തിരുവനന്തപുരം: എ.ഡി.ജി.പി എം.ആർ അജിത് കുമാറിന്റെ സസ്പെൻഷൻ കാലാവധി 120 ദിവസത്തേക്ക് കൂടി നീട്ടിക്കൊണ്ട് സർക്കാർ ഉത്തരവിറക്കി. കഴിഞ്ഞ ജൂലൈയിലാണ് അദ്ദേഹത്തെ സസ്പെൻഡ് ചെയ്തത്. സസ്പെൻഷനിലായിട്ട് മൂന്നു മാസം പൂർത്തിയായ സാഹചര്യത്തിലാണ് നടപടി വീണ്ടും നീട്ടിയത്. വിഷയത്തിൽ അദ്ദേഹത്തിൽ നിന്ന് വിശദീകരണം ലഭിച്ച ശേഷം മാത്രമായിരിക്കും സർക്കാർ തുടർ തീരുമാനങ്ങൾ എടുക്കുക. സസ്പെൻഷൻ സ്റ്റേ ചെയ്യണമെന്നാവശ്യപ്പെട്ട് അജിത് കുമാർ നേരത്തെ സെൻട്രൽ അഡ്മിനിസ്ട്രേറ്റീവ് ട്രിബ്യൂണലിനെ (CAT) സമീപിച്ചിരുന്നെങ്കിലും ഈ ആവശ്യം തള്ളിയിരുന്നു.
മുൻ മുഖ്യമന്ത്രി പിണറായി വിജയൻ നടത്തിയ നവകേരള യാത്രയ്ക്കിടെ ആലപ്പുഴയിൽ യൂത്ത് കോൺഗ്രസ് പ്രവർത്തകരെ മർദ്ദിച്ചതുമായി ബന്ധപ്പെട്ട കേസ് അട്ടിമറിക്കാൻ ശ്രമിച്ചുവെന്നതാണ് അജിത് കുമാറിനെതിരെയുള്ള പ്രധാന ആരോപണം. അന്ന് മുഖ്യമന്ത്രിയുടെ സുരക്ഷാ ഉദ്യോഗസ്ഥരാണ് നിലവിലെ എം.എൽ.എയായ എ.ഡി. തോമസ് ഉൾപ്പെടെയുള്ളവരെ ക്രൂരമായി മർദ്ദിച്ചത്. അന്ന് ക്രമസമാധാന ചുമതലയുള്ള എ.ഡി.ജി.പിയായിരുന്ന അജിത് കുമാർ ഈ കേസ് അട്ടിമറിക്കുന്നതിനായി അനധികൃതമായി ഇടപെട്ടുവെന്ന് പരാതി ഉയർന്നിരുന്നു.
സംസ്ഥാനത്ത് യു.ഡി.എഫ് സർക്കാർ അധികാരത്തിൽ വന്നതിന് പിന്നാലെ ഈ വിഷയം അന്വേഷിക്കുന്നതിനായി എസ്.പി എ.പി. ഷൗക്കത്തലിയുടെ നേതൃത്വത്തിൽ പ്രത്യേക അന്വേഷണ സംഘം (എസ്.ഐ.ടി) രൂപീകരിച്ചു. ഷൗക്കത്തലി സർക്കാരിന് സമർപ്പിച്ച അന്വേഷണ റിപ്പോർട്ടിൽ അജിത് കുമാർ കേസ് അട്ടിമറിക്കാൻ ഇടപെട്ടതായി വ്യക്തമായി കണ്ടെത്തിയിരുന്നു. ഈ റിപ്പോർട്ടിന്റെ അടിസ്ഥാനത്തിലായിരുന്നു ജൂലൈ മാസത്തിൽ അദ്ദേഹത്തെ സർവീസിൽ നിന്നും സസ്പെൻഡ് ചെയ്തത്.
+ There are no comments
Add yours