സമൂഹമാധ്യമങ്ങൾക്ക് കടിഞ്ഞാണിടാൻ കേന്ദ്രം; ഐ.ടി നിയമം പൊളിച്ചെഴുതുന്നു, കമ്പനികൾക്കെതിരെ ഇനി നേരിട്ട് കേസെടുക്കാം

ന്യൂഡൽഹി: രാജ്യത്ത് സമൂഹമാധ്യമങ്ങളുടെ (Social Media) മേലുള്ള നിയന്ത്രണം കടുപ്പിക്കാൻ കേന്ദ്രസർക്കാർ ഒരുങ്ങുന്നു. ഇതിന്റെ ഭാഗമായി നിലവിലെ ഐ.ടി നിയമത്തിൽ (IT Act) സമഗ്രമായ മാറ്റങ്ങൾ കൊണ്ടുവരാനാണ് കേന്ദ്രത്തിന്റെ ആലോചന. ഉപയോക്താക്കൾ പോസ്റ്റ് ചെയ്യുന്ന ഉള്ളടക്കങ്ങൾക്ക് (Content) സമൂഹമാധ്യമ കമ്പനികൾക്ക് നേരിട്ട് നിയമപരമായ ഉത്തരവാദിത്തമില്ലെന്ന ഐ.ടി നിയമത്തിലെ 79-ാം വകുപ്പിലെ ചട്ടമാണ് മാറ്റാൻ ഒരുങ്ങുന്നത്. ഇതോടെ നിയമവിരുദ്ധമോ വിവാദപരമോ ആയ പോസ്റ്റുകളുടെ പേരിൽ കമ്പനികൾക്കെതിരെ നേരിട്ട് കേസെടുക്കാൻ സർക്കാരിന് സാധിക്കും.

ലക്ഷ്യമിടുന്നത് വൻകിട കമ്പനികളെ എക്‌സ് (X), യൂട്യൂബ് (YouTube), മെറ്റ (Meta) തുടങ്ങിയ വൻകിട സോഷ്യൽ മീഡിയ പ്ലാറ്റ്‌ഫോമുകളെ ലക്ഷ്യമിട്ടാണ് പുതിയ നീക്കം. സമൂഹമാധ്യമങ്ങൾ കേവലം വിവരങ്ങൾ കൈമാറുന്ന ഇടനിലക്കാർ (Content carriers) മാത്രമല്ലെന്നാണ് സർക്കാരിന്റെ വിലയിരുത്തൽ. പ്ലാറ്റ്‌ഫോമുകളിലെ അൽഗോരിതം വഴി ഉപയോക്താക്കളിലേക്ക് എത്തുന്ന ഉള്ളടക്കങ്ങൾ നിയന്ത്രിക്കുന്നതിലും പ്രചരിപ്പിക്കുന്നതിലും ഈ കമ്പനികൾക്ക് വ്യക്തമായ പങ്കുണ്ടെന്ന് കേന്ദ്രം ചൂണ്ടിക്കാട്ടുന്നു. കമ്പനികൾക്കുള്ള നിയമപരിരക്ഷ എടുത്തുകളയുന്നതോടെ, നിലവിലെ രീതിയിൽ നോട്ടീസ് നൽകി പോസ്റ്റുകൾ പിൻവലിക്കാൻ കാത്തുനിൽക്കാതെ തന്നെ പ്ലാറ്റ്‌ഫോമുകൾക്കെതിരെ നേരിട്ട് നിയമനടപടി സ്വീകരിക്കാൻ സർക്കാരിന് കഴിയും.

നിയമപരിരക്ഷ സേവന ദാതാക്കൾക്ക് മാത്രം ഉപയോക്താക്കൾ എന്ത് കാണണമെന്ന് സജീവമായി തീരുമാനിക്കുന്ന സോഷ്യൽ മീഡിയ കമ്പനികൾക്ക് ഇനി ഈ സംരക്ഷണം ലഭിക്കില്ല. പകരം, വിവരങ്ങൾ കൈമാറുകയോ എത്തിക്കുകയോ മാത്രം ചെയ്യുന്ന ഇന്റർനെറ്റ് സേവന ദാതാക്കൾ (ISPs), ടെലികോം സേവന ദാതാക്കൾ (TSPs), പിയർ-ടു-പിയർ മെസേജിംഗ് ആപ്പുകൾ എന്നിവയ്ക്ക് മാത്രമായി ഈ നിയമപരിരക്ഷ (Safe harbor protection) പരിമിതപ്പെടുത്താമോ എന്നാണ് സർക്കാർ പരിശോധിച്ചുവരുന്നത്.

തുടരുന്ന ഭിന്നതകൾ കഴിഞ്ഞ കുറച്ചുമാസങ്ങളായി കേന്ദ്രസർക്കാരും വൻകിട സമൂഹമാധ്യമ കമ്പനികളും തമ്മിലുള്ള അഭിപ്രായവ്യത്യാസങ്ങൾ രൂക്ഷമാണ്. രാജ്യത്ത് നടന്ന വിദ്യാർത്ഥി പ്രക്ഷോഭങ്ങൾക്കിടെ, പ്രധാനമന്ത്രി നരേന്ദ്ര മോദി അപ്‌ലോഡ് ചെയ്ത ഒരു വീഡിയോ ഫേസ്‌ബുക്ക് ഇന്ത്യയിൽ താൽക്കാലികമായി തടഞ്ഞുവെച്ചത് വലിയ വിവാദമായിരുന്നു. ഇതിന് പിന്നാലെ കഴിഞ്ഞ ജൂലൈയിൽ ഐ.ടി മന്ത്രാലയം മെറ്റയുടെ ആഗോള നയരൂപീകരണ വിഭാഗത്തിലെ ഉന്നത ഉദ്യോഗസ്ഥരെ നേരിട്ട് വിളിച്ചുവരുത്തി വിശദീകരണം തേടുകയും ചെയ്തിരുന്നു.