‘സരൾ ബിൽ കേരളത്തെ തകർക്കും, ഇത് കോർപ്പറേറ്റുകൾക്കും ഭൂമാഫിയയ്ക്കും വേണ്ടിയുള്ളത്’; സർക്കാരിനെതിരെ രൂക്ഷവിമർശനവുമായി കെ. രാജനും പി. രാജീവും

വ്യവസായ വികസനത്തിനെന്ന പേരിൽ സർക്കാർ കൊണ്ടുവരുന്ന ‘സരൾ ബില്ലി’നെതിരെ രൂക്ഷവിമർശനവുമായി കെ. രാജൻ എം.എൽ.എയും പി. രാജീവും. സരൾ ബിൽ കേരളത്തെ തകർക്കാനുള്ള നടപടിയാണെന്നും, ഇതുമൂലം സംസ്ഥാനത്തുണ്ടാകാൻ പോകുന്ന പ്രത്യാഘാതങ്ങൾ വളരെ വലുതായിരിക്കുമെന്നും കെ. രാജൻ മുന്നറിയിപ്പ് നൽകി.

ചില കോർപ്പറേറ്റുകൾക്ക് ലാഭമുണ്ടാക്കാൻ വേണ്ടി മാത്രമാണ് സർക്കാർ ഈ ബിൽ കൊണ്ടുവരുന്നത്. പ്രത്യേകമായ ഭൂമി കണ്ടെത്തുക എന്ന ഗൂഢലക്ഷ്യം ഇതിന് പിന്നിലുണ്ട്. കഴിഞ്ഞ നിയമസഭാ സമ്മേളനത്തിലും കുത്തക കച്ചവടക്കാർക്ക് വേണ്ടിയുള്ള നടപടികളാണ് സർക്കാരിന്റെ ഭാഗത്തുനിന്നും ഉണ്ടായതെന്നും കെ. രാജൻ കുറ്റപ്പെടുത്തി.

അതേസമയം, പുതിയ ബിൽ സംസ്ഥാനത്തെ വ്യവസായ സൗഹൃദ അന്തരീക്ഷത്തെ പൂർണ്ണമായും ദുർബലപ്പെടുത്തുമെന്ന് പി. രാജീവ് ചൂണ്ടിക്കാട്ടി. മുഖ്യമന്ത്രിയോ മറ്റ് മന്ത്രിമാരോ ഈ നിയമം വായിച്ചുപോലും നോക്കിയിട്ടില്ല. വ്യവസായങ്ങൾ തുടങ്ങാൻ നിലവിൽ തന്നെ മതിയായ നിയമങ്ങളുണ്ട്. നിലവിലുള്ള നിയമപ്രകാരം എം.എസ്.എം.ഇകൾക്ക് മൂന്നര വർഷം വരെ ലൈസൻസില്ലാതെ പ്രവർത്തിക്കാൻ കഴിയുന്ന ഇളവുണ്ട്. എന്നാൽ പുതിയ ബിൽ വരുന്നതോടെ ഈ വലിയ ആനുകൂല്യമാണ് ഇല്ലാതാകാൻ പോകുന്നതെന്ന് അദ്ദേഹം വ്യക്തമാക്കി.

വ്യവസായ വികസനത്തിന്റെ മറവിൽ തികഞ്ഞ ജനവിരുദ്ധ നിയമം നടപ്പിലാക്കാനാണ് സർക്കാരിന്റെ നീക്കമെന്നാണ് ബില്ലിനെതിരായ പ്രധാന ആരോപണം. ഇത് പൂർണ്ണമായും ഭൂമാഫിയയെ സഹായിക്കുന്നതിന് വേണ്ടിയുള്ളതാണ്. പുതിയ ബില്ലിൽ പരിസ്ഥിതി വിരുദ്ധമായ നിരവധി വ്യവസ്ഥകൾ ഉൾപ്പെടുത്തിയിട്ടുണ്ടെന്ന് മാത്രമല്ല, തദ്ദേശ സ്ഥാപനങ്ങളുടെ അധികാര വികേന്ദ്രീകരണത്തെ ഇത് അട്ടിമറിക്കുമെന്നും വിമർശകർ ചൂണ്ടിക്കാട്ടുന്നു.