മാസപ്പടി കേസ്: പിണറായി വിജയനെതിരായ അന്വേഷണം ഊർജ്ജിതം; എസ്‌ഐടിയുടെ വിവരശേഖരണം ഇന്ന് മുതൽ

തിരുവനന്തപുരം: മാസപ്പടി കേസിൽ എൻഫോഴ്‌സ്‌മെന്റ് ഡയറക്ടറേറ്റിന്റെ (ഇ.ഡി) റിപ്പോർട്ടിന് പിന്നാലെ സർക്കാർ നിയോഗിച്ച പ്രത്യേക അന്വേഷണ സംഘം (എസ്.ഐ.ടി) ഇന്ന് മുതൽ വിവരശേഖരണം ആരംഭിക്കും. പ്രതിപക്ഷ നേതാവ് പിണറായി വിജയൻ, പി.എ. മുഹമ്മദ് റിയാസ് എം.എൽ.എ, വീണ ടി. എന്നിവർക്കെതിരെയാണ് അന്വേഷണം നടക്കുന്നത്. ക്രൈം ബ്രാഞ്ച് എ.ഡി.ജി.പിയുടെ പൂർണ്ണ മേൽനോട്ടത്തിലായിരിക്കും അന്വേഷണം.

എസ്.പി പി. വിക്രമൻ നേതൃത്വം നൽകുന്ന ഒൻപതംഗ സംഘത്തെയാണ് കേസ് അന്വേഷണത്തിനായി ചുമതലപ്പെടുത്തിയിരിക്കുന്നത്. കെ.വി. ബെന്നി, എസ്.എം. പ്രദീപ് കുമാർ, എൻ. ബിജു എന്നീ മൂന്ന് ഡിവൈഎസ്പിമാരും അഞ്ച് സി.ഐമാരും ഈ സംഘത്തിലുണ്ട്. കൂടാതെ, പ്രത്യേക അന്വേഷണ സംഘത്തിന് ആവശ്യമായ സാങ്കേതിക സഹായങ്ങൾ നൽകുന്നതിനായി സൈബർ എസ്.പി അങ്കിത് അശോകനെയും സർക്കാർ ചുമതലപ്പെടുത്തിയിട്ടുണ്ട്.

ഇ.ഡി കത്ത് നൽകി പതിനഞ്ച് ദിവസങ്ങൾക്ക് ശേഷമാണ് അന്വേഷണത്തിലേക്ക് കടക്കാൻ സർക്കാർ തീരുമാനിച്ചത്. പിണറായി വിജയനെതിരെ അഴിമതി നിരോധന നിയമപ്രകാരം കേസെടുക്കാമെന്ന് സർക്കാരിന് നിയമോപദേശം ലഭിച്ചിരുന്നു. എന്നാൽ, വിശദമായ അന്വേഷണം നടത്തിയ ശേഷം മാത്രം കേസ് രജിസ്റ്റർ ചെയ്താൽ മതിയെന്നാണ് നിലവിലെ തീരുമാനം. മുഖ്യമന്ത്രിയും ആഭ്യന്തരമന്ത്രിയും നടത്തിയ കൂടിക്കാഴ്ചയിലാണ് ഈ നയപരമായ തീരുമാനമെടുത്തത്. ഇതിന്റെ ഭാഗമായി കഴിഞ്ഞ ദിവസം രമേശ് ചെന്നിത്തല ഡി.ജി.പി ഉൾപ്പെടെയുള്ള ഉന്നത പോലീസ് ഉദ്യോഗസ്ഥരെ വിളിച്ചുവരുത്തി സ്ഥിതിഗതികൾ വിലയിരുത്തിയിരുന്നു.

അന്വേഷണ സംഘം രൂപീകരിക്കാൻ ആവശ്യപ്പെട്ട് ആഭ്യന്തര വകുപ്പ് അഡീഷണൽ ചീഫ് സെക്രട്ടറിയും ആഭ്യന്തര സെക്രട്ടറിയും ഡി.ജി.പിക്ക് കത്ത് നൽകിയിരുന്നു. കേസിൽ ആദ്യം പ്രാഥമിക അന്വേഷണമായിരിക്കും നടക്കുകയെന്നും, ഇതിനായി കൃത്യമായ സമയപരിധി നിശ്ചയിക്കുമെന്നും ഡി.ജി.പി റവാഡ ചന്ദ്രശേഖർ വ്യക്തമാക്കി.