മലപ്പുറം: ലഹരിക്കെതിരെ സംസ്ഥാന ആഭ്യന്തര വകുപ്പ് നടപ്പിലാക്കുന്ന ‘തൂഫാൻ ദ നാർകോ ഹണ്ട്’ പദ്ധതിയുടെ രണ്ടാം ഘട്ടത്തിന് തുടക്കമായി. ലഹരിക്കെതിരെയുള്ള പോരാട്ടം ഓരോ വാർഡുകളിലേക്കും വ്യാപിപ്പിക്കാൻ ലക്ഷ്യമിട്ടുള്ള രണ്ടാം ഘട്ടത്തിന്റെ ഉദ്ഘാടനം ആഭ്യന്തരമന്ത്രി രമേശ് ചെന്നിത്തല നിർവ്വഹിച്ചു. ഇതിന്റെ ഭാഗമായി ഓരോ വാർഡിലും ‘തൂഫാൻ ജനജാഗ്രതാ സമിതികൾ’ രൂപീകരിച്ച് ലഹരിവിരുദ്ധ നടപടികൾ ശക്തമാക്കും.
പദ്ധതി ആരംഭിച്ച് 117 ദിവസം പിന്നിടുമ്പോൾ 11,677 കേസുകളാണ് ഇതുവരെ രജിസ്റ്റർ ചെയ്തത്. സ്വതന്ത്രമായി പ്രവർത്തിക്കാൻ പൊലീസിന് അനുമതി നൽകിയതും സ്ത്രീകൾ ഒറ്റക്കെട്ടായി പിന്തുണച്ചതുമാണ് ഒന്നാം ഘട്ടത്തെ വൻവിജയമാക്കിയതെന്ന് മന്ത്രി വ്യക്തമാക്കി. രണ്ടാം ഘട്ടത്തിൽ വാർഡുകൾക്ക് പുറമെ ക്യാമ്പസുകളിലേക്കും ‘തൂഫാൻ വാരിയേഴ്സ്’ നേരിട്ടിറങ്ങി പ്രവർത്തനങ്ങൾ വ്യാപിപ്പിക്കും.
മൂന്ന് ഘട്ടങ്ങളായി നടപ്പിലാക്കുന്ന ഓപ്പറേഷൻ തൂഫാന്റെ അടുത്ത ഘട്ടം അതിനിർണ്ണായകമാണ്. ലഹരിക്കെണിയിൽ അകപ്പെട്ടവരെ അതിൽനിന്ന് മോചിപ്പിക്കാൻ ലക്ഷ്യമിട്ടുള്ള ‘തൂഫാൻ കെയർ’ ആണ് മൂന്നാം ഘട്ടത്തിൽ നടപ്പാക്കുക. നേരത്തെ നടന്ന എസ്.കെ.എൻ ഫോർട്ടി (SKN 40) കേരളയാത്രയാണ് ഓപ്പറേഷൻ തൂഫാൻ പദ്ധതിക്ക് വഴിയൊരുക്കിയതെന്നും ആഭ്യന്തരമന്ത്രി ചൂണ്ടിക്കാട്ടി.
+ There are no comments
Add yours