തിരുവനന്തപുരം: കടുത്ത പ്രതിസന്ധിയിലായ സ്വകാര്യ ബസ് മേഖലയെ സംരക്ഷിക്കാൻ സർക്കാർ അടിയന്തരമായി ഇടപെടണമെന്നാവശ്യപ്പെട്ട് ബസുടമകൾ നാളെ മുതൽ അനിശ്ചിതകാല നിരാഹാര സമരം ആരംഭിക്കുന്നു. സെക്രട്ടേറിയറ്റിന് മുന്നിലാണ് സമരം നടക്കുക. അതേസമയം, സാധാരണക്കാരായ യാത്രക്കാരെ ബുദ്ധിമുട്ടിക്കാതിരിക്കാൻ ബസുകൾ ഓട്ടം നിർത്തിയുള്ള പണിമുടക്കിലേക്ക് തൽക്കാലം കടക്കുന്നില്ലെന്ന് കേരള സ്റ്റേറ്റ് പ്രൈവറ്റ് ബസ് ഓപ്പറേറ്റേഴ്സ് ഫെഡറേഷൻ (KSPBOF) വ്യക്തമാക്കി.
രണ്ടുപേർ വീതമായിരിക്കും സെക്രട്ടേറിയറ്റിന് മുന്നിൽ നിരാഹാരം കിടക്കുക. കേരള സ്റ്റേറ്റ് പ്രൈവറ്റ് ബസ് ഓപ്പറേറ്റേഴ്സ് ഫെഡറേഷന്റെ നേതൃത്വത്തിൽ നടക്കുന്ന സമരത്തിൽ ആദ്യദിനം ഫെഡറേഷൻ പ്രസിഡന്റ് കെ.കെ. തോമസ്, വൈസ് പ്രസിഡന്റ് ശരണ്യ മനോജ് എന്നിവർ നിരാഹാരമനുഷ്ഠിക്കും. ഉന്നയിച്ച ആവശ്യങ്ങളിൽ സർക്കാരിന്റെ ഭാഗത്തുനിന്ന് അനുകൂല തീരുമാനമുണ്ടാകുന്നതുവരെ സമരം തുടരാനാണ് സംഘടനയുടെ തീരുമാനം.
ബസുടമകളുടെ പ്രധാന ആവശ്യങ്ങൾ:
- അടിയന്തര സർക്കാർ ഇടപെടൽ: പ്രിയദർശിനി സൗജന്യ യാത്രാ പദ്ധതി മൂലം സാമ്പത്തിക പ്രതിസന്ധിയിലായ സ്വകാര്യ ബസുകളെ സംരക്ഷിക്കുന്നതിന് അടിയന്തര നടപടികൾ സ്വീകരിക്കുക.
- നിരക്ക് വർദ്ധനവ്: വിദ്യാർത്ഥികളുടെ കൺസഷൻ നിരക്ക് ഉൾപ്പെടെയുള്ള ബസ് യാത്രാനിരക്കുകൾ വർദ്ധിപ്പിക്കുക.
- പത്മകുമാർ കമ്മീഷൻ റിപ്പോർട്ട്: സ്വകാര്യ ബസ് മേഖലയുമായി ബന്ധപ്പെട്ട പത്മകുമാർ കമ്മീഷൻ റിപ്പോർട്ടിലെ ശുപാർശകൾ യാതൊരു കാലതാമസമില്ലാതെ നടപ്പിലാക്കുക.
- ആർ.ടി.ഒ സേവനങ്ങൾ: റീജിയണൽ ട്രാൻസ്‌പോർട്ട് ഓഫീസുകളിൽ (ആർ.ടി ഓഫീസ്) നിന്നുള്ള സേവനങ്ങൾ തടസ്സങ്ങളില്ലാതെ ലഭ്യമാക്കുന്നതിനുള്ള നടപടികൾ സ്വീകരിക്കുക.
മേഖലയുടെ നിലനിൽപ്പിന് ഈ ആവശ്യങ്ങൾ അടിയന്തരമായി പരിഗണിക്കണമെന്നാണ് ഫെഡറേഷൻ സർക്കാരിനോട് ആവശ്യപ്പെടുന്നത്.
+ There are no comments
Add yours