തിരുവനന്തപുരം: സംസ്ഥാനത്ത് വൈദ്യുതി ഉപഭോഗം റെക്കോർഡ് നിലയിലേക്ക് ഉയർന്നതോടെ പീക്ക് സമയങ്ങളിൽ കർശന നിയന്ത്രണം പാലിക്കാൻ കെ.എസ്.ഇ.ബിയുടെ മുന്നറിയിപ്പ്. പ്രതിസന്ധി മറികടക്കാൻ വ്യവസായ സ്ഥാപനങ്ങൾക്കും സർക്കാർ ഓഫീസുകൾക്കും ഗാർഹിക ഉപഭോക്താക്കൾക്കുമായി സർക്കാർ പ്രത്യേക ഉത്തരവിറക്കി.
പ്രധാന മാർഗ്ഗനിർദ്ദേശങ്ങൾ:
- ഗാർഹിക ഉപയോഗം: വാട്ടർ ഹീറ്റർ, ഇൻഡക്ഷൻ കുക്കർ, വാഷിംഗ് മെഷീൻ, പമ്പ് സെറ്റുകൾ തുടങ്ങിയ ഉയർന്ന വൈദ്യുതി ആവശ്യമുള്ള ഉപകരണങ്ങളുടെ ഉപയോഗം പരമാവധി പകൽ സമയത്തേക്ക് (സോളാർ സമയങ്ങളിലേക്ക്) മാറ്റണം.
- വ്യവസായങ്ങളും ജലവിതരണവും: കൂടുതൽ ഊർജ്ജം ആവശ്യമുള്ള വ്യവസായ സ്ഥാപനങ്ങൾ തങ്ങളുടെ പ്രവർത്തനങ്ങൾ പകൽ സമയത്തേക്ക് ക്രമീകരിക്കണം. വാട്ടർ അതോറിറ്റിയുടെ പമ്പിങ് പ്രവർത്തനങ്ങളും പകൽ മാത്രമേ നടത്താവൂ.
- സർക്കാർ ഓഫീസുകൾ: വൈദ്യുതി ഉപഭോഗം കുറയ്ക്കുന്നതിന്റെ ഭാഗമായി എസിയുടെ താപനില 25 ഡിഗ്രി സെൽഷ്യസിന് മുകളിൽ നിലനിർത്തണം. അനാവശ്യ ദീപാലങ്കാരങ്ങളും മറ്റ് പ്രകാശ സംവിധാനങ്ങളും ഒഴിവാക്കണം.
പുതിയ വൈദ്യുതി കരാർ
വൈദ്യുതി പ്രതിസന്ധി പരിഹരിക്കുന്നതിന്റെ ഭാഗമായി ‘വേ ഗ്ലോബൽ ഇന്ത്യ പ്രൈവറ്റ് ലിമിറ്റഡ്’ കമ്പനിയിൽ നിന്ന് ഇന്ന് മുതൽ 200 മെഗാവാട്ട് വൈദ്യുതി അധികമായി ലഭിച്ചുതുടങ്ങും. വൈകിട്ട് 6 മണി മുതൽ രാത്രി 12 മണി വരെയുള്ള പീക്ക് സമയങ്ങളിലായിരിക്കും ഈ വൈദ്യുതി ലഭ്യമാകുക. യൂണിറ്റിന് 11 രൂപ നിരക്കിൽ അടുത്ത മാസം 31 വരെയാണ് കമ്പനിയുമായുള്ള കരാർ.
അതേസമയം, സംസ്ഥാനത്ത് മഴ ലഭിച്ചതും അന്തരീക്ഷ താപനില കുറഞ്ഞതും കാരണം വൈദ്യുതി ഉപഭോഗത്തിൽ നേരിയ കുറവ് രേഖപ്പെടുത്തിയിട്ടുണ്ട്. ആവശ്യത്തിന് വൈദ്യുതി ലഭ്യമായതിനാൽ ഇന്നലെ രാത്രി 9 മണിക്ക് ശേഷം സംസ്ഥാനത്ത് നിയന്ത്രണങ്ങൾ വേണ്ടി വന്നില്ല. എങ്കിലും, സാഹചര്യങ്ങൾക്കനുസരിച്ച് ഇന്നും വൈദ്യുതി നിയന്ത്രണം ഏർപ്പെടുത്താൻ സാധ്യതയുണ്ടെന്ന് കെ.എസ്.ഇ.ബി അറിയിച്ചു.
+ There are no comments
Add yours