അടിസ്ഥാനത്തിലാണ് എല്ലാ പ്രവർത്തനങ്ങളും മുന്നോട്ട് പോകുന്നതെന്നും അദ്ദേഹം വ്യക്തമാക്കി. സർക്കാരുമായി ഒരു ഏറ്റുമുട്ടലിന് ഇല്ലെന്ന് വ്യക്തമാക്കിയ അദ്ദേഹം, ഭഗവാൻ ഏൽപ്പിച്ച ദൗത്യം കാലാവധി പൂർത്തിയാകും വരെ നിർവഹിക്കുമെന്നും അറിയിച്ചു.
അരവണ ക്ഷാമവും നിർമ്മാണ പ്രവർത്തനങ്ങളും: പ്രതീക്ഷിച്ചതിലും കൂടുതൽ ഭക്തർ ദർശനത്തിന് എത്തിയതാണ് കഴിഞ്ഞ തവണ അരവണ ക്ഷാമത്തിന് ഇടയാക്കിയത്. വരാനിരിക്കുന്ന മണ്ഡലകാലത്തിന് മുൻപായി അരവണ ഉൽപ്പാദനം വർദ്ധിപ്പിക്കാനുള്ള നടപടികൾ നടന്നുവരികയാണ്. നട അടച്ചിരിക്കുന്ന ചുരുങ്ങിയ സമയം കൊണ്ട് പ്ലാന്റിന്റെ അറ്റകുറ്റപ്പണികൾ പൂർത്തിയാക്കുക അസാധ്യമാണ്. എങ്കിലും ഒക്ടോബർ 10-ഓടെ അറ്റകുറ്റപ്പണികൾ പൂർത്തിയാകുമെന്നാണ് പ്രതീക്ഷിക്കുന്നത്. ഇതിനുപുറമെ ഡിജിറ്റലൈസേഷൻ, മറ്റ് മരാമത്ത് പണികൾ എന്നിവയും ത്വരിതഗതിയിൽ പുരോഗമിക്കുകയാണ്. ദേവസ്വം ബോർഡ് ചെയ്യുന്ന കാര്യങ്ങൾ ഭക്തരെ കൃത്യമായി അറിയിക്കുന്നുണ്ടെന്നും അദ്ദേഹം കൂട്ടിച്ചേർത്തു.
മാധ്യമ വാർത്തകൾ ശ്രദ്ധിക്കുന്നുണ്ടെങ്കിലും തനിക്കെതിരെ ബോധപൂർവ്വമായ സംഘടിത നീക്കം നടക്കുന്നതായി കരുതുന്നില്ലെന്ന് ജയകുമാർ പറഞ്ഞു. കൂടാതെ, മണ്ഡലകാല പ്രവർത്തനങ്ങൾക്കായി സർക്കാർ പ്രത്യേക സംഘത്തെ നിയമിക്കുമെന്ന വാർത്തകളെക്കുറിച്ച് തനിക്ക് യാതൊരറിവുമില്ലെന്നും അദ്ദേഹം വ്യക്തമാക്കി
+ There are no comments
Add yours