കൊച്ചി: മുണ്ടംവേലിയിലെ പി ആൻഡ് ടി ഫ്ലാറ്റ് നിവാസികൾക്കെതിരെ നടത്തിയ അധിക്ഷേപ പരാമർശം പിൻവലിക്കുന്നതായി മുൻ എം.എൽ.എ കെ.ജെ. മാക്സി ട്വന്റിഫോറിനോട് പറഞ്ഞു. തന്റെ വാക്കുകൾ ആരെയെങ്കിലും വേദനിപ്പിച്ചിട്ടുണ്ടെങ്കിൽ അത് പിൻവലിക്കുന്നു. എന്നാൽ, തന്റെ വീട്ടിലേക്ക് മാർച്ച് നടത്തുമെന്ന് പറഞ്ഞാൽ ഭയപ്പെടില്ലെന്നും അദ്ദേഹം വ്യക്തമാക്കി. അതേസമയം, ഫ്ലാറ്റിലെ ശോച്യാവസ്ഥ പരിഹരിക്കണമെന്ന് ആവശ്യപ്പെട്ട് താമസക്കാർ പ്രതിഷേധം ശക്തമാക്കുകയാണ്. അധിക്ഷേപ പരാമർശത്തിൽ പ്രതിഷേധിച്ച് ഇന്ന് കെ.ജെ. മാക്സിയുടെ വീട്ടിലേക്ക് അവർ മാർച്ച് നടത്തും.
ഫ്ലാറ്റ് നിർമ്മാണത്തിലെ അപാകതകൾ പരിഹരിക്കേണ്ടത് സർക്കാരിന്റെ ഉത്തരവാദിത്തമാണെന്ന് കെ.ജെ. മാക്സി പറഞ്ഞു. എൽ.ഡി.എഫിനെ കുറ്റപ്പെടുത്താനുള്ള ശ്രമമാണ് മുഖ്യമന്ത്രിയുടെ ഭാഗത്തുനിന്നും ഉണ്ടായത്. ഇതിനെതിരെയാണ് താൻ പ്രതികരിച്ചതെന്നും അദ്ദേഹം വിശദീകരിച്ചു. താമസക്കാർ അവരുടെ ആവശ്യങ്ങൾ നേടിയെടുക്കുന്നതിനായി ഇപ്പോൾ സർക്കാരിനൊപ്പം നിൽക്കുന്നതാകാം, അതിൽ അവരെ കുറ്റപ്പെടുത്തുന്നില്ലെന്നും അദ്ദേഹം കൂട്ടിച്ചേർത്തു.
ആരുടെ ഭാഗത്താണ് വീഴ്ചയുണ്ടായതെന്ന് കൃത്യമായി അന്വേഷിക്കണം. പ്രശ്നം പരിഹരിക്കാനാണ് മുഖ്യമന്ത്രി ശ്രമിക്കേണ്ടത്, അല്ലാതെ ഫ്ലാറ്റ് പൊളിച്ചുകളയുമെന്ന് പറഞ്ഞ് ആക്ഷേപിക്കുകയല്ല വേണ്ടത്. ഫ്ലാറ്റ് പൊളിച്ചുകളയുമെന്ന് പറഞ്ഞത് രാഷ്ട്രീയ ലക്ഷ്യങ്ങളോടെയാണ്. ഇതിനെതിരെയാണ് താൻ പ്രതികരിച്ചത്. നിർമ്മാണത്തിലുണ്ടായ അപാകതകളാണ് നിലവിലെ പ്രധാന വിഷയം. ഫ്ലാറ്റ് പൊളിക്കുകയാണെങ്കിൽ അവിടെയുള്ളവർക്ക് താമസിക്കാൻ ഉടൻ തന്നെ ബദൽ സംവിധാനം ഒരുക്കണമെന്നും കെ.ജെ. മാക്സി ആവശ്യപ്പെട്ടു.
+ There are no comments
Add yours