അധ്യാപകക്ഷാമവും അടിസ്ഥാനസൗകര്യങ്ങളുടെ തകർച്ചയും; ഫ്രാൻസിൽ വിദ്യാർത്ഥി പ്രക്ഷോഭം അക്രമാസക്തം, ആയിരത്തിലധികം പേർ അറസ്റ്റിൽ

പാരിസ്: അധ്യാപകക്ഷാമവും വിദ്യാഭ്യാസ മേഖലയിലെ അടിസ്ഥാനസൗകര്യങ്ങളുടെ തകർച്ചയും ചൂണ്ടിക്കാട്ടി ഫ്രാൻസിൽ വിദ്യാർത്ഥി പ്രക്ഷോഭം രൂക്ഷമാകുന്നു. ഹൈസ്കൂൾ, സർവകലാശാലാ വിദ്യാർത്ഥികൾ ഒരുപോലെ തെരുവിലിറങ്ങിയതോടെ രാജ്യത്തെ 700-ലധികം സ്കൂളുകളുടെ പ്രവർത്തനം തടസ്സപ്പെട്ടു. കഴിഞ്ഞ ആഴ്ച പാരിസിൽ ആരംഭിച്ച പ്രതിഷേധം ഇപ്പോൾ രാജ്യത്തിന്റെ മറ്റ് ഭാഗങ്ങളിലേക്കും സർവകലാശാലാ ക്യാമ്പസുകളിലേക്കും വ്യാപിച്ചിരിക്കുകയാണ്.

രാജ്യത്തെ 3,700 സ്‌കൂളുകളിൽ 735 എണ്ണത്തെ പ്രക്ഷോഭം നേരിട്ട് ബാധിച്ചതായി ഫ്രഞ്ച് നീതിന്യായ മന്ത്രി ജെറാൾഡ് ദർമാനിൻ വ്യക്തമാക്കി. ഇതിൽ 222 സ്‌കൂളുകൾ വിദ്യാർത്ഥികൾ പൂർണ്ണമായും ഉപരോധിച്ചിരിക്കുകയാണ്. പോലീസും പ്രതിഷേധക്കാരും തമ്മിൽ പലയിടത്തും രൂക്ഷമായ ഏറ്റുമുട്ടലുകളാണുണ്ടായത്. കഴിഞ്ഞ ദിവസം മാത്രം 1,747 പേരെ അറസ്റ്റ് ചെയ്തതായി ആഭ്യന്തര മന്ത്രി ലോറൻ നുനെസ് അറിയിച്ചു. സംഘർഷങ്ങളിൽ 40 പ്രധാനാധ്യാപകർ ഉൾപ്പെടെ 65 സ്‌കൂൾ ജീവനക്കാർക്കും 305 പോലീസുകാർക്കും പരിക്കേറ്റിട്ടുണ്ട്.

പാരിസ്, മോൺപെലിയർ, നാന്ത്, മാർസെയ് തുടങ്ങിയ നഗരങ്ങളിലെല്ലാം പ്രതിഷേധം വ്യാപകമായ അക്രമത്തിലേക്ക് വഴിമാറി. സ്‌കൂളുകൾക്ക് മുന്നിൽ തീവെപ്പും റോഡ് ഉപരോധവും തുടരുകയാണ്. മാർസെയിൽ ഒരു സ്കൂൾ പ്രിൻസിപ്പലിനും ഡെപ്യൂട്ടി പ്രിൻസിപ്പലിനും നേരെ വിദ്യാർത്ഥികൾ പെട്രോൾ ഒഴിച്ചു. നാന്തിൽ ഒരു ഹൈസ്കൂളിന്റെ പ്രവേശന കവാടത്തിന് തീവെച്ചതായും റിപ്പോർട്ടുകളുണ്ട്. ബെൽഫോർട്ടിൽ പോലീസ് ഉദ്യോഗസ്ഥനെ ആക്രമിച്ച സംഭവത്തിൽ 17-കാരനെ കൊലപാതകശ്രമം ചുമത്തി പോലീസ് അറസ്റ്റ് ചെയ്തു. പ്രക്ഷോഭം നിയന്ത്രിക്കാൻ പോലീസ് വ്യാപകമായി കണ്ണീർവാതകം പ്രയോഗിച്ചു. സുരക്ഷാ പ്രശ്നങ്ങളെ തുടർന്ന് സ്ട്രാസ്ബർഗിൽ ട്രാം സർവീസുകൾ താത്കാലികമായി നിർത്തിവെച്ചിരിക്കുകയാണ്.