‘പുഴു വിവാദത്തിലെ അധ്യാപകൻ കോൺഗ്രസ് വിട്ട് ഡിവൈഎഫ്ഐയിൽ ചേർന്നയാൾ’; പ്രചാരണങ്ങൾ തള്ളി കോൺഗ്രസ് നേതാവ് ഡോ. ജിന്റോ ജോൺ

കൊച്ചി: സംസ്ഥാന സ്‌കൂൾ കായികമേളയിലെ ഭക്ഷണത്തിൽ പുഴുവിനെ കണ്ടെത്തിയെന്ന വിവാദത്തിൽ സസ്‌പെൻഷനിലായ കായികാധ്യാപകൻ ജിജോ ജെയിംസ് കോൺഗ്രസ് പ്രവർത്തകനാണെന്ന വാദം തള്ളി കോൺഗ്രസ് നേതാവ് ഡോ. ജിന്റോ ജോൺ. ഇയാൾക്ക് നിലവിൽ കോൺഗ്രസുമായി യാതൊരു ബന്ധവുമില്ലെന്നും, 2021-ൽ പാർട്ടി വിട്ട ഇയാൾ പിന്നീട് ഡിവൈഎഫ്ഐയിൽ (DYFI) ചേർന്നതാണെന്നും ജിന്റോ ജോൺ തന്റെ ഫേസ്ബുക്ക് കുറിപ്പിലൂടെ വ്യക്തമാക്കി.

2020-ലെ തദ്ദേശ തിരഞ്ഞെടുപ്പിൽ ജിജോ ജെയിംസ് കോൺഗ്രസ് സ്ഥാനാർത്ഥിയായി മത്സരിച്ചിരുന്ന കാര്യം ജിന്റോ സമ്മതിക്കുന്നുണ്ട്. എന്നാൽ ആ തിരഞ്ഞെടുപ്പിൽ കോൺഗ്രസ് വിമത സ്ഥാനാർത്ഥിയാണ് വിജയിച്ചത്. തിരഞ്ഞെടുപ്പിന് ശേഷം ഈ വിമതനെയും ഒപ്പമുണ്ടായിരുന്നവരെയും പാർട്ടി തിരിച്ചെടുത്തതിൽ പ്രതിഷേധിച്ചാണ് ജിജോ കോൺഗ്രസ് വിട്ടത്. തുടർന്ന് അന്നത്തെ സിപിഎം ലോക്കൽ സെക്രട്ടറി ജോർജ്ജി ജോയിയുടെ നേതൃത്വത്തിൽ ഇയാൾ ഡിവൈഎഫ്ഐ അംഗത്വം സ്വീകരിച്ച് സിപിഎമ്മിനൊപ്പം ചേരുകയായിരുന്നു എന്ന് ജിന്റോ ആരോപിക്കുന്നു.

കോൺഗ്രസിലായിരുന്ന സമയത്ത് ഇയാൾ അധ്യാപക സംഘടനയായ കെ.പി.എസ്.ടി.എയിൽ അംഗമായിരുന്നുവെങ്കിലും പാർട്ടി വിട്ടതിന് ശേഷം ഈ അംഗത്വം പുതുക്കിയിട്ടില്ല. കഴിഞ്ഞ അഞ്ച് വർഷമായി പാർട്ടിയുടെയോ അധ്യാപക സംഘടനയുടെയോ യാതൊരുവിധ പ്രവർത്തനങ്ങളിലും പങ്കെടുക്കാത്ത ഇയാളെ കോൺഗ്രസുകാരനാക്കി ചിത്രീകരിക്കാൻ ചില മാധ്യമങ്ങളും രാഷ്ട്രീയ എതിരാളികളും ബോധപൂർവ്വം ശ്രമിക്കുകയാണെന്നും അദ്ദേഹം കുറ്റപ്പെടുത്തി. കുറ്റം ചെയ്തത് ആരായാലും കോൺഗ്രസ് അതിനെതിരായിരിക്കുമെന്നും ജിന്റോ വ്യക്തമാക്കി.

മുൻപ് കോൺഗ്രസിലുണ്ടായിരുന്നവർ പിന്നീട് മറ്റ് പാർട്ടികളിൽ ചേർന്ന് പ്രവർത്തിക്കുമ്പോൾ ചെയ്യുന്ന കാര്യങ്ങളുടെ പാപഭാരം കോൺഗ്രസിനല്ലെന്നും അദ്ദേഹം ഓർമ്മിപ്പിച്ചു. ടി.കെ. ഹംസ, പി. സരിൻ, കെ.പി. അനിൽകുമാർ, ലതിക സുഭാഷ് തുടങ്ങിയ നേതാക്കളും ഒരു കാലത്ത് കോൺഗ്രസുകാരായിരുന്നു എന്നത് ചൂണ്ടിക്കാട്ടിയാണ് ജിന്റോ ജോൺ ഈ വിഷയത്തിൽ പാർട്ടിയുടെ നിലപാട് വ്യക്തമാക്കിയത്.