കൊച്ചി: കേരളത്തിൽ ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ് (എയിംസ്) സ്ഥാപിക്കപ്പെടണമെന്നും അതിന് ഏറ്റവും യോഗ്യമായ സ്ഥലം തൃശൂർ തന്നെയെന്നും സുരേഷ് ഗോപി എം.പി. തൃശൂരിൽ ബി.ജെ.പി എം.പി ഉള്ളതുകൊണ്ട് മാത്രം പദ്ധതിയെ രാഷ്ട്രീയമായി മാറ്റിനിർത്താതെ, അനുകൂല നിലപാടെടുക്കാൻ സംസ്ഥാന സർക്കാരിന് ആർജ്ജവമുണ്ടാകണമെന്ന് അദ്ദേഹം പറഞ്ഞു. വികസന കാര്യങ്ങളിൽ സംസ്ഥാനം ആർജ്ജവം കാണിച്ചാൽ പദ്ധതി തൃശൂരിലേക്ക് എത്തുമെന്നും താൻ അറിയാതെ കേരളത്തിൽ എയിംസ് അനുവദിക്കില്ലെന്നും അദ്ദേഹം കൊച്ചിയിൽ മാധ്യമങ്ങളോട് സംസാരിക്കവേ വ്യക്തമാക്കി.
മുൻകാലങ്ങളിലെ തർക്കങ്ങളെക്കുറിച്ച് സംസാരിച്ച അദ്ദേഹം, സാമ്പത്തിക ലാഭക്ഷമത മുൻനിർത്തി എയിംസ് നൽകേണ്ടിയിരുന്നത് ആലപ്പുഴയ്ക്കായിരുന്നുവെന്നും, അന്നത്തെ മുഖ്യമന്ത്രി അതിന് തയ്യാറാകാതിരുന്നതാണ് 2016 മുതൽ പദ്ധതി നീണ്ടുപോകാൻ കാരണമായതെന്നും ആരോപിച്ചു. എയിംസ് വിഷയത്തിൽ തന്നോടൊപ്പം തുറന്ന ചർച്ചയ്ക്ക് തയ്യാറാകാൻ ആരോഗ്യ മന്ത്രി കെ. മുരളീധരനെ സുരേഷ് ഗോപി വെല്ലുവിളിച്ചു.
ആരോഗ്യം എന്നത് സംസ്ഥാനങ്ങളുടെ അധികാരപരിധിയിൽ വരുന്ന വിഷയമാണെന്നും, സ്ഥലം ലഭ്യമാക്കേണ്ടത് സംസ്ഥാന സർക്കാരാണെന്നും വ്യക്തമാക്കിയ അദ്ദേഹം അടിസ്ഥാന സൗകര്യങ്ങൾ ഉറപ്പാക്കുന്നതിനുള്ള പിന്തുണയാണ് കേന്ദ്ര സർക്കാർ നൽകുന്നതെന്നും കൂട്ടിച്ചേർത്തു. അതേസമയം, എയിംസിനായി കോട്ടയത്തെ വെള്ളൂർ ന്യൂസ് പ്രിന്റ് ഫാക്ടറിയുടെ സ്ഥലം കൂടി പരിഗണിക്കുമെന്ന് ആരോഗ്യ മന്ത്രി കെ. മുരളീധരൻ മുൻപ് വ്യക്തമാക്കിയിരുന്നു. കേരളത്തിനായുള്ള എയിംസ് സ്വപ്നം വൈകാതെ സാക്ഷാത്കരിക്കുമെന്ന് അടുത്തിടെ സംസ്ഥാനത്തെത്തിയ ഉപരാഷ്ട്രപതി സി.പി. രാധാകൃഷ്ണനും ഉറപ്പുനൽകിയിരുന്നു.
+ There are no comments
Add yours