കോട്ടയം: മന്നം ജയന്തി ആഘോഷങ്ങളിൽ പങ്കെടുക്കാൻ മുഖ്യമന്ത്രി വി.ഡി സതീശൻ എൻ.എസ്.എസ് (NSS) ആസ്ഥാനമായ പെരുന്നയിലേക്ക്. ജനുവരി രണ്ടിന് നടക്കുന്ന പരിപാടിയിലേക്ക് എൻ.എസ്.എസ് ജനറൽ സെക്രട്ടറി ജി. സുകുമാരൻ നായരാണ് മുഖ്യമന്ത്രിയെ നേരിട്ട് ക്ഷണിച്ചത്. മുഖ്യമന്ത്രി പദവിയിലെത്തിയ ശേഷം വി.ഡി സതീശൻ ആദ്യമായാണ് പെരുന്നയിലെത്തുന്നത്. അഞ്ച് വർഷങ്ങൾക്ക് മുൻപായിരുന്നു അദ്ദേഹത്തിന്റെ അവസാന പെരുന്ന സന്ദർശനം.
അകൽച്ചയ്ക്കും വാക്‌പോരുകൾക്കും വിരാമം
മുഖ്യമന്ത്രിയും എൻ.എസ്.എസ് നേതൃത്വവും തമ്മിൽ ഏറെ നാളായി നിലനിന്നിരുന്ന കടുത്ത ശീതസമരത്തിനാണ് ഈ ക്ഷണത്തോടെ വിരാമമാകുന്നത്. കഴിഞ്ഞ തിരഞ്ഞെടുപ്പ് കാലത്ത് ഇരുവരും തമ്മിൽ രൂക്ഷമായ വാക്‌പോരുകൾ നടന്നിരുന്നു. ഇതിന് പിന്നാലെ മുഖ്യമന്ത്രിയായ ശേഷം എൻ.എസ്.എസ് ജനറൽ സെക്രട്ടറിക്ക് കൂടിക്കാഴ്ചയ്ക്ക് അനുമതി നൽകാതിരുന്നത് ഭിന്നത കൂടുതൽ രൂക്ഷമാക്കി. സമുദായത്തിന്റെ ഔദ്യോഗിക ആവശ്യങ്ങൾക്കായി ദൂതൻ വഴി രണ്ട് തവണ സമീപിച്ചിട്ടും മുഖ്യമന്ത്രി കാണാൻ തയ്യാറായില്ലെന്ന് സുകുമാരൻ നായർ പരസ്യമായി ആരോപിച്ചിരുന്നു. കഴിഞ്ഞ സർക്കാരിന് നൽകിയ നിവേദനവുമായി ബന്ധപ്പെട്ട കാര്യങ്ങൾ സംസാരിക്കാനായിരുന്നു കൂടിക്കാഴ്ചയ്ക്ക് ശ്രമിച്ചത്. ഔദാര്യത്തിന് വേണ്ടിയല്ല, മറിച്ച് സമുദായത്തിന്റെ അവകാശത്തിന് വേണ്ടിയാണ് മുഖ്യമന്ത്രിയെ കാണാൻ ശ്രമിച്ചതെന്നായിരുന്നു അദ്ദേഹത്തിന്റെ വിശദീകരണം.
‘മുഖ്യമന്ത്രി അഹങ്കാരി’; പഴയ നിലപാട് മയപ്പെടുത്തി എൻ.എസ്.എസ്
കൂടിക്കാഴ്ചയ്ക്ക് അനുമതി നിഷേധിച്ചതിന് പിന്നാലെ മുഖ്യമന്ത്രിക്കെതിരെ അതിരൂക്ഷമായ ഭാഷയിലായിരുന്നു അന്ന് ജി. സുകുമാരൻ നായർ പ്രതികരിച്ചിരുന്നത്. മുഖ്യമന്ത്രിക്ക് അഹങ്കാരമാണെന്നും, അദ്ദേഹത്തിന്റെ കാലുപിടിക്കേണ്ട കാര്യം എൻ.എസ്.എസിനില്ലെന്നും സുകുമാരൻ നായർ തുറന്നടിച്ചിരുന്നു. ഇതേ രീതിയിൽ തന്നെ മുന്നോട്ടുപോകട്ടെയെന്ന് ബോർഡ് ഓഫ് ഡയറക്ടേഴ്‌സ് യോഗത്തിലും അദ്ദേഹം വ്യക്തമാക്കിയിരുന്നു. എന്നാൽ മന്നം ജയന്തിയിലേക്കുള്ള ഈ അപ്രതീക്ഷിത ക്ഷണത്തോടെ പഴയ പിണക്കങ്ങൾ മറന്ന് സർക്കാരും എൻ.എസ്.എസും തമ്മിലുള്ള ബന്ധം വീണ്ടും സമവായത്തിലേക്ക് നീങ്ങുകയാണെന്നാണ് രാഷ്ട്രീയ നിരീക്ഷകരുടെ വിലയിരുത്തൽ.
+ There are no comments
Add yours