ശ്രീകാര്യത്തെ 17-കാരന്റെ കൊലപാതകം: കസ്റ്റഡിയിലായിരുന്ന പെൺകുട്ടിയും പ്രതി; അഭിറാമിനെ കെണിയിൽ വീഴ്ത്തിയത് ഇൻസ്റ്റാഗ്രാം അക്കൗണ്ട് വഴി

തിരുവനന്തപുരം: പാങ്ങപ്പാറയിൽ പ്ലസ് വൺ വിദ്യാർത്ഥി അഭിറാമിനെ (17) കൊലപ്പെടുത്തിയ കേസിൽ കസ്റ്റഡിയിലായിരുന്ന പെൺകുട്ടിയും പ്രതിയെന്ന് പോലീസ്. മണക്കാട് സ്വദേശിയായ ഐ.ടി.ഐ വിദ്യാർത്ഥിനി അനന്ദ, ശ്രീകാര്യം സ്വദേശി ഉമർ, അഭിറാമിന്റെ സുഹൃത്തായ 17-കാരൻ എന്നിവരുടെ അറസ്റ്റ് പോലീസ് രേഖപ്പെടുത്തി. അനന്ദയുടെ ഇൻസ്റ്റാഗ്രാം അക്കൗണ്ട് ഉപയോഗിച്ചാണ് പ്രതികൾ അഭിറാമിനെ സംഭവസ്ഥലത്തേക്ക് വിളിച്ചുവരുത്തിയതെന്ന് അന്വേഷണത്തിൽ കണ്ടെത്തിയിട്ടുണ്ട്. കൊലപാതകത്തിൽ പെൺകുട്ടിക്ക് നേരിട്ട് പങ്കുണ്ടെന്നാണ് പോലീസിന്റെ സംശയം.

പ്രണയവുമായി ബന്ധപ്പെട്ട് സുഹൃത്തുക്കൾക്കിടയിലുണ്ടായ തർക്കമാണ് കൊലപാതകത്തിൽ കലാശിച്ചതെന്നാണ് പ്രാഥമിക നിഗമനം. എന്നാൽ, പരുത്തിപ്പാറ എൻ.എസ്.എസ് ഹൈസ്കൂൾ വിദ്യാർത്ഥിയായ അഭിറാമിനെ കൊലപ്പെടുത്താൻ തങ്ങൾ ഉദ്ദേശിച്ചിരുന്നില്ലെന്ന് കേസിലെ പ്രധാന പ്രതിയായ 17-കാരൻ തെളിവെടുപ്പിനിടെ അന്വേഷണ സംഘത്തോട് വെളിപ്പെടുത്തി. മറ്റൊരു കുട്ടിയെ അഭിറാം വഴി വിളിച്ചുവരുത്താനായിരുന്നു പദ്ധതി. എന്നാൽ ഇതിനിടെ അഭിറാമുമായി വാക്കുതർക്കമുണ്ടാകുകയും കൊലപ്പെടുത്തുകയുമായിരുന്നു. കേസിൽ അറസ്റ്റിലായ ഉമർ കാപ്പ (KAAPA) കേസ് പ്രതിയാണ്. ഇയാൾക്കെതിരെ കഴക്കൂട്ടം, ശ്രീകാര്യം സ്റ്റേഷനുകളിലായി മോഷണം, ലഹരികടത്ത്, അടിപിടി തുടങ്ങിയ നിരവധി കേസുകൾ നിലവിലുണ്ട്.

പ്രതിയായ 17-കാരനെ കഴിഞ്ഞ ദിവസം തന്നെ സംഭവസ്ഥലത്തെത്തിച്ച് പോലീസ് തെളിവെടുപ്പ് നടത്തിയിരുന്നു. മൃതദേഹത്തിന്റെ ഇൻക്വസ്റ്റ്, ഫോറൻസിക് നടപടികൾ പൂർത്തിയാക്കിയ ശേഷം പുലർച്ചെയോടെ തിരുവനന്തപുരം മെഡിക്കൽ കോളേജ് ആശുപത്രി മോർച്ചറിയിലേക്ക് മാറ്റി. പോസ്റ്റ്‌മോർട്ടത്തിന് ശേഷം മൃതദേഹം ബന്ധുക്കൾക്ക് വിട്ടുനൽകും. അതേസമയം, കേസിന്റെ ആദ്യഘട്ട അന്വേഷണത്തിൽ പോലീസിന്റെ ഭാഗത്ത് വലിയ വീഴ്ചയുണ്ടായതായി അഭിറാമിന്റെ പിതാവ് മധുകുമാർ ആരോപിച്ചു.