‘പേജുകൾ പൂട്ടിക്കുന്ന കാര്യത്തിൽ മോദി പോലും മുഖ്യമന്ത്രി വി.ഡി സതീശന് ശിഷ്യപ്പെടും’; മെറ്റയുടെ നടപടിയിൽ രൂക്ഷവിമർശനവുമായി പി. രാജീവ്

തിരുവനന്തപുരം: സർക്കാരിനെതിരെ വിമർശനം ഉന്നയിച്ച ഫേസ്ബുക്ക് പേജുകൾ മെറ്റ (Meta) നീക്കം ചെയ്ത സംഭവത്തിൽ മുഖ്യമന്ത്രി വി.ഡി സതീശനെതിരെ രൂക്ഷവിമർശനവുമായി സി.പി.ഐ.എം നേതാവ് പി. രാജീവ്. എതിർശബ്ദങ്ങളെ ഇല്ലാതാക്കുന്ന കാര്യത്തിൽ പ്രധാനമന്ത്രി നരേന്ദ്രമോദി പോലും മുഖ്യമന്ത്രി വി.ഡി സതീശന് ശിഷ്യപ്പെടുമെന്ന് അദ്ദേഹം പരിഹസിച്ചു. ‘നോ ക്യാപ്’ (No Cap), കേരള ഇൻഡിപ്പെൻഡന്റ് ഫാർമേഴ്‌സ് അസോസിയേഷൻ (KIFA) എന്നീ ഫേസ്ബുക്ക് പേജുകൾ നിരോധിച്ച നടപടിയിൽ സർക്കാരിന്റെ ഇരട്ടത്താപ്പ് ചൂണ്ടിക്കാട്ടിയാണ് അദ്ദേഹത്തിന്റെ ഫേസ്ബുക്ക് കുറിപ്പ്.

കോടതിയിലെ സർക്കാർ വാദം

‘നോ ക്യാപ്’ പേജ് ബ്ലോക്ക് ചെയ്ത നടപടിയെ ചോദ്യം ചെയ്തുള്ള കേസിൽ, ആക്ഷേപകരമായ പോസ്റ്റുകൾ ഒഴിവാക്കാൻ മാത്രമാണ് മെറ്റയോട് ആവശ്യപ്പെട്ടതെന്നായിരുന്നു സർക്കാർ ഹൈക്കോടതിയെ അറിയിച്ചത്. എന്നാൽ ‘കിഫ’യുടെ കാര്യത്തിൽ, ചില പോസ്‌റ്റുകൾ ആക്ഷേപകരമായതുകൊണ്ട് പേജ് തന്നെ ബ്ലോക്ക് ചെയ്യാൻ സർക്കാര്‍ നേരിട്ട് മെറ്റയോട് ആവശ്യപ്പെടുകയായിരുന്നു. ഹൈക്കോടതി വിധിന്യായങ്ങളിൽ ഇക്കാര്യം വ്യക്തമായി പരാമർശിച്ചിട്ടുണ്ടെന്നും പി. രാജീവ് ചൂണ്ടിക്കാട്ടി.

മുഖ്യമന്ത്രിയുടെ വാദം പൊളിയുന്നു

വിമർശന പോസ്റ്റുകൾ മെറ്റ നീക്കം ചെയ്യുന്നുവെന്ന് മാധ്യമപ്രവർത്തകർ ചോദിച്ചപ്പോൾ, ‘താൻ പറഞ്ഞാൽ മെറ്റ അത് കേൾക്കുമെങ്കിൽ താനൊരു മഹാസംഭവം തന്നെയാണെന്നായിരുന്നു’ മുഖ്യമന്ത്രിയുടെ മുൻ പ്രതികരണം. നിരോധനം നീക്കാൻ മെറ്റയ്ക്ക് കത്തെഴുതാമെന്ന് വിശാലമനസ്സോടെ അദ്ദേഹം പ്രഖ്യാപിക്കുകയും ചെയ്തു. എന്നാൽ മുഖ്യമന്ത്രി കത്തെഴുതിയത് നിരോധനം നീക്കാനല്ല, മറിച്ച് പേജുകൾ പൂട്ടിക്കാനായിരുന്നുവെന്ന് ഇപ്പോൾ വ്യക്തമായതായി പി. രാജീവ് കുറ്റപ്പെടുത്തി.

എൽ.ഡി.എഫിനെ വിമർശിച്ചപ്പോൾ പൂട്ടിച്ചില്ല

കഴിഞ്ഞ എൽ.ഡി.എഫ് സർക്കാരിന്റെ കാലത്ത് മുഖ്യമന്ത്രിക്കും വനം മന്ത്രിക്കും എതിരെ കിഫയുടെ പേജിൽ വന്ന അതിരൂക്ഷമായ വിമർശനങ്ങൾ ഇപ്പോഴും അവിടെത്തന്നെയുണ്ട്. അന്ന് യാതൊരു പ്രതികാര നടപടിയുമുണ്ടായില്ല. എന്നാൽ പുതിയ സർക്കാരിനെ അഭിനന്ദിച്ചതിനൊപ്പം ചെറിയൊരു വിമർശനം ഉന്നയിച്ചപ്പോഴേക്കും പേജ് തന്നെ പൂർണ്ണമായി നിരോധിച്ചുകളഞ്ഞ ഭരണമാണ് ഇപ്പോഴുള്ളതെന്ന് പറഞ്ഞ അദ്ദേഹം, ഇതിനെ ‘പുതുയുഗ കേരളം’ എന്നും പരിഹസിച്ചു.