പ്രയാഗ്രാജ്: ഉത്തർപ്രദേശിലെ വോട്ടർ പട്ടികയിൽ നിന്ന് 1.27 കോടി ഹിന്ദു വോട്ടർമാർ ഒഴിവാക്കപ്പെട്ട സംഭവത്തിൽ സംസ്ഥാന ബി.ജെ.പിയിൽ കടുത്ത ഭിന്നത. ശക്തമായ സംഘടനാ സംവിധാനമുള്ള പാർട്ടിക്ക് ഇത്രയും വലിയൊരു വീഴ്ച എങ്ങനെ സംഭവിച്ചുവെന്ന ചോദ്യവുമായി ഒരു വിഭാഗം നേതാക്കൾ രംഗത്തെത്തി. എസ്.ഐ.ആറുമായി (SIR) ബന്ധപ്പെട്ട വീഴ്ചയ്ക്ക് പിന്നിൽ ഉദ്യോഗസ്ഥരുടെ അനാസ്ഥയാണെങ്കിൽ, അത് തിരുത്താൻ മന്ത്രിമാർ എന്തുകൊണ്ട് തയ്യാറായില്ലെന്നാണ് ഇവരുടെ പ്രധാന ചോദ്യം.
സംഘടനാ സംവിധാനത്തിന്റെ കെട്ടുറപ്പിൽ സംശയം
മുഖ്യമന്ത്രി യോഗി ആദിത്യനാഥ് വിഷയത്തിൽ നടത്തിയ പരസ്യ പ്രതികരണമാണ് പാർട്ടിയിൽ പുതിയ പ്രതിസന്ധി സൃഷ്ടിച്ചത്. ബി.ജെ.പിക്ക് സംസ്ഥാനത്ത് 1.61 ലക്ഷത്തിലധികം ബൂത്ത് ലെവൽ ഏജന്റുമാരാണുള്ളത്. പ്രധാന എതിരാളികളായ സമാജ്വാദി പാർട്ടിക്ക് 1.57 ലക്ഷവും, ബി.എസ്.പിക്ക് 1.54 ലക്ഷവും ഏജന്റുമാരാണുള്ളത്. മറ്റ് പാർട്ടികളേക്കാൾ ശക്തമായ ബൂത്തുതല സംവിധാനവും നിരീക്ഷണവും ഉണ്ടായിട്ടും ഇത്രയും വലിയ പിഴവുണ്ടായത് പാർട്ടിയുടെ കെട്ടുറപ്പിനെക്കുറിച്ച് പൊതുജനങ്ങളിൽ സംശയമുണ്ടാക്കുമെന്ന് വിമർശകർ ചൂണ്ടിക്കാട്ടുന്നു.
ഉദ്യോഗസ്ഥരെ പഴിചാരി മന്ത്രിമാർ
‘ആജ് തക് പഞ്ചായത്ത്’ പരിപാടിയിലായിരുന്നു 1.27 കോടി ഹിന്ദു വോട്ടർമാർ പട്ടികയിൽ നിന്ന് പുറത്തായ കാര്യം യോഗി ആദിത്യനാഥ് വെളിപ്പെടുത്തിയത്. എന്നാൽ സംഭവത്തിൽ സർക്കാർ ഉദ്യോഗസ്ഥരെ പഴിചാരുകയാണ് ആദിത്യനാഥ് സർക്കാരിലെ മന്ത്രിമാർ ചെയ്യുന്നത്. ഉദ്യോഗസ്ഥർ ബി.ജെ.പിക്ക് വേണ്ടി പ്രവർത്തിച്ചില്ലെന്നാണ് ഇവരുടെ ആരോപണം. ഉദ്യോഗസ്ഥർക്ക് മേൽ കുറ്റം ചുമത്തിയുള്ള ഈ പരസ്പരമുള്ള പഴിചാരലുകൾ യു.പി ബി.ജെ.പിക്കുള്ളിൽ വലിയ കോളിളക്കമാണ് നിലവിൽ സൃഷ്ടിച്ചിരിക്കുന്നത്.




+ There are no comments
Add yours