തിരുവനന്തപുരം: സംസ്ഥാനത്തെ മുൻ എം.എൽ.എമാരുടെ മിനിമം പെൻഷൻ തുക സർക്കാർ വർദ്ധിപ്പിച്ചു. അഞ്ച് വർഷം കാലാവധി പൂർത്തിയാക്കിയ ജനപ്രതിനിധികൾക്ക് ഇനിമുതൽ പ്രതിമാസം 25,000 രൂപയാകും പെൻഷനായി ലഭിക്കുക. നേരത്തെ ഇത് 20,000 രൂപയായിരുന്നു. കൂടാതെ, നിലവിലെ മന്ത്രിമാരുടെയും പ്രതിപക്ഷ നേതാവിന്റെയും ശമ്പളവും എം.എൽ.എമാരുടെ അലവൻസും വർദ്ധിപ്പിക്കുന്നതിനുള്ള ബില്ലുകളും ഗവർണറുടെ അനുമതിയോടെ നിയമസഭയിൽ അവതരിപ്പിച്ചു.
പുതുക്കിയ പെൻഷൻ നിരക്കുകൾ താഴെ പറയുന്നതാണ്:
- രണ്ട് വർഷം പൂർത്തിയാക്കിയവർക്ക്: 10,000 രൂപ (നേരത്തെ ഇത് 8,000 രൂപയായിരുന്നു).
- മൂന്ന് വർഷം പൂർത്തിയാക്കിയവർക്ക്: 15,000 രൂപ (നേരത്തെ ഇത് 12,000 രൂപയായിരുന്നു).
- നാല് വർഷം പൂർത്തിയാക്കിയവർക്ക്: 20,000 രൂപ (നേരത്തെ ഇത് 16,000 രൂപയായിരുന്നു).
- അഞ്ച് വർഷം പൂർത്തിയാക്കിയവർക്ക്: 25,000 രൂപ (നേരത്തെ ഇത് 20,000 രൂപയായിരുന്നു).
അഞ്ച് വർഷത്തിൽ കൂടുതൽ എം.എൽ.എ ആയിരുന്നവർക്ക് അധികമുള്ള ഓരോ വർഷത്തിനും ആനുപാതികമായ പെൻഷൻ വർദ്ധനവ് ലഭിക്കുന്നതാണ്. ഇതിന് പുറമെ, മുൻ അംഗങ്ങൾക്ക് 70 വയസ്സ് പൂർത്തിയാകുന്ന മുറയ്ക്ക് പ്രതിമാസം 4,000 രൂപ അധിക പെൻഷനായും അനുവദിക്കും.
ശമ്പളവും അലവൻസും കൂടും
പെൻഷൻ വർദ്ധനവിന് പുറമെ മന്ത്രിമാരുടെ ശമ്പളവും ജനപ്രതിനിധികളുടെ അലവൻസും ഉയർത്താനുള്ള സുപ്രധാന ബില്ലുകളും സഭയിൽ എത്തിയിട്ടുണ്ട്. ഇതനുസരിച്ച് നിലവിലെ എം.എൽ.എമാരുടെ അലവൻസ് 70,000 രൂപയിൽ നിന്ന് 98,000 രൂപയായി കുത്തനെ ഉയരും. മന്ത്രിമാരുടെയും പ്രതിപക്ഷ നേതാവിന്റെയും ശമ്പളം 1,08,000 രൂപയിൽ നിന്ന് 1,22,000 രൂപയായും വർദ്ധിക്കും. ഗവർണറുടെ അനുമതി ലഭിച്ചതിന് പിന്നാലെയാണ് ബില്ലുകൾ നിയമസഭയിൽ വെച്ചത്.
+ There are no comments
Add yours