കോഴഞ്ചേരി പുതിയ പാലം നാളെ നാടിന്; അവകാശവാദമുന്നയിച്ച് അബിൻ വർക്കിയും വീണാ ജോർജും തമ്മിൽ ഫേസ്ബുക്ക് പോര്

പത്തനംതിട്ട: നാളെ ഗതാഗതത്തിനായി തുറന്നുകൊടുക്കാനിരിക്കുന്ന കോഴഞ്ചേരി പുതിയ പാലത്തിന്റെ നിർമ്മാണത്തെച്ചൊല്ലി എം.എൽ.എ അബിൻ വർക്കിയും മുൻമന്ത്രി വീണാ ജോർജും തമ്മിൽ ഫേസ്ബുക്കിൽ വാക്പോര്. 22.5 കോടി രൂപ ചെലവിൽ നിർമ്മാണം പൂർത്തിയാക്കിയ പാലം പിണറായി സർക്കാരിന്റെ പദ്ധതിയാണെന്ന് വീണാ ജോർജ് അവകാശപ്പെടുമ്പോൾ, ഇതിന് അനുമതി നൽകിയത് ഉമ്മൻചാണ്ടി സർക്കാരാണെന്നാണ് അബിൻ വർക്കിയുടെ വാദം.

2014-ൽ ഉമ്മൻചാണ്ടി സർക്കാരിന്റെ കാലത്താണ് കോഴഞ്ചേരിയിൽ പുതിയ പാലം നിർമ്മിക്കുന്നതിനുള്ള ബജറ്റ് പ്രഖ്യാപനമുണ്ടായത്. പിന്നീട് 2018-ൽ ഒന്നാം പിണറായി സർക്കാരിന്റെ കാലത്ത് കിഫ്ബി (KIIFB) പദ്ധതിയിൽ ഉൾപ്പെടുത്തിയാണ് നിർമ്മാണ പ്രവർത്തനങ്ങൾ ആരംഭിച്ചത്. എന്നാൽ, കഴിഞ്ഞ മാർച്ചിൽ ഉദ്ഘാടനം നടത്തിയിട്ടും ഒരു സൈക്കിൾ പോലും കടന്നുപോകാത്ത പാലമാണ് ഇപ്പോൾ തുറന്നുകൊടുക്കുന്നതെന്ന് അബിൻ വർക്കി ഫേസ്ബുക്കിൽ കുറിച്ചു. ‘ചെറുനുണക്ക് ഊതിയാൽ തെറിക്കുന്ന മൂക്കോ കഴുത്തോ അല്ല തന്റേത്’ എന്നും അദ്ദേഹം പരിഹസിച്ചു.

നാളെ നടക്കുന്ന ചടങ്ങിൽ പൊതുമരാമത്ത് വകുപ്പ് മന്ത്രി പി.കെ. ബഷീറാണ് പാലം ഉദ്ഘാടനം ചെയ്യുന്നത്. ചടങ്ങിലേക്ക് മുൻമന്ത്രി വീണാ ജോർജിനും ഔദ്യോഗികമായി ക്ഷണമുണ്ടെങ്കിലും വിവാദങ്ങളുടെ പശ്ചാത്തലത്തിൽ അവർ ഉദ്ഘാടനത്തിൽ നിന്ന് വിട്ടുനിൽക്കാനാണ് സാധ്യതയെന്നാണ് വിവരം.