ആലപ്പുഴ: എക്സാലോജിക്-സി.എം.ആർ.എൽ പണമിടപാടുമായി ബന്ധപ്പെട്ട് എൻഫോഴ്സ്മെന്റ് ഡയറക്ടറേറ്റിനെതിരെ (ഇ.ഡി) രൂക്ഷവിമർശനവുമായി പ്രതിപക്ഷ നേതാവ് പിണറായി വിജയൻ. നൽകിയ സേവനത്തിനാണ് മകൾ വീണയുടെ കമ്പനി പണം കൈപ്പറ്റിയതെന്നും, ഇതിന്റെ പേരിൽ സി.പി.എമ്മിനെ ലക്ഷ്യമിടാനാണ് ഇ.ഡി ശ്രമിക്കുന്നതെന്നും അദ്ദേഹം ആരോപിച്ചു.
‘നിന്നെയല്ല, നിന്റെ അച്ഛനെയാണ് നോട്ടം’ എന്നാണ് ഈ കേസിൽ ഇ.ഡിയുടെ നിലപാടെങ്കിൽ, ആ അച്ഛൻ ഇതൊക്കെ ഒരുപാട് കണ്ടതാണെന്ന് പിണറായി വിജയൻ തുറന്നടിച്ചു. എക്സാലോജിക്കും സി.എം.ആർ.എല്ലും തമ്മിൽ കൃത്യമായ കരാറുണ്ടായിരുന്നു. ആ കരാർ പ്രകാരം നൽകിയ സേവനങ്ങൾക്കാണ് കമ്പനി പ്രതിഫലം വാങ്ങിയത്. പണം കാണാനില്ല എന്ന് പറഞ്ഞാൽ മാത്രമേ അതൊരു കുറ്റമാകുന്നുള്ളൂ. എന്നാൽ ഇവിടെ കൈപ്പറ്റിയ തുക കൃത്യമായി കണക്കുകളിൽ ഉള്ളതാണ്. നിയമപ്രകാരമുള്ള എല്ലാ നികുതികളും അടച്ചാണ് പണം സ്വീകരിച്ചിട്ടുള്ളതെന്നും, പിന്നെ എന്താണ് ഇതിലെ കുറ്റമെന്നും അദ്ദേഹം ചോദിച്ചു.
സി.പി.എമ്മിനെ ലക്ഷ്യമിട്ടുള്ള ഇ.ഡിയുടെ ഈ നീക്കങ്ങൾക്ക് പിന്നിൽ ബി.ജെ.പിയും ആർ.എസ്.എസുമാണ്. കോൺഗ്രസ് ഇതിന് പൂർണ്ണ പിന്തുണ നൽകുകയാണെന്നും പിണറായി വിജയൻ കുറ്റപ്പെടുത്തി. ഈ രാഷ്ട്രീയ വേട്ടയെ പാർട്ടിയും രാഷ്ട്രീയമായും നിയമപരമായും നേരിടുമെന്നും അദ്ദേഹം ആവർത്തിച്ചു വ്യക്തമാക്കി.
+ There are no comments
Add yours