സൗദിക്ക് നേരെ വീണ്ടും ഹൂതി ആക്രമണം; ബാലിസ്റ്റിക് മിസൈലുകളും ഡ്രോണുകളും തകർത്ത് പ്രതിരോധ സേന

റിയാദ്: സൗദി അറേബ്യയ്ക്ക് നേരെ വീണ്ടും യെമനിലെ ഹൂതി വിമതരുടെ ആക്രമണം. തെക്കൻ അതിർത്തി നഗരമായ ഖമീസ് മുഷൈത്തിനെ ലക്ഷ്യമാക്കി വന്ന രണ്ട് ബാലിസ്റ്റിക് മിസൈലുകളും, തലസ്ഥാനമായ റിയാദ് ലക്ഷ്യമാക്കി നീങ്ങിയ രണ്ട് ഡ്രോണുകളും സൗദി പ്രതിരോധ സേന ആകാശത്തുവെച്ചുതന്നെ തകർത്തു. ആക്രമണത്തിന്റെ പശ്ചാത്തലത്തിൽ ഖമീസ് മുഷൈത്ത്, അബഹ എന്നിവിടങ്ങളിൽ സിവിൽ ഡിഫൻസ് രാത്രിയിൽ ജാഗ്രതാ നിർദേശം നൽകിയിരുന്നു. എന്നാൽ റിയാദിൽ പ്രത്യേക മുന്നറിയിപ്പുകൾ നൽകിയിരുന്നില്ല.

കഴിഞ്ഞ ജൂലൈയിൽ റിയാദിനെതിരെ നാവിക ഉപരോധം പ്രഖ്യാപിച്ചതിന് പിന്നാലെയാണ് ഹൂതികൾ സൗദിക്കെതിരെയുള്ള ആക്രമണങ്ങൾ ശക്തമാക്കിയത്. ചെങ്കടലിലൂടെയുള്ള സൗദി കപ്പലുകൾക്ക് നേരെയുള്ള ആക്രമണങ്ങളും ഇതിൽ ഉൾപ്പെടുന്നു. യെമന്റെ വടക്കൻ മേഖലയുടെ ഭൂരിഭാഗവും നിലവിൽ ഹൂതികളുടെ നിയന്ത്രണത്തിലാണ്.

സൗദി നഗരങ്ങൾ, ഊർജ്ജ അടിസ്ഥാന സൗകര്യങ്ങൾ, ചരക്ക് കപ്പലുകൾ എന്നിവ ലക്ഷ്യമാക്കിയുള്ള ഹൂതി ആക്രമണങ്ങൾ ആഗോള എണ്ണ വിതരണത്തിൽ കടുത്ത പ്രതിസന്ധിയാണ് സൃഷ്ടിക്കുന്നത്. ഇറാനും യു.എസ്-ഇസ്രായേൽ സഖ്യവും തമ്മിലുള്ള സംഘർഷം നിലനിൽക്കുന്നതിനാൽ ഈ ആക്രമണങ്ങൾ കൂടുതൽ ആശങ്കയുണ്ടാക്കുന്നുണ്ട്. ഹോർമുസ് കടലിടുക്ക് വഴിയുള്ള ഗതാഗതം ഏറെക്കുറെ തടസ്സപ്പെട്ടതിനാൽ ഗൾഫ് രാജ്യങ്ങൾ പ്രധാനമായും ആശ്രയിക്കുന്ന ചെങ്കടൽ പാതയിലെ ഹൂതി ഭീഷണി വലിയ വെല്ലുവിളിയാണ്.

ഇതിനിടെ, മക്ക സംയുക്ത പ്രതിരോധ കരാറിലെ (Mecca Joint Defense Pact) അംഗരാജ്യങ്ങളിലെ സൈനിക മേധാവികളുടെ യോഗം റിയാദിൽ ചേർന്നു. സൗദി അറേബ്യ, പാകിസ്താൻ, തുർക്കി എന്നീ രാജ്യങ്ങളിലെ ഉന്നത സൈനിക ഉദ്യോഗസ്ഥരാണ് യോഗത്തിൽ പങ്കെടുത്തത്.