‘നിപ ബാധിച്ച് മരിച്ച ആർക്കും റെംഡെസിവിർ നൽകിയിട്ടില്ല’; മരുന്ന് വിവാദത്തിൽ ആരോഗ്യമന്ത്രിയെ തള്ളി ഡോ. അനൂപ് കുമാർ

കോഴിക്കോട്: നിപ രോഗികൾക്ക് കാലാവധി കഴിഞ്ഞ റെംഡെസിവിർ (Remdesivir) മരുന്ന് നൽകിയെന്ന ആരോഗ്യമന്ത്രി കെ. മുരളീധരന്റെ ആരോപണം തള്ളി കോഴിക്കോട് മിംസ് ആശുപത്രിയിലെ ഡോക്ടർ അനൂപ് കുമാർ. കോഴിക്കോട് മെഡിക്കൽ കോളേജിൽ നിപ ബാധിച്ച് മരിച്ച ആർക്കും ഈ മരുന്ന് നൽകിയിട്ടില്ലെന്ന് അദ്ദേഹം ഫേസ്ബുക്ക് വീഡിയോയിലൂടെ വ്യക്തമാക്കി.

കഴിഞ്ഞ മൂന്ന് വർഷത്തിനിടെ നിപ ബാധിച്ച് മരിച്ച ആറുപേരും മെഡിക്കൽ കോളേജിൽ നിന്ന് റെംഡെസിവിർ സ്വീകരിക്കാത്തവരാണെന്ന് അദ്ദേഹം ചൂണ്ടിക്കാട്ടി. 2023 മുതൽ 2025 വരെയുള്ള കാലയളവിൽ 13 പേർക്കാണ് രോഗം ബാധിച്ചത്. ഇതിൽ ഏഴ് പേർ രോഗമുക്തി നേടിയപ്പോൾ ആറുപേർ മരണപ്പെട്ടു. എന്നാൽ മരണപ്പെട്ട ആറുപേരിൽ ഒരാൾക്ക് പോലും കോഴിക്കോട് മെഡിക്കൽ കോളേജിൽ നിന്ന് റെംഡെസിവിർ നൽകിയിട്ടില്ലെന്ന് ഡോക്ടർ വിശദീകരിച്ചു.

2019-ന് ശേഷമാണ് കേരളത്തിൽ നിപ ബാധിതർക്ക് റെംഡെസിവിർ ഉപയോഗിച്ചുതുടങ്ങിയത്. രോഗം സ്ഥിരീകരിക്കാൻ വൈകിയവർക്കോ, സ്ഥിരീകരിച്ച ഉടനെ മരണപ്പെട്ടവർക്കോ ഈ മരുന്ന് നൽകാൻ സാധിച്ചിട്ടില്ല. അതിനാൽ ഇത്തരം മരണങ്ങളും റെംഡെസിവിർ ചികിത്സയും തമ്മിൽ യാതൊരു ബന്ധവുമില്ല. 2022-ലാണ് അവസാനമായി ഈ മരുന്ന് നിർമ്മിച്ചത്. രണ്ട് വർഷമാണ് ഇതിന്റെ കാലാവധി. എന്നാൽ 2024-ന് ശേഷം വന്ന രോഗികൾക്ക് ഏത് തരം മരുന്നാണ് നൽകിയതെന്ന് തനിക്കറിയില്ലെന്നും ഡോ. അനൂപ് കുമാർ വീഡിയോയിൽ കൂട്ടിച്ചേർത്തു.