തിരുവനന്തപുരം: കിഫ്ബിയുമായി ബന്ധപ്പെട്ട് കണ്ണൂരിൽ നടന്ന വിവാദ ഭൂമി ഏറ്റെടുക്കലിലെ ക്രമക്കേടുകൾ അന്വേഷിക്കാൻ വിപുലമായ വിജിലൻസ് സംഘത്തെ നിയോഗിച്ചു. ഡി.ഐ.ജി തോംസൺ ജോസാണ് അന്വേഷണത്തിന് നേതൃത്വം നൽകുന്നത്. വിജിലൻസിന്റെ ചരിത്രത്തിൽ തന്നെ ഏറ്റവും ഉയർന്ന തുക ഉൾപ്പെടുന്ന കേസാണിത്. ഇതുമായി ബന്ധപ്പെട്ട രേഖകൾ ആവശ്യപ്പെട്ട് അന്വേഷണ സംഘം ഉടൻ തന്നെ കിഫ്ബിക്ക് കത്ത് നൽകും.
ഭൂമി ഏറ്റെടുക്കലിൽ നിയമപരമായ നടപടിക്രമങ്ങൾ പാലിച്ചിട്ടുണ്ടോ, ഭൂമിയുടെ മൂല്യനിർണ്ണയത്തിൽ അട്ടിമറി നടന്നിട്ടുണ്ടോ, ഇതിന് പിന്നിൽ വല്ല റിയൽ എസ്റ്റേറ്റ് താല്പര്യങ്ങളും പ്രവർത്തിച്ചിട്ടുണ്ടോ തുടങ്ങിയ കാര്യങ്ങളാകും സംഘം പ്രധാനമായും അന്വേഷിക്കുക. കണ്ണൂരിൽ 12,240 കോടി രൂപ മുടക്കി 4,896 ഏക്കർ ഭൂമി ഏറ്റെടുത്തതുമായി ബന്ധപ്പെട്ടാണ് പ്രധാനമായും ക്രമക്കേട് ആരോപണം ഉയർന്നിട്ടുള്ളത്.
മുൻ ഉദ്യോഗസ്ഥ സുധാ പിള്ള അധ്യക്ഷയായ വിദഗ്ധ സമിതി നൽകിയ ശുപാർശയുടെ അടിസ്ഥാനത്തിലാണ് ഇപ്പോൾ വിജിലൻസ് അന്വേഷണം പ്രഖ്യാപിച്ചിരിക്കുന്നത്. കണ്ണൂർ പട്ടാനൂർ പണയത്തുപറമ്പിൽ വ്യവസായ മേഖല സ്ഥാപിക്കുന്നതിനായി 1,000 ഏക്കർ ഏറ്റെടുക്കുമെന്ന 2016–17 ലെ ബജറ്റ് പ്രഖ്യാപനത്തിന്റെ മറവിലായിരുന്നു ഈ ഇടപാടുകൾ നടന്നത്. ആദ്യം 1,000 ഏക്കറോളം ഭൂമി വാങ്ങിയതിലും, പിന്നീട് കൂടുതൽ ഭൂമി ഏറ്റെടുക്കാൻ ശ്രമിച്ചതിലും വലിയ അഴിമതി നടന്നതായി വി.ഡി. സതീശൻ ഉൾപ്പെടെയുള്ളവർ ആരോപിച്ചിരുന്നു. കൂടാതെ, കിഫ്ബി വായ്പകൾക്ക് സർക്കാർ ഗ്യാരണ്ടി ആവശ്യമില്ലെന്ന ധനവകുപ്പിന്റെ നിർദേശം മറികടന്നത് ചട്ടലംഘനമാണെന്നും ചൂണ്ടിക്കാണിക്കപ്പെട്ടിരുന്നു.
+ There are no comments
Add yours