മുഖ്യ തിരഞ്ഞെടുപ്പ് കമ്മീഷണറുടെ രാജി ആവശ്യപ്പെട്ട് ഡൽഹിയിൽ ഇന്ത്യ സഖ്യത്തിന്റെ പ്രതിഷേധം; തിരഞ്ഞെടുപ്പ് അട്ടിമറിച്ചെന്ന് രാഹുൽ ഗാന്ധി

ന്യൂഡൽഹി: മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ഡൽഹിയിൽ ഇന്ത്യ സഖ്യത്തിലെ എംപിമാർ നടത്തുന്ന പ്രക്ഷോഭം ശക്തമാകുന്നു. വോട്ട് തിരിമറിയിലൂടെ പ്രധാനമന്ത്രി നരേന്ദ്ര മോദിയും കേന്ദ്ര ആഭ്യന്തരമന്ത്രി അമിത് ഷായും രാജ്യത്തെ ഹൈജാക്ക് ചെയ്തുവെന്നും, ഇതിന് ഗ്യാനേഷ് കുമാർ കൂട്ടുനിന്നുവെന്നും രാഹുൽ ഗാന്ധി ആരോപിച്ചു. ജനാധിപത്യത്തിൽ തിരഞ്ഞെടുപ്പ് പ്രക്രിയ സുതാര്യമാകണമെന്നും, അട്ടിമറിക്ക് നേതൃത്വം നൽകിയ ഒരാളെപ്പോലും വെറുതെ വിടില്ലെന്നും അദ്ദേഹം പറഞ്ഞു. ജനങ്ങളുടെ ശബ്ദമാണ് തങ്ങൾ ഉയർത്തുന്നതെന്നും, എന്നാൽ തിരഞ്ഞെടുപ്പ് കമ്മീഷണർ കൂടിക്കാഴ്ചയ്ക്ക് പോലും തയ്യാറാകുന്നില്ലെന്നും അദ്ദേഹം വിമർശിച്ചു.

ഗ്യാനേഷ് കുമാറിന്റെ രാജി ആവശ്യപ്പെട്ട് ഇന്ന് രാവിലെ പാർലമെന്റിൽ നിന്ന് ആരംഭിച്ച പ്രതിഷേധ മാർച്ച് ആകാശവാണി ഭവന് സമീപം വെച്ച് പോലീസ് തടഞ്ഞു. ഇതേത്തുടർന്ന് എംപിമാർ വഴിയിൽ കുത്തിയിരുന്ന് പ്രതിഷേധിച്ചു. രാഹുൽ ഗാന്ധിയുടെയും പ്രിയങ്ക ഗാന്ധിയുടെയും നേതൃത്വത്തിലുള്ള നേതാക്കൾ പോലീസ് ബാരിക്കേഡിന് മുകളിൽ കയറി ദേശീയ പതാക വീശി. മുന്നൂറോളം വരുന്ന എംപിമാരെ എന്തിനാണ് പോലീസ് തടയുന്നതെന്നും കമ്മീഷണർക്ക് ഭയമാണെന്നും രാഹുൽ ഗാന്ധി ചോദിച്ചു.

പ്രതിഷേധക്കാരെ അറസ്റ്റ് ചെയ്ത് നീക്കാൻ പോലീസ് ശ്രമിച്ചെങ്കിലും, നേതാക്കൾ ആകാശവാണി ഭവന്റെ കവാടത്തിന് മുന്നിൽ നിലയുറപ്പിച്ചു. പ്രിയങ്ക ഗാന്ധിയടക്കമുള്ള നേതാക്കളും അദ്ദേഹത്തോടൊപ്പമുണ്ട്. ഗ്യാനേഷ് കുമാർ രാജി വെക്കുന്നത് വരെ ഈ പ്രതിഷേധത്തിൽ നിന്ന് പിന്നോട്ടില്ലെന്നാണ് ഇന്ത്യ സഖ്യത്തിന്റെ നിലപാട്.