ചട്ടങ്ങൾ കാറ്റിൽപ്പറത്തി വൈദ്യുതി കരാർ; മുഖ്യമന്ത്രി പ്രഖ്യാപിച്ച സ്വകാര്യ കമ്പനിക്ക് സെബിയുടെ പിഴ ലഭിച്ചിരുന്നതായി രേഖകൾ, അഴിമതിയാരോപിച്ച് സി.പി.ഐ.എം

തിരുവനന്തപുരം: കെ.എസ്.ഇ.ബിയെയും വൈദ്യുതി വകുപ്പിനെയും മറികടന്ന് വൈദ്യുതി വാങ്ങാനായി മുഖ്യമന്ത്രി വി.ഡി സതീശൻ പ്രഖ്യാപിച്ച സ്വകാര്യ കമ്പനിയായ ജി.എൻ.എ (GNA) ക്കെതിരെ ഗുരുതര വെളിപ്പെടുത്തലുകൾ. ഓഹരി വിപണിയിൽ അതീവ രഹസ്യ വിവരങ്ങൾ ചോർത്തിയതിന് ഈ കമ്പനിക്ക് മുൻപ് സെബി (SEBI) പിഴ ചുമത്തിയതിന്റെ രേഖകളാണ് ഇപ്പോൾ പുറത്തുവന്നിരിക്കുന്നത്. കമ്പനിയുടെ അനധികൃത ഇടപാടുകൾക്കെതിരെ നേരത്തെ സെബിക്ക് പരാതി ലഭിച്ചിരുന്നു. യാതൊരുവിധ ഇ-ടെൻഡർ നടപടികളുമില്ലാതെയാണ് വിവാദ കമ്പനിയിൽ നിന്നും വൈദ്യുതി വാങ്ങാൻ സർക്കാർ നീക്കം നടത്തുന്നതെന്നത് ദുരൂഹത വർദ്ധിപ്പിക്കുന്നു.

വിവരങ്ങൾ ചോർത്തി ലാഭമുണ്ടാക്കിയ കമ്പനി

ഓഹരി വിപണിയിലെ വൻ തിരിമറികളുടെ പേരിൽ കേന്ദ്ര റെഗുലേറ്ററി കമ്മീഷന്റെ പിഴക്കും വിലക്കിനും വിധേയമായ കമ്പനിയാണ് ജി.എൻ.എ. ഇന്ത്യൻ എനർജി എക്സ്ചേഞ്ച് ലിമിറ്റഡുമായി ബന്ധപ്പെട്ട ഇടപാടുകളിൽ ഇവർ വൻ ക്രമക്കേട് നടത്തിയതായി സെബി നടത്തിയ പരിശോധനയിൽ വ്യക്തമായിരുന്നു. 2025-ൽ വിപണിയിലെ മാർക്കറ്റ് കപ്ലിംഗ് സംബന്ധിച്ച അതീവ രഹസ്യസ്വഭാവമുള്ള ഔദ്യോഗിക വിവരങ്ങൾ ചോർത്തി ജി.എൻ.എ വലിയ തോതിൽ ലാഭമുണ്ടാക്കി. ഇതിനെത്തുടർന്ന് ലഭിച്ച ഗുരുതര പരാതികളുടെ അടിസ്ഥാനത്തിലാണ് സെബി ഈ അനധികൃത ഇടപാടുകൾക്ക് തടയിട്ടത്. ഇതിനുപുറമെ, കമ്പനിക്കെതിരെ കേന്ദ്ര റെഗുലേറ്ററി കമ്മീഷന്റെ പ്രത്യേക അന്വേഷണവും നടന്നിരുന്നു.

ഇ-ടെൻഡറില്ല; ലക്ഷ്യമിടുന്നത് വൻ അഴിമതിയെന്ന് പ്രതിപക്ഷം

ഇത്രയേറെ ദുരൂഹതകളും ആരോപണങ്ങളും നിലനിൽക്കുന്ന ഒരു കമ്പനിയിൽ നിന്നും വൈദ്യുതി വാങ്ങുമെന്ന് മുഖ്യമന്ത്രി പരസ്യമായി പ്രഖ്യാപിച്ചതിന് പിന്നിൽ വൻ അഴിമതിയുണ്ടെന്നാണ് പ്രതിപക്ഷമായ സി.പി.ഐ.എമ്മിന്റെ പ്രധാന ആരോപണം. രാജ്യത്ത് അഞ്ച് ലക്ഷം രൂപയ്ക്ക് മുകളിലുള്ള ഏത് വൈദ്യുതി വാങ്ങൽ കരാറുകൾക്കും ഇ-ടെൻഡറിംഗ് നിർബന്ധമാണ്. എന്നാൽ നിയമപരമായ ഈ ചട്ടങ്ങളെല്ലാം കാറ്റിൽപ്പറത്തിയാണ് ജി.എൻ.എ എന്ന സ്വകാര്യ കമ്പനിയുമായി സർക്കാർ നേരിട്ട് കരാറിലേർപ്പെടാൻ ഒരുങ്ങുന്നത്. ഈ നീക്കം വലിയ അഴിമതിയിലേക്കാണ് വിരൽ ചൂണ്ടുന്നതെന്ന് സി.പി.ഐ.എം വ്യക്തമാക്കി.