സ്മാർട്ട് നഴ്സറികൾ: കുഞ്ഞുങ്ങളുടെ മുറിയിലെ എ.ഐ സാങ്കേതികവിദ്യ മാതാപിതാക്കൾക്ക് തുണയോ അതോ തലവേദനയോ?

കാലം മാറി, അതോടൊപ്പം കുട്ടികളെ വളർത്തുന്ന രീതികളും. പണ്ട് കുഞ്ഞുങ്ങളുടെ മുറിയിൽ മൃദുവായ കളിപ്പാട്ടങ്ങളും തൊട്ടിലുകളും മാത്രമായിരുന്നെങ്കിൽ, ഇന്നതൊരു ഹൈടെക് ലോകമാണ്. കുഞ്ഞുങ്ങളുടെ ഓരോ അനക്കവും നിരീക്ഷിക്കുന്ന സ്മാർട്ട് ക്രിബ് മോണിറ്ററുകൾ , ആരോഗ്യ വിവരങ്ങൾ കൃത്യമായി നൽകുന്ന വെയറബിൾ റിംഗുകൾ, വീട്ടുജോലികൾ എളുപ്പമാക്കുന്ന എ.ഐ സാങ്കേതികവിദ്യകൾ തുടങ്ങി നൂതന സംവിധാനങ്ങളുടെ വലിയൊരു നിര തന്നെ ഇന്ന് മാതാപിതാക്കൾക്ക് സഹായത്തിനുണ്ട്. കുട്ടികളെ വളർത്തുക എന്നത് ഒരു വെല്ലുവിളിയായി മാറിയ ഇന്നത്തെ തിരക്കുപിടിച്ച ജീവിതത്തിൽ ഈ സാങ്കേതികവിദ്യകൾ വലിയൊരു ആശ്വാസമാണ്. എന്നാൽ ഈ അതിനൂതന ഉപകരണങ്ങൾ യഥാർത്ഥത്തിൽ മാതാപിതാക്കളുടെ ജോലിഭാരം കുറയ്ക്കുകയാണോ അതോ അവരിൽ അനാവശ്യ ഉത്കണ്ഠയും (Parental Anxiety) ഭയവും സൃഷ്ടിക്കുകയാണോ? സാങ്കേതികവിദ്യകൾ എവിടെയാണ് സഹായിക്കുന്നതെന്നും എവിടെയാണ് പ്രതിസന്ധിയാകുന്നതെന്നും പരിശോധിക്കാം.

എ.ഐ: മാതാപിതാക്കളുടെ പുതിയ ‘പേഴ്സണൽ അസിസ്റ്റന്റ്’

ആർട്ടിഫിഷ്യൽ ഇന്റലിജൻസ് എന്നത് ഇന്ന് ഐ.ടി മേഖലയിൽ മാത്രം ഒതുങ്ങിനിൽക്കുന്ന ഒന്നല്ല; അനേകം വീടുകളിൽ മാതാപിതാക്കളുടെ ഉറ്റ സഹായിയായി എ.ഐ മാറിക്കഴിഞ്ഞു. പ്രത്യേകിച്ച്, ജോലിക്ക് പോകുന്ന അമ്മമാർക്കും അച്ഛന്മാർക്കും സമയക്രമീകരണം എന്നത് വലിയൊരു കടമ്പയാണ്. ഇതിന് പരിഹാരമായി ഇന്ന് പലരും ചാറ്റ്ജിപിടി പോലുള്ള എ.ഐ ടൂളുകളെയാണ് ആശ്രയിക്കുന്നത്. കുട്ടികൾക്കുള്ള പോഷകസമൃദ്ധമായ പ്രതിവാര ഭക്ഷണ മെനു തയ്യാറാക്കാൻ ഇന്ന് എ.ഐ നിമിഷങ്ങൾ മാത്രം മതി. ഫ്രിഡ്ജിലുള്ള പച്ചക്കറികളുടെ പേര് നൽകിയാൽ മതി, കുട്ടികൾക്ക് ഇഷ്ടപ്പെടുന്ന രീതിയിലുള്ള റെസിപ്പികൾ എ.ഐ തയ്യാറാക്കി നൽകും.

ഇതുകൂടാതെ, സ്കൂളിൽ നിന്നുള്ള നീണ്ട ഇമെയിലുകൾ വായിക്കാനും, പ്രൊജക്റ്റുകൾ ഓർമ്മിപ്പിക്കാനും, കലണ്ടർ അപ്ഡേറ്റ് ചെയ്യാനുമൊക്കെ എ.ഐ വളരെ ഫലപ്രദമായി ഉപയോഗിക്കുന്ന മാതാപിതാക്കളുടെ എണ്ണം വർദ്ധിച്ചുവരികയാണ്. ഒരു അസിസ്റ്റന്റിനെപ്പോലെ ഇത്തരം അഡ്മിനിസ്ട്രേറ്റീവ് കാര്യങ്ങൾ എ.ഐ കൈകാര്യം ചെയ്യുമ്പോൾ, മാതാപിതാക്കൾക്ക് തങ്ങളുടെ കുഞ്ഞുങ്ങൾക്കൊപ്പം ചിലവഴിക്കാൻ കൂടുതൽ സമയം ലഭിക്കുന്നു എന്നത് വലിയൊരു ഗുണമാണ്.

സ്മാർട്ട് മോണിറ്ററുകളും ആരോഗ്യവും

കുഞ്ഞുങ്ങളുടെ ഉറക്കം, ശ്വാസോച്ഛ്വാസം, ഹൃദയമിടിപ്പ് എന്നിവ കൃത്യമായി നിരീക്ഷിക്കുന്ന സ്മാർട്ട് ക്രിബ് മോണിറ്ററുകളാണ് മറ്റൊരു വിപ്ലവം. കുഞ്ഞ് കമിഴ്ന്നു വീണാലോ, ശ്വാസതടസ്സം നേരിട്ടാലോ, അല്ലെങ്കിൽ കുഞ്ഞിന്റെ ശരീരതാപനിലയിൽ വ്യത്യാസം വന്നാലോ ഉടൻ തന്നെ മാതാപിതാക്കളുടെ സ്മാർട്ട് ഫോണിലേക്ക് അലാം എത്തും. അതുപോലെ, കുഞ്ഞുങ്ങളുടെ ദിനചര്യകൾ പ്രവചിക്കാൻ സഹായിക്കുന്ന സ്മാർട്ട് ഹെൽത്ത് റിംഗുകളും സ്മാർട്ട് സോക്സുകളും ഇന്ന് വിപണിയിലുണ്ട്. കുഞ്ഞ് എപ്പോഴാണ് ഉറങ്ങുക, എപ്പോഴാണ് ഉണരുക എന്ന് കൃത്യമായി പ്രവചിക്കാൻ ഈ ഉപകരണങ്ങളിലെ ഡാറ്റകൾ സഹായിക്കുന്നു.

സമാധാനമോ അതോ തീരാത്ത ഉത്കണ്ഠയോ?

എല്ലാം സ്മാർട്ടായപ്പോൾ മാതാപിതാക്കളുടെ സമാധാനം നഷ്ടപ്പെട്ടോ എന്നതാണ് പ്രധാന ചോദ്യം. ഒരു വശത്ത് ഈ ഉപകരണങ്ങൾ മാതാപിതാക്കൾക്ക് വിശ്രമിക്കാൻ അവസരം നൽകുമ്പോൾ, മറുവശത്ത് അവ വലിയ മാനസിക സമ്മർദ്ദമാണ് സൃഷ്ടിക്കുന്നത്. ഫോണിലേക്ക് വരുന്ന ഓരോ നോട്ടിഫിക്കേഷനുകളും മാതാപിതാക്കളുടെ ഹൃദയമിടിപ്പ് വർദ്ധിപ്പിക്കുന്നു.

ഉദാഹരണത്തിന്, സ്മാർട്ട് മോണിറ്ററിലെ ചെറിയൊരു ചുവപ്പ് സിഗ്നൽ മതി മാതാപിതാക്കളെ പരിഭ്രാന്തരാക്കാൻ. കുഞ്ഞിന്റെ സ്വാഭാവികമായ അനക്കങ്ങളെപ്പോലും പലപ്പോഴും മെഷീനുകൾ അപകടസൂചനയായി തെറ്റിദ്ധരിപ്പിക്കാറുണ്ട്. ഇത് ‘ഹെൽത്ത് ആൻസൈറ്റി’എന്ന അവസ്ഥയിലേക്ക് പലരെയും നയിക്കുന്നു. സ്വന്തം കുഞ്ഞിനെ നേരിട്ട് നോക്കി ഉറപ്പുവരുത്തുന്നതിനേക്കാൾ കൂടുതൽ സമയം സ്മാർട്ട്‌ഫോണിലെ ആപ്പുകളിലെ ഡാറ്റകൾ നോക്കിയിരിക്കാനാണ് ഇന്ന് പലരും സമയം കണ്ടെത്തുന്നത്. കുഞ്ഞിന്റെ ഉറക്കത്തിന്റെ സ്കോർ 80 ശതമാനത്തിൽ താഴെയായാൽ താൻ ഒരു നല്ല രക്ഷിതാവല്ലേ എന്ന അപകർഷതാബോധം പോലും പലരിലും ഉണ്ടാകുന്നു. മാതാപിതാക്കളുടെ സ്വാഭാവികമായ സഹജാവബോധത്തെ ഇത്തരം ഗാഡ്‌ജെറ്റുകൾ ഇല്ലാതാക്കുന്നുണ്ടോ എന്ന് മനഃശാസ്ത്രജ്ഞർ ആശങ്കപ്പെടുന്നുണ്ട്. കുഞ്ഞിന്റെ കരച്ചിൽ കേട്ട് അവരെന്താണ് ആവശ്യപ്പെടുന്നതെന്ന് മനസ്സിലാക്കാനുള്ള കഴിവ് മനുഷ്യർക്ക് പ്രകൃതിദത്തമായി ഉള്ളതാണ്. എന്നാൽ മെഷീനുകളെ മാത്രം ആശ്രയിക്കുമ്പോൾ ഈ കഴിവ് പതിയെ നഷ്ടപ്പെടുന്നു.

സന്തുലിതാവസ്ഥ കണ്ടെത്തുക

സാങ്കേതികവിദ്യ ഒരു സഹായി മാത്രമാണെന്ന് തിരിച്ചറിയുകയാണ് ഏറ്റവും പ്രധാനം. ഇത്തരം ഉപകരണങ്ങൾ നൽകുന്ന വിവരങ്ങൾ തീർച്ചയായും ഉപയോഗപ്രദമാണ്, എന്നാൽ അവയെ പൂർണ്ണമായും ആശ്രയിക്കുന്നത് ഗുണകരമല്ല. ഡാറ്റകൾക്ക് അപ്പുറം കുഞ്ഞിന്റെ പെരുമാറ്റങ്ങളും വികാരങ്ങളും നേരിട്ട് മനസ്സിലാക്കാൻ മാതാപിതാക്കൾക്ക് സാധിക്കണം. നിരന്തരമായ നോട്ടിഫിക്കേഷനുകൾ ഒഴിവാക്കി അത്യാവശ്യമായ അലർട്ടുകൾ മാത്രം ഫോണിൽ സെറ്റ് ചെയ്യാൻ ശീലിക്കുക.

ചുരുക്കത്തിൽ, കുട്ടികളെ വളർത്തുക എന്നത് അൽഗോരിതങ്ങൾക്കോ ഒരു മെഷീനോ പൂർണ്ണമായി ചെയ്യാൻ കഴിയുന്ന കാര്യമല്ല. ആർട്ടിഫിഷ്യൽ ഇന്റലിജൻസും സ്മാർട്ട് ഉപകരണങ്ങളും ആ മനോഹരമായ യാത്ര അല്പം കൂടി എളുപ്പമാക്കാൻ സഹായിക്കുന്ന ടൂളുകൾ മാത്രമാണ്. സാങ്കേതികവിദ്യയെ വിവേകപൂർവ്വം ഉപയോഗിച്ചാൽ അതൊരു അനുഗ്രഹമാണ്; മറിച്ച് അത് നമ്മെ നിയന്ത്രിക്കാൻ അനുവദിച്ചാൽ, അത് മാതൃത്വത്തിന്റെയും പിതൃത്വത്തിന്റെയും സ്വാഭാവിക സന്തോഷങ്ങളെ ഇല്ലാതാക്കുന്ന ഒരു വില്ലനായി മാറും.