കോഴിക്കോട്: സുഹൃത്തിന്റെ ആഡംബര കാർ ഔദ്യോഗിക വാഹനമായി ഉപയോഗിച്ച സംഭവത്തിൽ ന്യായീകരണവുമായി രംഗത്തെത്തിയ മന്ത്രി കെ.എം. ഷാജി പ്രതിരോധത്തിൽ. മന്ത്രിമാരുടെ വാഹനം സംബന്ധിച്ച മോട്ടോർ വാഹന ചട്ടങ്ങൾക്ക് പൂർണ്ണമായും വിരുദ്ധമാണ് അദ്ദേഹത്തിന്റെ വാദങ്ങൾ. ഈ നടപടി ഗുരുതരമായ നിയമലംഘനമാണെന്ന് ചൂണ്ടിക്കാട്ടി സി.പി.ഐ.എം രംഗത്തെത്തി.
മന്ത്രിമാർക്ക് ഔദ്യോഗികമായി അനുവദിച്ച വാഹനങ്ങളിൽ മാത്രമേ സ്റ്റേറ്റ് ബോർഡ് ഉപയോഗിക്കാൻ പാടുള്ളൂവെന്ന് പി. രാജീവ് വ്യക്തമാക്കി. ശബരിമലയിൽ ഒരു പൊതുമേഖലാ സ്ഥാപനത്തിന്റെ വാഹനത്തിൽ സ്റ്റേറ്റ് ബോർഡ് വെച്ച് പാർക്കിങ് സൗകര്യം ദുരുപയോഗം ചെയ്തതുമായി ബന്ധപ്പെട്ട് രണ്ട് വർഷം മുൻപുള്ള ഹൈക്കോടതിയുടെ സുപ്രധാന വിധിയുണ്ടെന്നും അദ്ദേഹം ചൂണ്ടിക്കാട്ടി. അന്ന് വാഹനത്തിലെ ബോർഡ് ശ്രദ്ധയിൽപ്പെട്ട ജഡ്ജി നേരിട്ട് കേസെടുക്കുകയായിരുന്നു.
പൊതുമേഖലാ സ്ഥാപനങ്ങൾക്കും സഹകരണ സ്ഥാപനങ്ങൾക്കും വരെ സ്റ്റേറ്റ് ബോർഡ് ഉപയോഗിക്കുന്നതിൽ കർശന നിയന്ത്രണങ്ങളുണ്ട്. ഈ സാഹചര്യത്തിലാണ് ‘ഞാനിരിക്കുന്നിടമാണ് വാഹനം’ എന്ന മന്ത്രിയുടെ ന്യായീകരണം. ഇത് നിയമത്തെക്കുറിച്ചുള്ള അജ്ഞതയാണെന്നും, നിയമം അറിയില്ല എന്നത് ശിക്ഷയിൽ നിന്ന് രക്ഷപ്പെടാനുള്ള ന്യായമല്ലെന്നും പി. രാജീവ് കൂട്ടിച്ചേർത്തു.
+ There are no comments
Add yours