കറികൾക്ക് പ്രത്യേക രുചിയും മണവും നൽകാൻ മല്ലിയില കൂടിയേ തീരൂ. എന്നാൽ കടയിൽ നിന്ന് വാങ്ങി ഒന്നോ രണ്ടോ ദിവസങ്ങൾക്കുള്ളിൽ തന്നെ മല്ലിയില വാടിപ്പോകുകയോ അഴുകിപ്പോകുകയോ ചെയ്യുന്നത് പലരെയും അലട്ടുന്ന പ്രശ്നമാണ്. ഇത് കാരണം മല്ലിയില വാങ്ങി സൂക്ഷിക്കാൻ പലർക്കും മടിയാണ്. എന്നാൽ ചില പൊടിക്കൈകൾ അറിഞ്ഞുവെച്ചാൽ മല്ലിയില കേടുകൂടാതെ ദിവസങ്ങളോളം ഫ്രഷായി സൂക്ഷിക്കാൻ സാധിക്കും. അത് എങ്ങനെയെന്ന് നോക്കാം:
ഫ്രിഡ്ജിൽ സൂക്ഷിക്കുമ്പോൾ ശ്രദ്ധിക്കേണ്ടവ: മല്ലിയില ഫ്രിഡ്ജിൽ വെക്കുമ്പോൾ ശരിയായ രീതിയിൽ സൂക്ഷിച്ചാൽ വേഗത്തിൽ ഉണങ്ങിപ്പോകില്ല. ഇതിനായി ആദ്യം മല്ലിയിലയുടെ വേരുകളും പഴുത്തതോ കേടായതോ ആയ ഇലകളും മുറിച്ചു മാറ്റുക. ശേഷം ഒരു പേപ്പർ ടവലിൽ ഇവ പൊതിഞ്ഞെടുക്കണം. പേപ്പർ ടവലിൽ അല്പം വെള്ളം തളിച്ച് ഈർപ്പം നിലനിർത്താൻ ശ്രദ്ധിക്കുക. ഇത് അടപ്പുള്ള, വായു കടക്കാത്ത ഒരു പാത്രത്തിലാക്കി (Airtight container) ഫ്രിഡ്ജിൽ സൂക്ഷിക്കാം. ഫ്രിഡ്ജിലെ തണുപ്പ് കാരണം ഇലകളിലെ ഈർപ്പം നഷ്ടപ്പെട്ട് ഉണങ്ങിപ്പോകാതിരിക്കാനാണ് പേപ്പർ ടവൽ ഉപയോഗിക്കുന്നത്.
ഫ്രിഡ്ജ് ഇല്ലാതെയും ഫ്രഷായി വെക്കാം: ഫ്രിഡ്ജ് ഇല്ലാത്തവർക്കും മല്ലിയില ദിവസങ്ങളോളം കേടുകൂടാതെ സൂക്ഷിക്കാൻ സാധിക്കും. മല്ലിയിലയുടെ വേരുകൾ മുറിച്ചുമാറ്റിയ ശേഷം വെള്ളം നിറച്ച ഒരു ഗ്ലാസ് ജാറിലോ കപ്പിലോ പൂക്കൾ വെക്കുന്നതുപോലെ കുത്തനെ നിർത്തി വെക്കുക. ചെറിയ തോതിൽ വെളിച്ചം ലഭിക്കുന്ന തണുപ്പുള്ള സ്ഥലത്ത് ഇത് സൂക്ഷിക്കാവുന്നതാണ്. ചെടികൾ വേരുകളിലൂടെ വെള്ളം വലിച്ചെടുക്കുന്നതുപോലെ മല്ലിയില ജാറിലെ വെള്ളം ഉപയോഗിച്ച് ഫ്രഷായി നിലനിൽക്കും. എന്നാൽ ഗ്യാസ് സ്റ്റൗവിന് അടുത്തോ മറ്റ് ചൂടുള്ള സ്ഥലങ്ങളിലോ ഇത് വെക്കാതിരിക്കാൻ പ്രത്യേകം ശ്രദ്ധിക്കുക. കൂടാതെ രണ്ടു ദിവസത്തിലൊരിക്കൽ ജാറിലെ വെള്ളം മാറ്റി കൊടുക്കുകയും വേണം. ഈ രീതിയിൽ മല്ലിയില ദിവസങ്ങളോളം ഒട്ടും വാടാതെ സൂക്ഷിക്കാം.
+ There are no comments
Add yours