ഫ്രീ വൈഫൈയും സ്വകാര്യതയും; മണിക്കൂറിന് വെറും 99 രൂപയ്ക്ക് എ.സി സ്ലീപ്പിംഗ് പോഡുകൾ, ആലുവയിലും എറണാകുളത്തും പുതിയ സൗകര്യം വരുന്നു

Estimated read time 0 min read

കൊച്ചി: ട്രെയിൻ യാത്രക്കാർക്ക് ആശ്വാസമായി കേരളത്തിലെ റെയിൽവേ സ്റ്റേഷനുകളിൽ കുറഞ്ഞ നിരക്കിൽ വിശ്രമിക്കാൻ എ.സി സ്ലീപ്പിംഗ് പോഡുകൾ വരുന്നു. മണിക്കൂറിന് വെറും 99 രൂപ നിരക്കിലാണ് ഫ്രീ വൈഫൈയും സ്വകാര്യതയും ഉറപ്പാക്കുന്ന ഈ ആധുനിക സൗകര്യം യാത്രക്കാർക്കായി ഒരുക്കുന്നത്. സംസ്ഥാനത്തെ രണ്ട് പ്രധാന റെയിൽവേ സ്റ്റേഷനുകളായ ആലുവ, എറണാകുളം ജംഗ്ഷൻ എന്നിവിടങ്ങളിലാണ് പുതിയ പദ്ധതി നടപ്പിലാക്കുന്നത്.

കാത്തിരിപ്പ് ഇനി സുഖകരമാകും

ദീർഘദൂര യാത്രകൾക്കായി റെയിൽവേ സ്റ്റേഷനുകളിൽ നേരത്തെ എത്തുന്നവർക്കും, ട്രെയിനുകൾ വൈകുമ്പോൾ കാത്തിരിക്കേണ്ടി വരുന്നവർക്കും ഏറെ പ്രയോജനകരമാകുന്നതാണ് ഈ സംവിധാനം. മിതമായ നിരക്കിൽ സുഖമായി വിശ്രമിക്കാനുള്ള സൗകര്യത്തിന് പുറമെ സൗജന്യ വൈഫൈയും ഈ എ.സി സ്ലീപ്പിംഗ് പോഡുകളിൽ ലഭ്യമായിരിക്കും.

ആലുവയിലും എറണാകുളത്തും സജ്ജീകരണങ്ങൾ ഇങ്ങനെ

ആലുവ റെയിൽവേ സ്റ്റേഷന് സമീപമുള്ള കെ.എസ്.ആർ.ടി.സി ബസ് സ്റ്റാൻഡിന് എതിർവശത്തെ റെയിൽവേ ഭൂമിയിലാണ് പുതിയ എക്സിക്യൂട്ടീവ് ലോഞ്ചും സ്ലീപ്പിംഗ് പോഡുകളും നിർമ്മിക്കാൻ പദ്ധതിയിടുന്നത്. ഏകദേശം 10,000 ചതുരശ്രയടി വിസ്തീർണമുള്ള രണ്ട് നില കെട്ടിടമായിരിക്കും ഇവിടെ നിർമ്മിക്കുക. ഇതിനായി ദക്ഷിണ റെയിൽവേ ഇതിനോടകം ടെൻഡർ ക്ഷണിച്ചിട്ടുണ്ട്. എറണാകുളം ജംഗ്ഷൻ റെയിൽവേ സ്റ്റേഷനിൽ നിലവിലുള്ള എ.സി വെയിറ്റിംഗ് റൂമിന് മുകളിലായാണ് പുതിയ എ.സി സ്ലീപ്പിംഗ് പോഡുകൾ സജ്ജീകരിക്കുക.

+ There are no comments

Add yours