മലപ്പുറം: മുൻ എം.എൽ.എ പി. നന്ദകുമാറിന്റെ മലപ്പുറം പരാമർശത്തിൽ വിശദീകരണവുമായി മുതിർന്ന സി.പി.ഐ.എം നേതാവ് പിണറായി വിജയൻ. മലപ്പുറത്തെ കടന്നാക്രമിക്കാൻ ശ്രമിക്കുന്നുവെന്ന തരത്തിൽ തെറ്റായ പ്രചാരണമാണ് നടക്കുന്നതെന്നും നന്ദകുമാറിന്റെ സ്വാഗത പ്രസംഗത്തെ വക്രീകരിച്ച് പ്രചരിപ്പിക്കുകയാണെന്നും അദ്ദേഹം പറഞ്ഞു.
മലപ്പുറത്ത് സംഘടിപ്പിച്ച സി.പി.ഐ.എം വിപുലീകൃത ജില്ലാ കമ്മിറ്റി യോഗത്തിന് ശേഷമുള്ള പൊതുസമ്മേളനത്തിൽ സംസാരിക്കുകയായിരുന്നു അദ്ദേഹം. ശക്തമായ മതസൗഹാർദ്ദം നിലനിൽക്കുന്ന മണ്ണാണ് മലപ്പുറമെന്നും വർഗീയ ശക്തികൾക്ക് ഇവിടെ അഴിഞ്ഞാടാൻ കഴിയില്ലെന്നും അദ്ദേഹം ചൂണ്ടിക്കാട്ടി. എന്നാൽ ഈ സൗഹാർദ്ദാന്തരീക്ഷം തകർക്കാൻ ചില മതമൗലികവാദികൾ ശ്രമിക്കുന്നുണ്ടെന്നും, അതിനെതിരെ ജാഗ്രത പുലർത്തണമെന്നാണ് നന്ദകുമാർ ഉദ്ദേശിച്ചതെന്നും അദ്ദേഹം വ്യക്തമാക്കി.
വർഗീയതയ്ക്കെതിരെ നാട് ഒന്നിച്ചുനിൽക്കേണ്ട ഘട്ടത്തിൽ ഇല്ലാത്ത കാര്യങ്ങൾ പറഞ്ഞ് മലപ്പുറത്തിനെതിരെ എന്ന നിലയിൽ ദുഷ്പ്രചാരണം നടത്തുന്നത് വിലപ്പോവില്ലെന്നും അദ്ദേഹം കൂട്ടിച്ചേർത്തു.
+ There are no comments
Add yours