ആലുവ മാർത്താണ്ഡവർമ്മ പാലത്തിലും ദേശം പാലത്തിലും നാളെമുതൽ അറ്റകുറ്റപ്പണി; 10 ദിവസത്തേക്ക് ഗതാഗത നിയന്ത്രണം, വിമാനത്താവളത്തിലേക്ക് പോകുന്നവർ ശ്രദ്ധിക്കുക

എറണാകുളം: ദേശീയപാതയിലെ ആലുവ മാര്‍ത്താണ്ഡവര്‍മ്മ പഴയ പാലവും ദേശം പാലവും അറ്റകുറ്റപ്പണികൾക്കായി നാളെ മുതല്‍ 10 ദിവസത്തേക്ക് അടച്ചിടും. നവംബര്‍ ഏഴാം തീയതി വരെയാണ് നിയന്ത്രണം. മാര്‍ത്താണ്ഡവര്‍മ്മ പഴയപാലം പൂർണ്ണമായും അടച്ചിട്ടായിരിക്കും പണികൾ നടക്കുക. എന്നാൽ ദേശം പാലത്തിൽ ഒരു നിരയായി (സിംഗിൾ ലൈൻ) വാഹന ഗതാഗതം അനുവദിക്കും. മദ്രാസ് ഐ.ഐ.ടിയുടെ പഠന റിപ്പോർട്ടിന്റെ അടിസ്ഥാനത്തിലാണ് ശോചനീയാവസ്ഥയിലായ ഈ പാലങ്ങളിൽ അടിയന്തരമായി അറ്റകുറ്റപ്പണി നടത്തുന്നത്. പത്തുദിവസത്തിനകം പണി പൂർത്തിയാക്കുമെന്ന് ദേശീയപാത അധികൃതർ ജനപ്രതിനിധികൾക്ക് ഉറപ്പുനൽകിയിട്ടുണ്ട്.

പാലങ്ങൾ അടച്ചിടുന്നത് ദേശീയപാതയിലെ ഗതാഗതത്തെ സാരമായി ബാധിക്കുമെന്നതിനാൽ യാത്രക്കാർക്കായി പൊലീസ് പ്രത്യേക ഗതാഗത ക്രമീകരണങ്ങൾ ഏർപ്പെടുത്തിയിട്ടുണ്ട്:

• ഭാരവാഹനങ്ങൾ (തൃശൂർ ഭാഗത്ത് നിന്ന്): തൃശൂർ ഭാഗത്ത് നിന്നും ആലുവ, എറണാകുളം ഭാഗത്തേക്ക് വരുന്ന വലിയ ഭാരവാഹനങ്ങൾ അങ്കമാലിയിൽ നിന്നും തിരിഞ്ഞ് കാലടി – പെരുമ്പാവൂർ റോഡ് വഴി പോകണം.
• ഭാരവാഹനങ്ങൾ (എറണാകുളം ഭാഗത്ത് നിന്ന്): എറണാകുളം ഭാഗത്ത് നിന്നും വരുന്ന വലിയ ഭാരവാഹനങ്ങൾ കളമശ്ശേരിയിൽ നിന്നും തിരിഞ്ഞ് കണ്ടെയ്‌നർ റോഡ് വഴി പറവൂരിലൂടെ പോകണം.
• ബസുകൾ ഉൾപ്പെടെയുള്ളവ: അങ്കമാലി, പറവൂർ ഭാഗത്തുനിന്നും വരുന്ന ബസുകൾ ഉൾപ്പെടെയുള്ള മുഴുവൻ വാഹനങ്ങളും പറവൂർ കവലയിൽ നിന്നും മണപ്പുറം ഭാഗത്തേക്ക് തിരിയാതെ ഹൈവേയിലൂടെ തന്നെ സഞ്ചരിക്കണം.
• പുതിയ പാലത്തിലെ ക്രമീകരണം: മാർത്താണ്ഡവർമ്മ പുതിയ പാലത്തിലൂടെ ഇരുവശങ്ങളിലേക്കും ഒരേസമയം വരിവരിയായി ഗതാഗതം അനുവദിക്കും.

യാത്രക്കാരുടെ ശ്രദ്ധയ്ക്ക്:

ഗതാഗതക്കുരുക്ക് രൂക്ഷമാകാൻ സാധ്യതയുള്ളതിനാൽ നെടുമ്പാശേരി വിമാനത്താവളത്തിലേക്ക് (സിയാൽ) പോകുന്നവർ യാത്രാസമയം മുൻകൂട്ടി ക്രമീകരിക്കണമെന്ന് അധികൃതർ അഭ്യർത്ഥിച്ചു. കൂടാതെ, വരും ദിവസങ്ങളിൽ സ്വകാര്യ വാഹനങ്ങൾ ഒഴിവാക്കി പരമാവധി പൊതുഗതാഗതം പ്രയോജനപ്പെടുത്താൻ പൊതുജനങ്ങൾ തയ്യാറാകണമെന്നും പൊലീസ് നിർദ്ദേശിച്ചിട്ടുണ്ട്.