‘സർക്കാരിന് അടിച്ചമർത്താനാകില്ല, ഉദ്യോഗാർഥികളെ വഞ്ചിക്കുന്നു’; പൊലീസ് ബലംപ്രയോഗിച്ച് മാറ്റിയ വളർമതി വീണ്ടും സമരപ്പന്തലിൽ, എ.ഐ.വൈ.എഫ് മാർച്ചിന് നേരെ ജലപീരങ്കി

തിരുവനന്തപുരം: എൽ.പി.എസ്.ടി (LPST) ഉദ്യോഗാർഥികളുടെ സമരപ്പന്തലിൽ നിന്നും പൊലീസ് ബലംപ്രയോഗിച്ച് മാറ്റിയ സമരസമിതി കൺവീനർ എസ്. വളർമതി വീണ്ടും സമരകേന്ദ്രത്തിൽ തിരിച്ചെത്തി. തങ്ങളുടെ അവകാശപ്പോരാട്ടങ്ങളെ അടിച്ചമർത്താൻ സർക്കാരിന് കഴിയില്ലെന്നും, നിരാഹാര സമരം തുടരുമെന്നും അവർ വ്യക്തമാക്കി. ഉദ്യോഗാർഥികളെ നിരന്തരം പറഞ്ഞുപറ്റിക്കുന്ന സർക്കാർ നിലപാടിനോടുള്ള കടുത്ത പ്രതിഷേധം തുടരുമെന്നും വളർമതി കൂട്ടിച്ചേർത്തു.

‘ചികിത്സ നിഷേധിച്ചു; മാറ്റാൻ ശ്രമിച്ചത് ബോധപൂർവ്വം’

ആരോഗ്യാവസ്ഥ മോശമായിട്ടും തന്നെ ബലംപ്രയോഗിച്ചാണ് പോലീസ് സമരപ്പന്തലിൽ നിന്ന് പിടിച്ചുകൊണ്ടുപോയതെന്ന് വളർമതി ആരോപിച്ചു. തുടർന്ന് ജനറൽ ആശുപത്രിയിൽ എത്തിച്ചെങ്കിലും പിറ്റേന്ന് രാവിലെ ഏഴര വരെ യാതൊരുവിധ ചികിത്സയും നൽകിയില്ല. രക്തസമ്മർദ്ദം (BP) ഉൾപ്പെടെയുള്ള പ്രാഥമിക പരിശോധനകൾ പോലും നടത്തിയില്ല. തന്നെ സമരകേന്ദ്രത്തിൽ നിന്ന് മാറ്റുക എന്ന ലക്ഷ്യത്തോടെ പോലീസ് നടത്തിയ ബോധപൂർവമായ നീക്കമായിരുന്നു ഇതെന്നും അവർ കുറ്റപ്പെടുത്തി.

‘സാമ്പത്തിക ബാധ്യതയില്ലാത്ത ആവശ്യങ്ങൾ പോലും പരിഗണിക്കുന്നില്ല’

സർക്കാരിന് യാതൊരുവിധ സാമ്പത്തിക ബാധ്യതയുമില്ലാത്ത, ഉദ്യോഗാർഥികൾ ഉന്നയിച്ച ന്യായമായ ആവശ്യങ്ങൾ പോലും ചെയ്തുതരാൻ അധികൃതർ തയ്യാറാകുന്നില്ല. ഉദ്യോഗാർഥികളെ വഞ്ചിക്കുന്ന നിലപാടാണ് സർക്കാർ ഈ വിഷയത്തിൽ സ്വീകരിക്കുന്നതെന്നും അവർ ആരോപിച്ചു.

എ.ഐ.വൈ.എഫ് മാർച്ചിന് നേരെ ജലപീരങ്കി

അതേസമയം, എൽ.പി.എസ്.ടി റാങ്ക് ഹോൾഡേഴ്സിന്റെ സമരത്തിന് ഐക്യദാർഢ്യം പ്രഖ്യാപിച്ച് എ.ഐ.വൈ.എഫ് (AIYF) പ്രവർത്തകർ സെക്രട്ടറിയേറ്റിലേക്ക് മാർച്ച് നടത്തി. ഉദ്യോഗാർഥികളുടെ ആവശ്യങ്ങൾ അംഗീകരിക്കണമെന്ന് ആവശ്യപ്പെട്ട് സെക്രട്ടറിയേറ്റിന് മുന്നിലെത്തിയ മാർച്ചിന് നേരെ പോലീസ് ജലപീരങ്കി പ്രയോഗിച്ചു. തുടർന്ന് പ്രദേശത്ത് നേരിയ സംഘർഷാവസ്ഥ ഉടലെടുത്തു.