സംസ്ഥാനത്ത് ഉള്ളിവിലയ്ക്ക് പിന്നാലെ മുട്ടവിലയും കുതിച്ചുയരുന്നു. നേരത്തെ അഞ്ച് രൂപയ്ക്ക് ലഭിച്ചിരുന്ന കോഴിമുട്ടയ്ക്ക് ഒറ്റയടിക്ക് വലിയ വിലവർധനയാണ് ഉണ്ടായിരിക്കുന്നത്. ചില്ലറ വിപണിയിൽ നിലവിൽ എട്ടു മുതൽ പത്ത് രൂപ വരെയാണ് ഒരു മുട്ടയുടെ വില. നാടൻ കോഴിമുട്ടയുടെ വിലയും കുത്തനെ ഉയർന്നതോടെ സാധാരണക്കാരുടെ കുടുംബബജറ്റിന് ഇത് വലിയ തിരിച്ചടിയായിരിക്കുകയാണ്.
കോഴിത്തീറ്റയുടെ വിലയിലുണ്ടായ വർധനയാണ് മുട്ടവില ഇത്രയധികം ഉയരാനുള്ള പ്രധാന കാരണം. എഥനോൾ നിർമാണത്തിനായി ചോളം വ്യാപകമായി ഉപയോഗിക്കുന്ന കേന്ദ്ര നയമാണ് ഇതിന് വഴിവെച്ചത്. അസംസ്കൃത വസ്തുവായ ചോളത്തിന്റെ ലഭ്യത കുറഞ്ഞതോടെ കോഴിത്തീറ്റയുടെ വിലയും കുത്തനെ ഉയർന്നു. നേരത്തെ 1,800 മുതൽ 2,000 രൂപ വരെ വിലയുണ്ടായിരുന്ന ഒരു ചാക്ക് കോഴിത്തീറ്റയ്ക്ക് ഇപ്പോൾ 2,760 രൂപ നൽകേണ്ട അവസ്ഥയാണ്.
ഉൽപ്പാദനച്ചെലവിലുണ്ടായ ഈ വർധന ചെറുകിട കോഴിക്കർഷകരെ കടുത്ത പ്രതിസന്ധിയിലാക്കിയിട്ടുണ്ട്. തീറ്റവിലയിലെ ഈ അധിക ബാധ്യതയാണ് സ്വാഭാവികമായും മുട്ടവിലയിലും പ്രതിഫലിക്കുന്നത്. ഉള്ളിക്കും മുട്ടയ്ക്കും ഉൾപ്പെടെ നിത്യോപയോഗ സാധനങ്ങൾക്ക് വില കുതിച്ചുയരുന്നത് സാധാരണക്കാരുടെ ജീവിതച്ചെലവ് വലിയ തോതിൽ വർധിപ്പിക്കുകയാണ്.
+ There are no comments
Add yours