എ.ഐ മനുഷ്യരാശിയെ ദുർബലപ്പെടുത്തിയേക്കാം; ‘യന്ത്രങ്ങളുടെ സ്വർഗത്തിന്’ എതിരെ മുന്നറിയിപ്പുമായി പോപ്പ് ലിയോ പതിനാലാമൻ

ആർട്ടിഫിഷ്യൽ ഇന്റലിജൻസും (എ.ഐ) മറ്റ് നൂതന സാങ്കേതികവിദ്യകളും മനുഷ്യരാശിയെ ദുർബലപ്പെടുത്താൻ സാധ്യതയുണ്ടെന്ന് പോപ്പ് ലിയോ പതിനാലാമൻ മുന്നറിയിപ്പ് നൽകി. മനുഷ്യന്റെ ദൈനംദിന ജീവിതത്തെ നിയന്ത്രിക്കുന്ന ‘യന്ത്രങ്ങളുടെ സ്വർഗമായി’ എ.ഐ മാറുമ്പോൾ, മനുഷ്യത്വം നഷ്ടപ്പെടാതിരിക്കാൻ ശരിയും തെറ്റും തിരിച്ചറിയാനുള്ള നൈതിക വിദ്യാഭ്യാസം അടിയന്തരമായി നൽകേണ്ടതുണ്ടെന്ന് അദ്ദേഹം ചൂണ്ടിക്കാട്ടി. യന്ത്രങ്ങൾക്ക് ‘ബുദ്ധി’ കൽപ്പിക്കുമ്പോൾ മനുഷ്യന്റെ അന്തസ്സ് അംഗീകരിക്കാൻ സമൂഹം പരാജയപ്പെടുന്നതിലെ വിരോധാഭാസവും അദ്ദേഹം തുറന്നുകാട്ടി. കാര്യക്ഷമതയുടെയും ഉൽപ്പാദനക്ഷമതയുടെയും മാത്രം അടിസ്ഥാനത്തിൽ മനുഷ്യജീവിതത്തിന്റെ മൂല്യം നിശ്ചയിക്കപ്പെടുന്നത് അപകടകരമാണെന്നും മാർപാപ്പ വ്യക്തമാക്കി.

ശാസ്ത്രീയ പുരോഗതി കേവലം ലാഭം മാത്രം ലക്ഷ്യമിട്ടുള്ളതാകരുത്. ജനിതക മാറ്റം, സറോഗസി, മനുഷ്യാവയവങ്ങളുടെ വ്യാപാരം തുടങ്ങിയവയെ പ്രോത്സാഹിപ്പിക്കുന്ന രീതിയിലേക്ക് ശാസ്ത്രം മാറരുതെന്നും അദ്ദേഹം ആവശ്യപ്പെട്ടു. പുതിയ ആയുധമത്സരങ്ങൾക്ക് വഴിയൊരുക്കുന്ന ആണവായുധങ്ങൾക്കും ആണവ പ്രതിരോധ സിദ്ധാന്തങ്ങൾക്കുമെതിരെയുള്ള വത്തിക്കാന്റെ ശക്തമായ എതിർപ്പും അദ്ദേഹം ആവർത്തിച്ചു. എന്നാൽ, മനുഷ്യനെ ഇല്ലാതാക്കുന്നതിന് പകരം എ.ഐയെ പ്രയോജനകരമായ ഉപകരണമാക്കി മാറ്റാൻ സാങ്കേതിക രംഗത്തുള്ള പലരും സന്നദ്ധരാണെന്നും, സാങ്കേതിക കമ്പനികളുമായുള്ള വത്തിക്കാന്റെ സംവാദം തുടരുമെന്നും പോപ്പ് കൂട്ടിച്ചേർത്തു. സ്ഥാനമേറ്റെടുത്ത കാലം മുതൽ എ.ഐ മനുഷ്യരാശിക്ക് നൽകുന്ന വെല്ലുവിളികളെക്കുറിച്ച് അദ്ദേഹം നിരന്തരം ഓർമ്മിപ്പിക്കുന്നുണ്ട്.

ഫ്രാൻസ് സന്ദർശനത്തിന്റെ ഭാഗമായി പാരീസിലെത്തിയ മാർപാപ്പയ്ക്ക് ഊഷ്മള സ്വീകരണമാണ് ലഭിച്ചത്. എലിസി കൊട്ടാരത്തിൽ വെച്ച് ഫ്രഞ്ച് പ്രസിഡന്റ് ഇമ്മാനുവൽ മാക്രോണുമായി കൂടിക്കാഴ്ച നടത്തിയ അദ്ദേഹം പിന്നീട് യുനെസ്കോ ആസ്ഥാനത്ത് നയതന്ത്ര പ്രതിനിധികളെയും അഭിസംബോധന ചെയ്തു. യഥാർത്ഥ മതനിരപേക്ഷത എന്നത് പൊതു-വിദ്യാഭ്യാസ മേഖലകളിൽ നിന്ന് മതത്തെ പൂർണ്ണമായി ഒഴിവാക്കുന്നതാകരുതെന്ന് അദ്ദേഹം ഓർമ്മിപ്പിച്ചു. സെന്റ്-ഡെനിയിലെ സ്റ്റേഡ് ഡി ഫ്രാൻസിൽ യുവാക്കൾക്കായി സംഘടിപ്പിച്ച പ്രത്യേക പ്രാർത്ഥനാ സംഗമത്തിലും പോപ്പ് പങ്കെടുത്തു. വെള്ളിയാഴ്ച മാത്രം മൂന്ന് ലക്ഷത്തോളം പേരാണ് മാർപാപ്പയെ കാണാനായി എത്തിയത്.