കോട്ടയം: ഇടിമിന്നലേറ്റ് പ്രശസ്ത കൊമ്പൻ പല്ലാട്ട് ബ്രഹ്മദത്തൻ ചരിഞ്ഞു. ഇന്നലെ വൈകിട്ടോടെ കോട്ടയം മേലമ്പാറയിലുള്ള ഉടമസ്ഥന്റെ വീട്ടിൽ വെച്ചായിരുന്നു ദാരുണമായ സംഭവം. കഴിഞ്ഞ 25 വർഷമായി ആനപ്രേമികളുടെയും ഉടമസ്ഥരായ പല്ലാട്ട് കുടുംബത്തിന്റെയും കണ്ണിലുണ്ണിയായിരുന്നു ബ്രഹ്മദത്തൻ.
ഇന്നലെ വൈകിട്ട് ആനയെ കുളിപ്പിക്കുന്നതിനിടെ മഴയ്ക്കൊപ്പം ശക്തമായ ഇടിമിന്നലേൽക്കുകയായിരുന്നു. മിന്നലേറ്റതിനെ തുടർന്ന് അനക്കമില്ലാതായതോടെ മൃഗഡോക്ടറെത്തി പരിശോധിച്ച ശേഷമാണ് മരണം സ്ഥിരീകരിച്ചത്. സംഭവസമയത്ത് ഉടമസ്ഥൻ രാജേഷും വീട്ടിലുണ്ടായിരുന്നു. പ്രിയപ്പെട്ട പാപ്പാൻ ദാമോദരൻ മരിച്ചപ്പോൾ അവിടെയെത്തി തുമ്പിക്കൈ ഉയർത്തി ആദരാഞ്ജലി അർപ്പിച്ച ബ്രഹ്മദത്തന്റെ ദൃശ്യങ്ങൾ മുൻപ് ഏറെ ശ്രദ്ധിക്കപ്പെട്ടിരുന്നു. അത്രമേൽ മനുഷ്യരുമായി അടുപ്പമുള്ള ശാന്തസ്വഭാവക്കാരനായിരുന്നു ഈ കൊമ്പൻ.
അരുണാചൽ പ്രദേശിലെ വനങ്ങളിൽ നിന്ന് കേരളത്തിലെത്തിച്ച ബ്രഹ്മദത്തൻ തൃശൂർ പൂരത്തിൽ പാറമേക്കാവ് വിഭാഗത്തിന് വേണ്ടി തിടമ്പേറ്റിയിട്ടുണ്ട്. കൂടാതെ സംസ്ഥാനത്തെ പ്രമുഖ ഉത്സവങ്ങളിലെല്ലാം നിറസാന്നിധ്യമായിരുന്ന ബ്രഹ്മദത്തന്റെ വേർപാട് ആനപ്രേമികൾക്ക് വലിയ നോവായി മാറി.
+ There are no comments
Add yours