ആലപ്പുഴ: കെട്ടിടത്തിന്റെ ഫിറ്റ്നസ് നഷ്ടപ്പെട്ടതിനെ തുടർന്ന് പഠനം മുടങ്ങിയ ആലപ്പുഴ കറ്റാനം സെന്റ് സ്റ്റീഫൻസ് എൽ.പി സ്കൂളിൽ 23 ദിവസങ്ങൾക്ക് ശേഷം ക്ലാസുകൾ പുനരാരംഭിക്കുന്നു. ഔദ്യോഗിക അംഗീകാരം ലഭിക്കുന്നതിന് മുൻപായി, താൽക്കാലിക കെട്ടിടത്തിലാണ് ഒന്നും മൂന്നും ക്ലാസുകൾ ആരംഭിക്കുന്നത്. ക്ലാസുകൾക്കുള്ള ഔദ്യോഗിക അംഗീകാരം ഉടൻ ലഭ്യമാക്കുമെന്ന് മന്ത്രി എം. ലിജു അറിയിച്ചു. എന്നാൽ സ്കൂളിന്റെ പ്രവർത്തനം പൂർണ്ണതോതിൽ പുനരാരംഭിക്കുന്നത് വരെ സമരം തുടരുമെന്നാണ് രക്ഷിതാക്കളുടെ നിലപാട്.
രണ്ടും നാലും ക്ലാസുകളും ഇതേ താൽക്കാലിക കെട്ടിടത്തിലാണ് ഇപ്പോൾ പ്രവർത്തിക്കുന്നത്. ഭരണിക്കാവ് പഞ്ചായത്തിന്റെ മേൽനോട്ടത്തിലാണ് ക്ലാസുകൾ തുടങ്ങുന്നത്. വിഷയത്തിൽ ശാശ്വതമായൊരു പരിഹാരം കാണാൻ സ്കൂൾ മാനേജ്മെന്റ് തയ്യാറാകുന്നില്ലെന്ന് രക്ഷിതാക്കൾ പരാതിപ്പെടുന്നു. കഴിഞ്ഞ ദിവസം മന്ത്രി എം. ലിജു മാനേജ്മെന്റ് പ്രതിനിധികളുമായി മാത്രം ചർച്ച നടത്തി മടങ്ങിയതും രക്ഷിതാക്കൾക്കിടയിൽ പ്രതിഷേധത്തിന് ഇടയാക്കിയിരുന്നു. പ്രശ്നപരിഹാരത്തിനായി മന്ത്രി വിദ്യാഭ്യാസ ഡയറക്ടറുമായി കൂടിക്കാഴ്ച നടത്തും.
മാനേജ്മെന്റിന്റെ അനാസ്ഥ മൂലമാണ് കറ്റാനം സെന്റ് സ്റ്റീഫൻസ് എയ്ഡഡ് സ്കൂളിലെ അധ്യയനം നിലച്ചത്. 1916 മുതൽ പ്രവർത്തിക്കുന്ന ഈ സ്കൂൾ 2009-ലാണ് ഓർത്തഡോക്സ് വലിയ പള്ളി മാനേജ്മെന്റ് ഏറ്റെടുത്തത്. തുടക്കത്തിൽ മികച്ച രീതിയിൽ പ്രവർത്തിച്ചിരുന്നെങ്കിലും പിന്നീട് സ്കൂളിന്റെ പ്രവർത്തനങ്ങൾ മന്ദഗതിയിലാവുകയായിരുന്നു. കാലപ്പഴക്കം മൂലം ബലക്ഷയം സംഭവിച്ച ഒരു കെട്ടിടത്തിന്റെ ഫിറ്റ്നസ് കഴിഞ്ഞ ജൂൺ 30-ന് നഷ്ടമായിരുന്നു. ഇത് പുതുക്കാൻ മാനേജ്മെന്റ് തയ്യാറാകാതിരുന്നതോടെ ഒന്നും മൂന്നും ക്ലാസുകൾ അടച്ചുപൂട്ടേണ്ടി വന്നു. ഇതോടെ അധ്യാപകർക്ക് ജോലി നഷ്ടമാവുകയും, പുതിയ കെട്ടിടം പണിയാനോ ബദൽ സംവിധാനം ഒരുക്കാനോ മാനേജ്മെന്റ് തയ്യാറാകാതിരുന്നതോടെ 41 കുട്ടികളുടെ ഭാവി അനിശ്ചിതത്വത്തിലാവുകയുമായിരുന്നു.
+ There are no comments
Add yours